جارىستىڭ اشىلۋ سالتاناتىندا ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم بەرۋ دەپارتامەنتىنىڭ ديرەكتورى شولپان كارينوۆا مەن «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆا مەملەكەت باسشىسى نۇرسۇلتان نازارباەۆتىڭ تاپسىرماسى بويىنشا اقپاراتتىق تەحنولوگيالاردى دامىتۋدىڭ نەگىزى مەكتەپتە قالاناتىنىن اتاپ ءوتىپ, روبوت تەحنيكاسى سالاسىندا رەسپۋبليكادا كوزگە ءتۇسىپ جۇرگەن وقۋشىلارعا ساتتىلىك تىلەدى.
بيىل جارىسقا 7-8 جاستاعى بۇلدىرشىندەر دە قاتىسىپ جاتىر. ماسەلەن, پاۆلودار قالاسىنداعى №25 ورتا مەكتەپتىڭ 1 سىنىبىن ۇزدىك تامامداعان زارينا تۇرعانبەكوۆا, قوناقباي اساين, الديار ايتەكەنوۆتەردى ەلىمىزدەگى ەڭ جاس ينجەنەر-روبوتوتەحنيكتەر دەۋگە بولادى.
حالىقارالىق مەكتەپتىڭ ءۇش زالىنا ورنالاسقان وقۋشىلاردىڭ روبوت تەحنيكاسى بويىنشا جۇمىستارى وتە مازمۇندى. ايتالىق, سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11 سىنىپ وقۋشىلارى نازىم جازىلبەكوۆا مەن ايعانىم ساعيدوللينانىڭ جوباسى تاعام ونەركاسىبىن دامىتۋ جانە جاسىلداندىرۋ ساياساتىن ىسكە اسىرۋ ءۇشىن عيماراتتاردىڭ سىرتقى قابىرعاسىن ءتيىمدى پايدالانۋدى كوزدەيدى. «بۇل جوبانىڭ كومەگىمەن جاسىلداندىرۋ ساياساتىن جۇزەگە اسىرا الامىز. قازىرگى تاڭدا گەندىك موديفيكاتسياعا ۇشىراعان ءونىمنىڭ سانى ارتۋدا. سونداي-اق ۇلكەن قالالاردىڭ ەكولوگياسى بۇزىلدى. سوندىقتان عيماراتتاردىڭ قولدانىسسىز تۇرعان سىرتقى قاباتىن وسىمدىك وسىرەتىن ورىن رەتىندە ءتيىمدى قولدانۋعا بولادى. ياعني قابىرعاعا تەكشەلەنگەن ۇياشىقتار ورناتىپ, ونىڭ ىشىنە گۇل وسىرەتىن قىش قۇمىرانى قويۋ ارقىلى وعان جەمىس-جيدەك ەگۋگە بولادى. ارنايى روبوت رەلستەرمەن ءجۇرۋ ارقىلى ءار ۇياشىققا بارىپ, جەمىس-جيدەكتى قاراپ, كۇتىپ, جيناۋعا مۇمكىندىك بار», دەيدى نازىم.
وقۋشىلاردىڭ زەرتتەۋىنشە, ەگەر قۇلپىناي ەكسە, بۇل وسىمدىك كۇنىنە 12 ساعات جارىق پەن اپتاسىنا 2 رەت 15-20 ليتر سۋدى قاجەت ەتەدى. ەسەپتەۋلەر ارقىلى 9 قاباتتى ۇيدەگى 14400 قۇلپىناي ءتۇبى كۇنىنە 1 كيلو كومىرقىشقىل گازىن جۇتا الاتىنى انىقتالدى. وسى ارقىلى قالانىڭ ەكولوگياسى جاقسارادى. سونداي-اق 14400 ءتۇپ قۇلپىنايدان 5 كۇندە ورتا ەسەپپەن 2,5 ملن تەڭگە پايدا تابۋعا بولادى. وقۋشىلاردىڭ ويلاپ تاپقان جوباسى قازىرگى تاڭدا وتە وزەكتى. ويتكەنى وسى ىسپەتتى وڭتايلى جوبالار ىكە اسار بولسا, بۇل ەكولوگياعا, ەكونوميكاعا جانە تاعام ونەركاسىبىنە ايتارلىقتاي وزگەرىستەر اكەلەدى. اتالعان جوبا اياسىندا پايدالى تازا ءونىم الۋعا بولادى. سونىمەن بىرگە «بيزنەس-2020» ستراتەگياسىنا ساي شاعىن جانە ورتا بيزنەستى دامىتۋعا كومەكتەسەدى. جۇمىستاردىڭ 90 پايىزىن روبوت ورىندايتىندىقتان «تسيفرلى قازاقستان» باعدارلاماسى مىندەتتەرىن دە ورىنداۋعا سەپتەسەدى.
مىنە, روبوت تەحنيكاسى بويىنشا چەمپيوناتقا قاتىسىپ جاتقان وقۋشىلاردىڭ ارقايسىسىنىڭ جوباسى وسى سياقتى الەۋمەتتىك-ەكونوميكالىق تۇرعىدان ماڭىزى بار, جاڭا تەحنولوگيالاردىڭ كومەگىمەن جۇزەگە اسىرۋعا بولاتىن وزىق ويلاردى ورتاعا سالۋدا. 20-21 ماۋسىم ارالىعىندا وتەتىن بىرىنشىلىكتىڭ جەڭىمپازى قاراشا ايىندا تايلاندتا وتەتىن WRO-2018 حالىقارالىق وليمپياداسىنا جولداما الىپ, قازاقستاننىڭ نامىسىن قورعايتىن بولادى.
دۋمان اناش,
«ەگەمەن قازاقستان»
