تاۋەلسىزدىكتىڭ 20 جىلدىق مەرەكەسى قارساڭىندا شىمكەنت قالاسىنداعى م. اۋەزوۆ اتىنداعى وقمۋ كوللەدجىنىڭ ءماجىلىس زالىندا ءبىرىنشى شاقىرىلعان پارلامەنت ءماجىلىسىنىڭ دەپۋتاتى, تۇڭعىش رەت قازاق تىلىندە زاڭ جازعان, قازاقستان جازۋشىلار وداعىنىڭ مۇشەسى, اقىن, سازگەر, زاڭگەر اكىم ىسقاقپەن «كوك تۋدىڭ جەلبىرەگەنى» اتتى كەزدەسۋ بولىپ ءوتتى. بۇل كەشكە قالاداعى وزگە دە جوعارى وقۋ ورىندارىنىڭ ستۋدەنتتەرى قاتىستى.
قايراتكەردىڭ ەلىمىز ەگەمەندىك العان العاشقى جىلدارداعى «حالىقتىڭ كوشى-قونى تۋرالى» زاڭ جوباسىنىڭ دايىندالۋ بارىسى, مەملەكەتتىك ءتىل ماسەلەسى, ەل رامىزدەرىنە قاتىستى جانە ت.ب اڭگىمەلەرى ستۋدەنتتەر قاۋىمىنىڭ شىنايى قىزىعۋشىلىعىن تۋدىردى. وزدەرىن تولعاندىرعان سۇراقتارىنا ستۋدەنتتەر بۇدان كەيىن دە تولىمدى جاۋاپ الدى. كەش بارىسىندا قالامگەردىڭ قاراسوزدەرى مەن ولەڭدەرى وقىلىپ, اندەرى شىرقالدى.
جاستار ونىڭ «جۇرەكتەگى جازۋلار», «ادام ىزدەپ ءجۇرمىن», «ءومىر, سەنى سۇيەمىن!», «ماحاببات حاتتارى» اتتى كىتاپتارىنا تالداۋ جاساپ, ونداعى شىعارمالاردىڭ ءمان-ماعىناسىن اشۋعا تىرىستى. كەزدەسۋگە قاتىسقان قالامگەرلەر ەرسىن قويباعاروۆ, زاحاردين قىستاۋباەۆ, جازيرا كۇزەنباەۆا, التىناي قاجى تاۋبايقىزى جانە ت.ب. ءسوز ورايىندا ءوز ويلارىن ورتاعا سالدى.
رەسپۋبليكالىق قاجىمۇقان اتىنداعى قوردىڭ اتقارۋشى ديرەكتورى قۇرمانالى جىلقىباەۆ قازاقتىڭ بالۋانى ق.مۇڭايتپاسوۆ جونىندە بىرقاتار زەرتتەۋ ەڭبەكتەر جازعان اكىم ىسقاقتى «قاجىمۇقان» مەدالىمەن ماراپاتتاسا, كوللەدج جاستارى اتىنان ءسوز سويلەگەن بالنۇر شىرىنبەكوۆا جاستار كوميتەتىنىڭ شەشىمىمەن اكىم ءابدىحايىم ۇلىنا «جاستاردىڭ سۇيىكتى جازۋشىسى» دەگەن اتاق بەرىلگەندىگى جونىندەگى ديپلومدى تارتۋ ەتتى.
كەزدەسۋ اۆتوردىڭ «كوك تۋدىڭ جەلبىرەگەنى» دەگەن انىمەن قورىتىندىلاندى.
«ەگەمەن-اقپارات».
