وسىدان ەكى اي بۇرىن شاماسىندا, ناقتىراق ايتساق, 15 ساۋىردە ريددەر قالاسىندا ماس كۇيىندە كولىك تىزگىندەگەن اتالعان شاھار اكىمىنىڭ ورىنباسارى باۋىرجان قۇرمانباەۆ 19 جاستاعى ەۆگەني سمولنيكوۆتى قاعىپ, بوزبالا وقيعا ورنىندا كوز جۇمعان بولاتىن. كەيىن اكىم ورىنباسارىنىڭ جانىندا وسكەمەن قالاسىنىڭ اكىمى قۋات تۇماباەۆتىڭ دا بولعانى انىقتالعان-دى. بۇل وقيعا قوعامدا ۇلكەن رەزوننانس تۋدىرىپ, كولىك اپاتىنان قايتىس بولعان جىگىتىڭ اتا-اناسى مەن ريددەرلىك تۇرعىندار ءوز نارازىلىقتارىن ءبىلدىرىپ, وسكەمەن اكىمىنىڭ قىزمەتتەن كەتۋىن تالاپ ەتكەن-ءدى. قوس شەنەۋنىككە قاتىستى ءىس جاقىندا مەملەكەتتىك قىزمەت ىستەرى مەن سىبايلاس جەمقورلىققا قارسى ءىس قيمىل اگەنتتىگىنىڭ شىعىس قازاقستان وبلىسى بويىنشا دەپارتامەنتىنىڭ ادەپ كەڭەسىندە قارالىپ, ريددەر قالاسى əكىمىنىڭ ورىنباسارى ب.قۇرمانباەۆتى قىزمەتىنەن بوساتۋ, وسكەمەن قالاسى əكىمى ق.تۇماباەۆقا قىزمەتىنە تولىق ساي ەمەس دەگەن ەسكەرتۋ بەرۋ تۋرالى شەشىم شىعارىلعان ەدى.
6 ماۋسىمدا قۋات تۇماباەۆ ريددەردەگى جول-كولىك اپاتىنا بايلانىستى ارنايى مالىمدەمە جاسادى. «قۇرمەتتى وسكەمەندىكتەر, جۋىقتا بولعان جول-كولىك وقيعاسىنا بايلانىستى كوپتەگەن ماتەريالدار جينالدى. مەن جول اپاتىنا كۋا بولدىم, مارقۇمنىڭ تۋىستارىنا شىن كوڭىلمەن قايعىرىپ كوڭىل ايتامىن. وسىعان بايلانىستى مەنىڭ اينالامدا كوپتەگەن قاڭقۋ سوزدەر تاراي باستادى. مەملەكەتتىك قىزمەتتە جۇرگەندىكتەن مەنىڭ ءىس-ارەكەتتەرىم ەڭ الدىمەن قوعامداعى سەنىمدى كۇشەيتۋگە باعىتتالۋى ءتيىس. سول سەبەپتەن مەن تەرگەۋ جۇمىستارى كەزەڭىندە جالاقىم ساقتالمايتىن ەڭبەك دەمالىسىنا كەتۋ تۋرالى شەشىمگە كەلدىم», دەدى ق.تۇماباەۆ.
ازىرگە وسكەمەن قالاسى اكىمىنىڭ مىندەتىن قالا اكىمىنىڭ ورىنباسارى ولگا بۋلاۆكينا اتقاراتىن بولادى.
ازامات قاسىم,
«ەگەمەن قازاقستان»
وسكەمەن
