«نۇر كەلبەتتى استانا»

كورمە ماقساتى – فەستيۆال قوناقتارىن ەلوردانىڭ 20 جىلدىق تاريxىمەن, تاريxي-مادەني كەرەمەتتەرىمەن, قوناقجاي xالقىمەن تانىستىرۋ.

اتالمىش كورمە اياسىندا شەت ەلدەردەن كەلگەن اتاقتى سۋرەتشىلەرمەن قوسا وتاندىق سۋرەتشىلەرگە جازدىڭ جايماشۋاق كۇندەرىندە جەكە قالاۋلارى بويىنشا استانا قالاسىنىڭ كورىكتى جەرلەرىن, ۇيلەسىم تاپقان ارحيتەكتۋرالىق انسامبلدەرىن, ونەر, ءبىلىم جانە مادەنيەت وشاقتارىن, ەلوردا تۇرعىندارىنىڭ وتباسىلىق دەمالىس ورىندارىن, قالالىق ساياباق, گۇلزار, سۋبۇرقاقتارىن نەمەسە وزگە دە كورىنىسى عاجاپ تابيعات اياسىن قاعاز بەتىنە تۇسىرەدى. اتالعان كوركەمسۋرەت كورمەسى استانا قالاسى قر ۇلتتىق مۋزەيىندە ۇيىمداستىرىلادى.

سونىمەن قاتار, قىلقالام شەبەرلەرى استانا قالاسىنىڭ وقۋشىلار سارايىندا كوركەمسۋرەت ونەرىنە قىزىعاتىن دارىندى تالىمگەرلەر ءۇشىن شەبەرلىك ساباقتارىن وتكىزەدى.

كورمە قارساڭىندا ءىس-شاراعا ارنايى شاقىرىلعان شەتەلدىك مەيماندارىمىزبەن سۇحبات جۇرگىزگەن ەدىك. ەندەشە, نازارلارىڭىزعا گوللانديالىق قىلقالام شەبەرى ديميتريس ۆويازوگلوۋدىڭ سۇحباتىن ۇسىنامىز.

كوركەمسۋرەت ونەرىنە قاشاننان بەرى قىزىعۋشىلىعىڭىز ارتا باستادى؟

* بەينەلەۋ ونەرىمەن العاشقى تانىستىعىم 6 جاسىمدا ءوتتى. وعان سەبەپ - ونەر جايىنداعى كىتاپتار, مۋزەيدەگى كارتينالار, شىركەۋدەگى ءتۇرلى بەينەلەر مەن مەكتەپتەگى بەينەلەۋ ونەرى ءپانى. مەن اتا-اناممەن دە كوركەمسۋرەت كورمەلەرىنە ءجيى بارىپ تۇراتىنمىن. ونشا تۇسىنە قويماسام دا, قىزىعۋشىلىق تانىتىپ, سۇراق قويىپ, سۋرەتشىنىڭ نە دەگىسى كەلگەنىن ۇعىنۋعا تىرىساتىنمىن.

العاشقى ونەر تۋىندىسىن قاي كەزىڭىزدە جارىققا شىعاردىڭىز؟

* العاش رەت ءوزىمدى سۋرەتشى رەتىندە جاستايىمدا سەزىندىم. بىردە جول-كولىك وقيعاسىنىڭ كۋاسى بولىپ, كەنەت كورگەنىمدى قاعاز بەتىنە بەينەلەگىم كەلدى, وتيكەنى ءدال سول مەزەتتە كەۋدەمدى ءبىر ەرەكشە سەزىم كەرنەگەندەي بولدى. نەگىزى قانداي سەزىمدە بولعانىمدى ءالى كۇنگە دەيىن سوزبەن ايتىپ جەتكىزۋ مۇمكىن ەمەس. مەنىڭشە, كىشكەنتاي بالالار – ناعىز ۇلى سۋرەتشىلەر.

بەينەلەۋ ونەرىنىڭ قاي اعىمىن ەرەكشە ۇناتاسىز؟

* شىنى كەرەك, ماعان كادىمگى يمپرەسسيونيزم, رەاليستىك اعىم ۇنايدى, سونداي-اق, زاماناۋي ستيلدەگى تۋىندىلار شابىت بەرەدى. بۇگىندە بەينەلەۋ ونەرىن اركىم وزىنشە تۇسىنەدى. سوندىقتان «مىنانىڭ تۋىندىسى جاقسى, ال مەنىكى ودان دا كەرەمەت» دەپ, باعا بەرۋ قيىن. ونەر ءتۇرلى وبرازدا بەينەلەنەدى, سول سەبەپتى, مەن كەز-كەلگەن تۋىندىنى ەرەكشە باعالايمىن.

«نۇر كەلبەتتى استانا» شاراسىنان نە كۇتەسىز جانە مەرەيتوي قارساڭىندا ەلورداعا قانداي لەبىز بىلدىرەسىز؟

* بيىل قازاقستاننىڭ ەلورداسى – استانا قالاسىندا وتەتىن ءىى حالىقارالىق فوتوفەستيۆالىنەن ۇمىتىلماس اسەر الاتىنىما سەنىمدىمىن. استانانىڭ 20 جىلدىعى قارساڭىندا جاس بولسا دا, وركەندەپ دامىپ كەلە جاتقان شاھاردى ءوز كوزىممەن كورەتىنىمە وتە قۋانىشتىمىن. استاناعا تەك جاڭا تابىستار مەن ساتتىلىك تىلەيمىن. وركەنيەتى قارىشتاعان ونەر مەن مادەنيەت ورداسىنا اينالسىن