ايتۋلى دودادا قازاق ەلى قۇراماسىنىڭ قانجىعاسى مايلاندى. ەكى كۇنگى سوزىلعان جارىس قورىتىندىسى بويىنشا جەرلەستەرىمىز 4 التىن, 6 كۇمىس جانە 2 قولا مەدالدى يەلەندى. اتاپ ايتساق, 110 مەترگە كەدەرگىلەر ارقىلى جۇگىرۋدە ارتەم سابلين مەن روكسانا وسپانوۆا, 10 شاقىرىمدىق سپورتتىق جۇرىستە ديانا ايدوسوۆا جانە ءۇش قارعىپ سەكىرۋدە يرينا ەكتوۆا الدىنا جان سالماي, التىن تۇعىرعا كوتەرىلدى.
ال الەكسەي گۋساروۆ (1 500 مەترگە جۇگىرۋ), ۆيتالي تەرەحين (10 شاقىرىمدىق سپورتتىق ءجۇرىس), الەكساندر پۋدوۆيننيكوۆ (400 مەترگە كەدەرگىلەر ارقىلى جۇگىرۋ) جانە انتون بودنار (بيىكتىككە سەكىرۋ), سۆەتلانا كۋزنەتسوۆا (400 مەترگە كەدەرگىلەر ارقىلى جۇگىرۋ) جانە رەگينا رىكوۆا (10 شاقىرىمعا سپورتتىق ءجۇرىس) كۇمىس مەدالدى ەنشىلەسە, سايد سۋلەيمانوۆ (1 500 مەترگە جۇگىرۋ) پەن دەنيس سوكولوۆ (بيىكتىككە سەكىرۋ) قولا جۇلدەگە قول سوزدى.
ەندى قازاقستان قۇراماسى 16-17 ماۋسىم ارالىعىندا قىرعىزستاننىڭ استاناسى – بىشكەكتە ۇزىندىققا سەكىرۋدەن ماسكەۋ وليمپياداسىنىڭ جەڭىمپازى تاتيانى كولپاكوۆانىڭ جۇلدەسى ءۇشىن جەڭىل اتلەتتەر اراسىندا وتەتىن حالىقارالىق تۋرنيرگە قاتىسادى. بۇل باسەكەدە ەل قۇراماسى ساپىندا 79 سپورتشى ونەر كورسەتەدى دەپ جوسپارلانۋدا.
عالىم سۇلەيمەن,
«ەگەمەن قازاقستان»
