بۇل ماسەلە بۇگىندە «نۇر وتان» پارتياسىنىڭ باستاماسىنا وراي ەل وڭىرلەرىندە قانات جايا باستاعانى بەلگىلى. سونىڭ الدىڭعى لەگىندە اقتوبە وبلىسى تۇر. تەگىن وقىتىلاتىن IT-سىنىپتاردىڭ كوكجيەگىن كەڭەيتۋ ءۇشىن ماتەريالدىق بازاعا قوسا ءتيىستى مامان-پەداگوگتەر ازىرلەۋ ءىسىنىڭ ماڭىزى جوعارى. وسىعان وراي قازىردىڭ وزىندە 21 پەداگوگ ارنايى دايىندىقتان وتكىزىلگەن. بۇعان قوسا, 35 وقىتۋشى وسى سالاعا ماماندانۋ ۇستىندە. قازىرگى كۇنى وبلىستا IT-سىنىپتار جاساقتاۋ ءىسى بەل ورتادان اسىپ كەلەدى. ونىڭ ءبارى بيۋدجەتتەن تىس كوزدەر ەسەبىنەن قارجىلاندىرىلعان.
– بۇل – «نۇر وتان» پارتياسىنىڭ قىزمەتىن جاڭعىرتۋ اياسىندا بەلگىلەنگەن باستى جوبالاردىڭ ءبىرى. وقۋشىلارعا باعدارلامالىق باعىتتار مەن روبوت تەحنيكاسىمەن قۇراستىرۋدىڭ باستى نەگىزدەرىن ۇيرەتەتىن وقىتۋدىڭ زاماناۋي ءتاسىلى بۇعان دەيىنگى ينفورماتيكا ءپانى اتقارىپ كەلگەن مىندەتتەردەن وزگەشەلەۋ. ەكەۋىنىڭ اتقاراتىن قىزمەتى ەكى بولەك. ءبىز ونى جۇرگىزۋدى شەتەلدىڭ وزىق ءادىس-تاسىلدەرى نەگىزىندە ودان ءارى جەتىلدىرە ءتۇسۋدى ويلاستىرىپ وتىرمىز. ارينە ءدال كوشىرىلگەن كۇيىندە ەمەس, ونىڭ ءبارى ءوز مەملەكەتىمىزدىڭ مەنتاليتەتىن ەسكەرە وتىرىپ ەنگىزىلەدى, – دەدى م.اشىمباەۆ.
سونداي-اق وبلىس مەكتەپتەرىندەگى اسحانالار جۇيەسىن جاڭعىرتۋ ىسىمەن تانىسۋ ساتىندە ول بۇل ىستە ءتيىستى ستاندارتتىق جۇيە جاساقتاۋ قاجەتتىگىنە توقتالدى. سوعان ساي بالالاردىڭ تويىپ تاماق ءىشۋى شارت بولا قويمايدى. ەڭ باستىسى, مەكتەپتىڭ اسحانالار مازىرىندە دارۋمەننىڭ قۇنارى مول تاعام تۇرلەرى مول بولۋى ءتيىس. سونىمەن بىرگە جاس وسكىندەردى تاماق ءىشۋ مادەنيەتىنە داعدىلاندىرۋ ءىسى دە ارتىقتىق ەتپەيدى. وسى رەتتە ماۋلەن ساعاتحان ۇلى اقتوبە وبلىسىنىڭ مەكتەپتەرىندە مەملەكەت-جەكەمەنشىك ارىپتەستىگى نەگىزىندە قۇرىلعان مەكتەپ اسحانالارى جۇيەسىنە وڭ باعا بەردى.
«نۇر وتان» پارتياسى قولعا العان باعدارلامالاردىڭ باستى ءبىر باعىتى «رۋحاني جاڭعىرۋ» دەپ اتالادى. قازىرگى كەزدە پارتيانىڭ باستاماسىنا سايكەس وتاندىق كىتاپحانالاردى جاڭعىرتۋدىڭ جانە ونى قازىرگى زامانعى ءبىلىم ورتالىقتارىنا اينالدىرۋدىڭ كەڭ اۋقىمدى باعدارلاماسى بەلگىلەنگەن. مۇنداعى باستى ەرەكشەلىك, اتالعان ءىستىڭ تەك قالالار مەن وبلىس ورتالىقتارىندا عانا ەمەس, سونىمەن بىرگە اۋىلدىق جەرلەردە دە جوعارى ستاندارتتارعا سايكەس بولۋى باستى نازارعا الىنۋىندا. وسىنداي بيىك تالاپتارعا جاۋاپ بەرە الاتىن رۋحاني ورتالىقتىڭ ءبىرى العا اۋدانىنا قاراستى بەستاماق اۋىلدىق كىتاپحاناسى بولىپ وتىر.
پارتيا توراعاسىنىڭ ءبىرىنشى ورىنباسارى ەلىمىزدىڭ شالعاي اۋداندارىنىڭ بىرىندە ورنالاسقان وسى اۋىلدىق كىتاپحانانىڭ قىزمەتىمەن تانىسىپ, مۇنداعى وڭ تاجىريبەلەردى ەلىمىزدىڭ بارلىق اۋىلدىق كىتاپحانالارىنا ۇلگى رەتىندە ۇسىنۋعا بولاتىنىن مالىمدەدى. اتالعان ەلدى مەكەندەگى كىتاپحانا «نۇر وتان» پارتياسى جوباسىنىڭ يگىلىگى مەن تيگىزگەن شاپاعاتى نەگىزىندە جاڭعىرتىلعانىن ايتتى.
