بۇل تۋرالى ەكى بوكسشىنىڭ ءوزى, پروموۋتەرلەرى جانە جەكپە-جەكتى اقىلى تۇردە ترانسلياتسيا جاسايتىن HBO تەلەارناسى رەسمي تۇردە حابارلادى. رەسمي مالىمدەمە جاسالعان سوڭ شەتەلدىك باق بەتتەرىندە جەكپە-جەكتى ۇيىمداستىرۋشى تاراپتاردىڭ پىكىرلەرى جاريالانا باستادى.
جانكۇيەرلەر تاعاتسىزدانا كۇتكەن گولوۆكين-الۆارەس اراسىنداعى ەكىنشى كەزدەسۋ وسى جىلدىڭ 15 قىركۇيەكتە وتەتىن بولىپ بەكىتىلدى. مەكسيكالىق تاراپ بۇل كۇندى بەكەر تاڭداماعان. سەبەبى, 16 قىركۇيەك مەكسيكانىڭ تاۋەلسىزدىگى كۇنى. ال بۇل ءوز كەزەگىندە اقىلى كورسەتىلىمدى (PPV-ترانسلياتسيا) كوپ ساتۋعا مۇمكىندىك بەرەدى. جەكپە-جەك العاشقى كەزدەسۋ وتكەن نەۆادا شتاتىنىڭ لاس-ۆەگاس قالاسىندا ورنالاسقان T-Mobile سپورت كەشەنىندە وتەدى دەپ بەلگىلەنگەن.
ايتا كەتەرلىگى گولوۆكين مەن الۆارەس اراسىندا ەكىنشى كەزدەسۋ وتكىزۋ تۋرالى كەلىسسوز نەبارى ءبىر جارىم ساعاتقا سوزىلعان. باستاپقىدا مەكسيكالىق تاراپتىڭ پروموۋتەرى ESPN باسىلىمىنا بەرگەن سۇحباتىندا ەكىنشى كەزدەسۋ وتپەيدى دەپ مالىمدەگەن-ءدى. بىراق بەس مينۋتتان كەيىن قوس تاراپ كەلىسسوز وتكىزۋ ءۇشىن ۇستەل باسىنا وتىردى. وسىعان دەيىن دە لا حويا بوكس كەشىنەن تۇسەتىن قارجىنىڭ 57,5 پايىزى ساۋل الۆارەسكە, ال قالعان 42,5 پايىزى گولوۆكيننىڭ ەنشىسىنە تۇسەتىنى تۋرالى ۇسىنىس جاساعان. ءبىرىنشى ايقاستا تابىستىڭ 70 پايىزىن مەكسيكالىق بوكسشى, 30 پايىزىن وتانداسىمىز العان بولاتىن.
ەكى بوكسشىنىڭ اراسىنداعى ايقاس العاش رەت وتكەن جىلى 16 قىركۇيەكتە T-Mobile ارەناسىندا ءوتىپ, تەڭ اياقتالعان. بۇعان دەيىن رەماتچ 5 مامىرعا جوسپارلانعان ەدى, الايدا مەكسيكالىق بوكسشىنىڭ دوپينگ سىناماسى وڭ ناتيجە بەرۋىنە بايلانىس-
تى جەكپە-جەك وتپەي قالدى. ارتىنشا الۆارەس جارتى جىلعا سپورتتان شەتتەتىلدى. جازا تامىز ايىنىڭ 17-ءسى كۇنى اياقتالادى.
گەننادي گولوۆكين 5 مامىر كۇنى امەريكالىق ۆانەس مارتيروسيانمەن جۇدىرىقتاسىپ, ەكىنشى راۋندتا نوكاۋتپەن جەڭدى. وسى كەزدەسۋ ءۇشىن قازاقستاندىق بوكسشى IBF جەلىسى بويىنشا وتەتىن مىندەتتى كەزدەسۋىن كەيىنگە شەگەرگەن ەدى. ال جاقىندا ۋكراينالىق سەرگەي دەرەۆيانچەنكومەن مىندەتتەلگەن ايقاسىن وتكىزۋ ءۇشىن قاعاز تۇرىندە كەلىسىم بەرۋدەن باس تارتىپ, IBF وتانداسىمىزدى تيتۋلىنان ايىرعان-دى. الداعى جەكپە-جەكتە گولوۆكين قازىرگى ۋاقىتتا وزىندە بار WBC, WBA (Super) جانە IBO بەلدىكتەرىن ورتاعا سالادى.
ءالي بيتورە,
«ەگەمەن قازاقستان»
