شارانى اشقان قحر توراعاسى وتكەن جىلى ۇيىمعا تەڭ قۇقىلى مۇشە بولىپ قوسىلعان پاكىستان مەن ءۇندىستان باسشىلارىن العاش رەت وتىرىسقا قاتىسۋلارىمەن قۇتتىقتادى. سونىمەن قاتار ول بۇگىندە شىۇ الەمدىك دەڭگەيدەگى مارتەبەلى ۇيىمعا اينالعانىن جانە بارلىق مەملەكەتتەر كۇش بىرىكتىرگەندە زور تابىسقا جەتەتىندىگىن باسا ايتتى.
«شىۇ-عا توراعالىق اياسىندا ءبىز جىل بويى مىندەتىمىزدى ابىرويمەن اتقارىپ, ساياسي, ەكونوميكالىق, گۋمانيتارلىق, قاۋىپسىزدىك, سىرتقى بايلانىستار جانە ينستيتۋتسيونالدى قامتاماسىز ەتۋ سالالارىندا 200-دەن استام ءتۇرلى ءىس-شارا ۇيىمداستاردىق. شىۇ جۇمىسىندا ايتارلىقتاي ىلگەرىلەۋشىلىك بولدى. دەگەنمەن بۇل ىلگەرىلەۋشىلىكتەردى سىزدەردىڭ قولداۋلارىڭىزسىز اتقارۋ مۇمكىن ەمەس. سوندىقتان سىزدەرگە ريزاشىلىعىمدى بىلدىرەمىن», – دەپ اتاپ ءوتتى سي تسزينپين.
قىتاي باسشىسىنىڭ ايتۋىنشا, شىۇ-عا مۇشە مەملەكەتتەر تەرروريزم, سەپاراتيزم جانە ەكسترەميزمگە, ەسىرتكى ساۋداسىنا قارسى كۇش بىرىكتىرۋلەرى قاجەت. ءوزارا سەنىمدى ارتتىرىپ, تاتۋ كورشىلىك, دوستىق پەن ىنتىماقتاستىق ەرەجەلەرىن قاتاڭ ۇستانعان ءجون.
«اعىمداعى جىلى سىزدەردىڭ زور كومەكتەرىڭىزبەن, قولداۋلارىڭىزبەن شىۇ-عا توراعالىعىمىزدى اياقتاپ, سامميت وتكىزىپ جاتىرمىز. قىتاي تاراپى كونسترۋكتيۆتى جانە پراگماتيۆتى, دوستىق رۋحىندا وسى سامميتتە قول جەتكىزىلگەن ۋاعدالاستىقتى ۇيىمعا مۇشە مەملەكەتتەرمەن بىرگە جۇزەگە اسىرۋعا دايىن. الداعى ۋاقىتتا قىرعىز رەسپۋبليكاسىنىڭ ۇيىمعا توراعالىعىنا قولداۋ كورسەتەتىن بولامىز», – دەدى سي تسزينپين.