سونىمەن بىرگە بەستاماق اۋىلىنداعى ورتا مەكتەپتەردىڭ جانىنان «مەكتەپتەردىڭ سپورت الاڭدارىن تۇبىرىمەن قايتا جاساقتاۋ» اتتى پارتيالىق جوبا شەڭبەرىندە قۇرىلعان ءبىلىم ورداسىنىڭ امبەباپ سپورت الاڭى دا الىستان مەنمۇندالايدى. «مىنە, تاعى ءبىر ۇلگى, تاعى ءبىر ونەگە وسى سپورت الاڭىنان كورىنەدى», دەپ جوعارى باعا بەردى پارتيا باسشىسىنىڭ ءبىرىنشى ورىنباسارى. اتالعان سپورت كەشەنى وبلىستا ىسكە اسىرىلىپ جاتقان «باقىتتى بالا» جوباسى اياسىندا تۇرعىزىلعان. مۇندا وقۋشىلاردىڭ فۋتبول, ۆولەيبول, باسكەتبول, گاندبول جانە تەننيسپەن ەمىن-ەركىن شۇعىلدانۋىنا بارلىق جاعداي جاسالعان. كەشەننىڭ تاعى ءبىر ەرەكشەلىگى, اتالعان سپورت تۇرلەرى بويىنشا ۇيىرمەلەر جۇمىس ىستەيدى.
«نۇر وتان» پارتياسىنىڭ بۇگىنگى كۇنى جاڭعىرتۋ اياسىندا قولعا العان جوبالارىنان بولەك مۇنىڭ الدىنداعى بۇرىنعى جوبالار دا قازىرگى كۇنگە دەيىن ساباقتاستىعىن ۇزبەي كەلەدى. سونىڭ ءبىرى – «كەدەرگىسىز كەلەشەك» جوباسى. بۇل جوبا مۇمكىندىگى شەكتەۋلى بالالار مەن ەرەسەكتەرگە قولداۋ كورسەتۋگە باعىتتالعان. پارتيا بەلگىلەگەن وسىنداي تالاپتار مەن مىندەتتەرگە تولىق جاۋاپ بەرە الاتىن اقتوبە وبلىسىنداعى «كۇنشۋاق» اتاۋىن يەلەنگەن بالالاردى ساۋىقتىرۋ لاگەرى بولىپ وتىر.
تەك ەلىمىزدە عانا ەمەس, سونىمەن بىرگە تمد اۋماعىندا بالاماسى جوق الەۋمەتتىك مەكەمە ءتۋابىتتى ءارتۇرلى دەرتتەرگە, اۋتيزمگە جانە داۋن سيندرومىنا شالدىققان بالالاردىڭ دەمالۋىنا جانە ەمدىك گيمناستيكامەن شۇعىلدانۋىنا ارنالعان. ءتىپتى مۇندا مۇگەدەك بالالاردىڭ انالارى بىرگە بولۋى ءۇشىن دە ءتيىستى جاعدايلار قاراستىرىلعان. م.اشىمباەۆ وبلىستاعى «كۇنشۋاق» ارنايى لاگەرى رەسپۋبليكانىڭ وزگە وڭىرلەرى ءۇشىن باستى بازالىق قۇرىلىم رەتىندە ادىستەمەلىك تاجىريبەنى بولىسە الاتىنىن ايتتى.
اقتوبە وبلىسىنا ساپارى اياقتالعان سوڭ ماۋلەن ساعاتحان ۇلىنا وڭىرگە جاساعان ساپار قورىتىندىسى بويىنشا ساۋال قويۋدىڭ ءساتى ءتۇستى.
– اقتوبە وبلىسىنا جاساعان ساپارىمىزدىڭ اياسىندا ءبىز اقتوبە وبلىسىنىڭ اكىمى, پارتيا وبلىستىق فيليالىنىڭ توراعاسى بەردىبەك ساپارباەۆ جەتەكشىلىك جاسايتىن فيليالدىڭ جۇمىسىمەن تانىسىپ, ولار ەلباسى تاپسىرمالارىن ورىنداۋدا ناتيجەلى جۇمىستار تىندىرعانىنا كوز جەتكىزدىك. وڭىردە تسيفرلاندىرۋ دەڭگەيى دە جوعارى. ءبىر سوزبەن ايتقاندا, «نۇر وتان» پارتياسى ساياسي كەڭەسىنىڭ وتىرىسىندا مەملەكەت باسشىسى قولداۋ بىلدىرگەن پارتيالىق جوبالاردىڭ ءبارى اقتوبە وبلىسىندا ويداعىداي ىسكە اسىرىلىپ جاتىر دەپ ايتۋعا بولادى. سونداي-اق بىرقاتار باعىتتار بويىنشا ايماقتا ىسكە اسىرىلعان وڭ تاجىريبەلەردى وزگە وڭىرلەرگە دە ەنگىزۋدىڭ بەرەرى مول دەپ ەسەپتەيمىن, – دەدى م.اشىمباەۆ.
ساپارىنىڭ سوڭىندا م.اشىمباەۆ «نۇر وتان» پارتياسىنىڭ اقتوبە وبلىستىق اكتيۆىمەن كەزدەسىپ, پارتيالىق جوبالاردى جۇزەگە اسىرۋدىڭ ءتيىمدى تەتىكتەرىن جان-جاقتى سارالاپ بەردى. سونداي-اق اقتوبەلىك نۇروتاندىقتارعا بىرقاتار تىڭ مىندەت جۇكتەدى.
تەمىر قۇسايىن,
«ەگەمەن قازاقستان»
اقتوبە
