ورتالىقتىڭ اشىلۋ راسىمىنە قر مەملەكەتتىك حاتشىسى گۇلشارا ابدىقالىقوۆا, جوعارى وقۋ ورىندارىنىڭ باسشىلارى مەن ۇكىمەتتىك ەمەس ۇيىم وكىلدەرى قاتىسادى.
جوبا قازاق مەملەكەتتىك قىزدار پەداگوگيكالىق ۋنيۆەرسيتەتى مەن «دارا» جەكە قايىرىمدىلىق قورى جانە الماتى قالاسى ءبىلىم بەرۋ باسقارماسى اراسىنداعى ءوزارا كەلىسىمشارت نەگىزىندە جۇزەگە اسىرىلىپ وتىر.
ماقسات – ينكليۋزيۆتى ءبىلىم بەرۋ ۇستانىمدارىن ىسكە اسىرۋ, قازاقستانداعى ارنايى ءبىلىم بەرۋدى قولداۋ, مۇمكىندىگى شەكتەۋلى بالالاردى ءبىلىم بەرۋ رەسۋرستارىمەن قامتاماسىز ەتۋ جانە بولاشاق پەداگوگ ماماندارعا پراكتيكاعا باعدارلانعان ءبىلىم بەرۋدى دامىتۋ.
ورتالىقتا جارىمجان جانە مۇگەدەك سابيلەر مەن جەتكىنشەكتەر ەمدەلىپ, ەمدىك-ساۋىقتىرۋ شارالارى جۇرگىزىلەدى. بۇل قىزمەتتەردىڭ بارلىعى دا تەگىن كورسەتىلەدى. بالالارعا تيفلوپەداگوگ, لوگوپەد, دەفەكتولوگ, پسيحولوگ, دەنە شىنىقتىرۋ ماماندارى تەگىن قىزمەت جاسايدى. ورتالىقتا پەداگوگتارمەن قاتار ستۋدەنتتەر دە جاسوسپىرىمدەردىڭ تۇرمىستىق-الەۋمەتتىك داعدىلارىن قالىپتاستىرۋعا كومەكتەسىپ قانا قويماي, ولاردى بالاباقشا مەن مەكتەپكە دايىندايدى.
– قىزدار ۋنيۆەرسيتەتىنىڭ بازاسىندا اشىلعان «دارا» پەداگوگيكالىق-پسيحولوگيالىق تۇزەتۋ كابينەتى مۇمكىندىگى شەكتەۋلى بالالاردىڭ بويىندا ادامي قاسيەتتەردى قالىپتاستىرىپ, ولاردىڭ ومىرگە دەگەن قۇشتارلىق سەزىمدەرىن وياتۋ, وي-ورىستەرى مەن ويلاۋ قابىلەتتەرىن جەتىلدىرىپ, تولىققاندى ازامات دارەجەسىنە جەتكىزۋ ماقساتىندا جۇمىس جاساماق. الەۋمەتتىك ادىلدىك, تەڭدىك, ءوزارا سىيلاستىق پەن قامقورلىق تۋرالى نيەتتى تەك قانا مەملەكەت ەمەس, ازاماتتىق ورتانىڭ ءوزىنىڭ كوتەرۋى – قوعامىمىزدىڭ كەمەلدەنگەنىن, جاڭعىرعانىن كورسەتەدى, – دەيدى وقۋ ورنىنىڭ ءباسپاسوز جانە قوعاممەن بايلانىس ءبولىمىنىڭ باسشىسى جاندار اسان.
