وڭاشا كەزدەسۋدەن سوڭ ترامپ كەلىسسوز جالعاساتىنىن ايتىپ, كورەي تۇبەگىن يادرولىق قارۋسىز ايماق قىلۋدا تابىسقا جەتەتىنىنەن ءۇمىتتى ەكەنىن ءبىلدىردى. سونداي-اق ولار ۆاشينگتون مەن پحەنياننىڭ ارا-قاتىناسى جاقساراتىنىنا سەنىمدىلىك ءبىلدىردى. كيم چەن ىن بۇل ءسامميتتىڭ وتپەس بۇرىن كوپتەگەن كەدەرگىگە تاپ بولعانىن اتاپ ءوتتى.
دونالد ترامپ پەن سولتۇستىككورەيالىق كوشباسشى كيم چەن ىن يادرولىق قارۋسىزداندىرۋ پروتسەسىن باستايتىن بىرلەسكەن كەلىسىمگە قول قويدى. دەكلاراتسيادا مىنا ماسەلەلەر بەلگىلەندى:
- امەريكا قۇراما شتاتتارى مەن كحدر وسى ەلدەردىڭ حالىقتارىنىڭ بەيبىتشىلىك پەن گۇلدەنۋگە قول جەتكىزۋ نيەتىنە سايكەس ەلدەر اراسىنداعى قارىم-قاتىناستاردى ورناتۋعا ۇمتىلادى.
- امەريكا قۇراما شتاتتارى مەن كحدر كورەيا تۇبەگىندەگى بەيبىتشىلىك پەن تۇراقتىلىقتى ورنىقتىرۋعا كۇش جۇمسايدى.
- كحدر 2018 جىلعى 27 ساۋىردە قول قويىلعان پانۋمدجوم دەكلاراتسياسىنىڭ جانە يادرولىق قارۋدان كورەي تۇبەگىنىڭ تولىق بوساتۋ تۋرالى مىندەتتەمەسىن راستايدى.
- امەريكا قۇراما شتاتتارى مەن كحدر سوعىس تۇتقىندارىنىڭ جانە جوعالعان ادامداردىڭ قالدىقتارىن قايتارۋدى, سونىڭ ىشىندە انىقتالعان قالدىقتاردى قايتارۋدى مىندەتتەيدى.
وڭاشا كەزدەسۋدەن كەيىن ولارعا ەكى ەل دەلەگاتسياسىنىڭ وكىلدەرى قوسىلدى. اقش دەلەگاتسياسى قۇرامىندا مەملەكەتتىك حاتشى مايك پومپەو, پرەزيدەنت اكىمشىلىگىنىڭ باسشىسى دجون كەللي, پرەزيدەنتتىڭ ۇلتتىق قاۋىپسىزدىك ماسەلەلەرى بويىنشا كەڭەسشىسى دجون بولتون جانە اقش-تىڭ فيليپپيندەگى ەلشىسى سۋن كيم بار. كەڭەيتىلگەن قۇرامداعى سامميتتەن سوڭ د.ترامپ پەن كيم چەن ىن رەسمي مالىمدەمە جاساعان جوق.
كەزدەسۋدەگى باستى تاقىرىپ كحدر-نىڭ يادرولىق قارۋدان باس تارتۋى توڭىرەگىندە ءوربىدى. سولتۇستىك كورەيا سوڭعى ونجىلدىقتاردا ادام قۇقىقتارى شەكتەلگەندىكتەن, يادرولىق قارۋ الىپ, حالىقارالىق زاڭداردى بۇزعاندىقتان وقشاۋ ءومىر ءسۇرىپ كەلدى. ال اقش كحدر-دىڭ يادرولىق قارۋدان باس تارتقانىن, وقتۇمسىقتاردى ءۇشىنشى تاراپقا بەرگەنىن قالايدى. پحەنيان بۇل تالاپقا قارسى نە سۇرايتىنى بىلگىسىز. پحەنياننىڭ ورتالىق اقپارات اگەنتتىگى كەزدەسۋ وتپەس بۇرىن سامميتتە «كحدر مەن اقش اراسىنداعى قارىم-قاتىناستىڭ جاڭا دەڭگەيى, وڭتۇستىك كورەيامەن بايلانىس جانە يادرولىق قارۋسىزدانۋ» تاقىرىپتارى تالقىلاناتىنىن حابارلادى.
بىلتىر ۆاشينگتون پحەنيانعا قارسى سالىنعان سانكتسياداردى جويۋ تۋرالى ايتقان بولاتىن. ال جىل باسىندا كيم چەن ىن مەملەكەت ەكونوميكالىق دامۋعا باعىت الاتىنىن جەتكىزگەن ەدى.
ايتا كەتۋ كەرەك, اقش پەن كحدر باسشىلارىنىڭ العاشقى كەزدەسۋىنە دايىندىق كۇردەلى ءوتتى. بىرنەشە اي بۇرىن ترامپ پەن كيم ءبىر-ءبىرىن بالاعاتتاپ, ءتىپتى, يادرولىق سوعىس تۋرالى ايتىپ سەسكەندىرمەك بولدى. د.ترامپ بۇۇ مىنبەرىنەن كورەيانى تولىق قۇرتاتىنىن ايتسا, كيم چەن ىن ءوز كەزەگىندە امەريكالىق پرەزيدەنتتى «ەسۋاس, جىندى» دەپ بالاعاتتادى. مامىر ايىندا ترامپتىڭ كەڭەسشىسى دجون بولتون سولتۇستىك كورەيانى ليۆيامەن سالىستىرعاننان كەيىن سامميت مۇلدەم وتپەي قالۋى مۇمكىن ەدى. 24 مامىر كۇنى اقش پرەزيدەنتى كەزدەسۋدەن باس تارتىپ, 6 كۇننەن سوڭ ءسامميتتىڭ بولاتىنىن حابارلادى. كەزدەسۋ وتەتىنى بەلگىلى بولعاندا سولتۇستىك كورەيا پۋنگەريدەگى يادرولىق سىناق پوليگوندارىنا دەمونتاج جاسادى.
