شاراعا ەلورداداعى جوعارى جانە ورتا وقۋ ورىن ستۋدەنتتەرىمەن قاتار, قالانىڭ قۇقىق قورعاۋ سالاسى قىزمەتكەرلەرى, قازاقستان حالقى اسسامبلەياسى قۇرامىنداعى ەتنومادەني بىرلەستىك وكىلدەرىنەن قۇرالعان 70-تەن استام ادام قاتىسىپ, كەشەننىڭ اينالاسىن قوقىستان تازارتىپ, وسىندا جامباسى جەرگە تيگەن ءا.كەكىلبەاۆ, ف.وڭعارسىنوۆا قاتارلى تاعى باسقا قايراتكەر تۇلعالاردىڭ ماڭگىلىك مەكەنىن گۇلمەن كومكەردى.
بۇل رەتكى اكتسيا جوعارىداعى جاستار قاناتىنىڭ ۇيىمداستىرۋىمەن ءوتىپ وتىرعان ءۇشىنشى شارا ەكەن. بۇعان دەيىن ولار مامىر ايىندا وتكەن ۇلى جەڭىس مەرەكەسى كەزىندە قالاداعى تىل جانە سوعىس ارداگەرلەرىنە قامقورلىق كورسەتسە, ودان كەيىن 31 مامىر – ساياسي قۋعان-سۇرگىن جانە اشارشىلىق قۇرباندارىن ەسكە الۋ كۇنىنە وراي «تاعزىم» اتتى تانىمدىق تاقىرىپ اياسىندا جاستاردىڭ باسىن قوسىپ, قۋعىن-سۇرگىنگە ۇشىراعان تۇلعالار تاريحىنا قاتىستى ءبىرشاما جاقسى ىستەر اتقارىپتى.
اكتسياعا قاتىسۋشىلاردى قۇتتىقتاي كەلگەن قازاقستان حالقى اسسامبلەياسى توراعاسىنىڭ ورىنباسارى-حاتشىلىق مەڭگەرۋشىسى لەونيد پروكوپەنكو, مۇنداعى ماقسات – كيەلى مۇرا ەسكەرتكىشتەردى ساقتاۋ جانە دارىپتەۋ, قوعامدىق ءمانى بار الەۋمەتتىك جوبالاردى ىسكە اسىرۋعا جاستاردىڭ قاتىسۋىن قامتاماسىز ەتۋ, سونىمەن بىرگە جالپىعا ورتاق مادەني جانە رۋحاني قۇندىلىقتار نەگىزىندە قازاقستاندىق بىرەگەيلىك پەن ءپاتريوتيزمدى نىعايتۋ بولىپ تابىلادى, دەدى.
اتالمىش اكتسيا بۇدان باسقا ەلىمىزدىڭ ءۇش وڭىرىندە ءبىر مەزگىلدە قاتار ءوتتى. اتاپ ايتقاندا, رەسپۋبيكالىق دەڭگەيدە قاسيەتتى نىسان قاتارىنا ەنگەن الماتى قالاسىنداعى تاۋەلسىزدىك الاڭىندا, كەلەسىسى قاراعاندى وبلىسىنداعى تاريحي ەسكەرتكىشتەر كەشەنى شوعىرلانعان ۇلىتاۋ جەرىندە, ءۇشىنشى ماڭعىستاۋ جەرىندەگى وتپانتاۋ تاريحي-مادەني كەشەندە ۇيىمداستىرىلدى.
شاراعا مۇرىندىق بولىپ وتىرعان قازاقستان حالقى اسسامبلەياسىنىڭ «جاڭعىرۋ جولى» رەسپۋبليكالىق جاستار قوزعالىسىنىڭ ۇيلەستىرۋشىسى ءمادي اقىلبەكتىڭ پايىمىنشا, بۇل اكتسيانىڭ بولاشاق ءۇشىن بەرەرى مول, اسىرەسە جاس بۋىنعا وتانسۇيگىشتىك يدەياسىن سىڭىرۋگە تاپتىرماس قۇرال. سونداي-اق شارانىڭ ەكىنشى ءبىر ماقساتى – ەلىمىزدەگى رۋحاني ماڭىزعا يە تاريحي نىسانداردى ناسيحاتتاۋ ارقىلى بارشا قازاقستاندىق جاستاردى ءبىر مۇددەگە توعىستىرۋ دەگەنگە توقتالدى.
بەكەن قايرات ۇلى,
«ەگەمەن قازاقستان»
