ەلىمىزدىڭ باس قالاسى – استانانىڭ جيىرما جىلدىق مەرەكەسىنە وراي قازاقستان رەسپۋبليكاسىنىڭ مادەنيەت جانە سپورت مينيسترلىگى ماۋسىمنىڭ 12-ءشى جۇلدىزىندا "نۇر كەلبەتتى استانا" اتتى حالىقارالىق كوركەمسۋرەت فەستيۆالىن ۇيىمداستىرادى. ءىس-شارا اياسىندا وتاندىق سۋرەتشىلەرمەن قوسا برازيليا, اقش, ەۋروپا, رەسەي جانە ازيانىڭ جاپونيا, ءۇندىستان سىندى ەلدەرىنەن ارنايى قىلقالام شەبەرلەرى شاقىرىلادى. ولاردىڭ قاتارىندا ۇلىبريتانيانىڭ كورولدىك ونەر قاۋىمىنىڭ مۇشەسى الەكساندرا كوننور, جاپونيانىڭ اكۆارەلمەن بەينەلەۋ ونەرىنىڭ شەبەرى اكيرا مۋراتا, برازيلياداعى پانامەريكا ونەر مەكتەبىنىڭ تالىمگەرى جيزەل ۋليسس, ء ۇندىستاننىڭ زاماناۋي كوركەمونەر شەبەرى رام ۆيرانيان, اقش ۇلتتىق ونەر گرانتىنىڭ يەگەرى ارتەم ميرولەۆيچ, گوللانديانىڭ رەتروسپەكتيۆالىق كوركەمونەر شەبەرى ديميتريس ۆويازوگلوۋ, سونىمەن قاتار, گۇلميرا تەلعوزيەۆا, باقتىگەرەي تەلەۋباي, امانگەلدى كەنەنباەۆ, نۇربازار قوجين, قايىر ورازعاليەۆ, اينابەك وسپانوۆ, تىلەۋجان باتانوۆ سىندى ايگىلى وتاندىق سۋرەتشىلەر دە بار.
الەمدىك قىلقالام شەبەرلەرىن ءبىر ونەر ورتاسىنا جيناعان كوركەمونەر فەستيۆالى قارساڭىندا شەتەلدىك مەيماندار دا ءوز ويلارىن ءبىلدىردى. ماسەلەن, ءۇندىستاننان ات باسىن بۇرعان اكۆارەلمەن بەينەلەۋ ونەرىنىڭ شەبەرى رام ۆيرانيان: «20 جىل نەگىزىندە كوپ ۋاقىت ەمەس. الايدا, وسى مەرزىم ىشىندە ەلوردانىڭ بيىك بەلەستەردى باعىندىرعانى تاڭداي قاقتىرادى. كوركەمسۋرەت فەستيۆالىنەن تەك جارقىن ساتتەر مەن جاعىمدى اسەر الاتىنىما سەنىمدىمىن».
برازيليالىق سۋرەتشى جيزەل ۋليسس: «استانادان العان العاشقى اسەرىم كەرەمەت: حالقى قوناقجاي, قالالارىڭىز تازا ءارى زاماناۋي. استانانىڭ 20 جىلدىعى قارساڭىندا جاس بولسا دا, وركەندەپ دامىپ كەلە جاتقان شاھاردى ءوز كوزىممەن كورگەنىمە وتە قۋانىشتىمىن. استاناعا تەك جاڭا تابىستار مەن ساتتىلىك تىلەيمىن. وركەنيەتى قارىشتاعان ونەر مەن مادەنيەت ورداسىنا اينالسىن».
ەلوردانىڭ 20 جىلدىق تاريxىمەن, مادەني كەرەمەتتەرىمەن, قوناقجاي xالقىمەن تانىستىرۋعا باعىتتالعان كوركەمسۋرەت مەرەكەسى اياسىندا وتاندىق جانە شەت ەلدەردەن كەلگەن اتاقتى سۋرەتشىلەر جازدىڭ جايماشۋاق كۇندەرىندە جەكە قالاۋلارى بويىنشا استانا قالاسىنىڭ كورىكتى جەرلەرىن قىلقالامدارىنا ارقاۋ ەتەدى. اتالعان كوركەمسۋرەت فەستيۆالى استانا قالاسى قر ۇلتتىق مۋزەيىندە ۇيىمداستىرىلادى. سونداي-اق, قىلقالام شەبەرلەرى استانا قالاسىنىڭ وقۋشىلار سارايىندا جانە قازاق ۇلتتىق ونەر ۋنيۆەرسيتەتىنىڭ قابىرعاسىندا كوركەمسۋرەت ونەرىنە قىزىعاتىن دارىندى تالىمگەرلەر ءۇشىن شەبەرلىك ساباقتارىن وتكىزەدى.
مادەنيەت جانە سپورت ءمينيسترى ارىستانبەك مۇحامەدي ۇلى: «...سۋرەتتى سوزبەن ايتىپ جەتكىزۋ قيىن, ونى تەك كوزبەن كورۋ كەرەك» – دەمەكشى, وسى كورمەگە ارنايى التىن ۋاقىتتارىن قيىپ, الەم ەلدەرىنەن كەلگەن سۋرەتشىلەر استانانىڭ ەڭ اسەم جەرلەرىن قىلقالامدارىنا ارقاۋ ەتەتىن بولادى. دارالانعان تالانتتار, سىزدەردى كيەلى قازاق توپىراعىندا كەزدەستىرگەنىمىزگە ريزاشىلىعىمىزدى بىلدىرەمىن. سىزدەردەردىڭ سىرعا تولى سۇلۋ كارتينالارىڭىز كەز-كەلگەندى تاڭداي قاقتىرماي قويماس. ۇزدىك تۋىندىلارىڭىز ۇلتتىق مۋزەيى قورىندا ماڭگى ساقتالماق. الداعى ۋاقىتتا شىعارماشىلىق شابىت, تەلەگەي تابىس, تاۋداي تالاپ تىلەيمىن» – دەپ, ءوز ىزەتىن ءبىلدىردى.
اتالعان فەستيۆال بارىسى ماۋسىم ايىنىڭ سوڭىنا دەيىن قر ۇلتتىق مۋزەيىندە جالعاسىن تابادى. ەندەشە, بارشا ونەرسۇيەر قاۋىمدى شەتەلدىك كوركەمسۋرەت شەبەرلەرىن شابىتتاندىرعان استانانى وزگە قىرىنان تاماشالاۋعا شاقىرامىز.
