ورتالىقتىڭ سالتاناتتى تۇساۋكەسەر راسىمىنە پارتيانىڭ وبلىستىق فيليالى توراعاسىنىڭ ءبىرىنشى ورىنباسارى قاديشا وسپانوۆا مەن شاحتينسك قالالىق فيليالىنىڭ توراعاسى ءارى وسى شاھاردىڭ اكىمى سەرجان ايماقوۆ, قالا باسشىلىعى, جەرگىلىكتى ءماسليحات دەپۋتاتتارى, «جاس وتان» جاستار قاناتىنىڭ مۇشەلەرى, مادەنيەت قىزمەتكەرلەرى مەن بيزنەس وكىلدەرى قاتىستى. ايتا كەتۋ كەرەك, جاڭا ورتالىقتى اشۋعا بيۋدجەتپەن بىرگە جەكە دەمەۋشىلەر دە قول ۇشىن بەرگەن.
ەل تاۋەلسىزدىگىنىڭ العاشقى جىلدارىندا اشىلعان كىتاپحانانىڭ قورىندا قازىر 300 مىڭعا جۋىق كىتاپ بار ەكەن. ەندى مۇندا ءتۇرلى ادەبيەتتەرمەن, وقۋ قۇرالدارىمەن قاتار, كەز كەلگەن اقپاراتتى ونلاين-رەجىمدە الۋعا مۇمكىندىك جاسالعان. ورتالىق ينتەرنەت جەلىسىمەن, تسيفرلى تەحنولوگيالارمەن, قاجەتتى جيھازدارمەن تولىقتاي قامتاماسىز ەتىلگەن. كەلۋشىلەر ءۇشىن مۇندا قاجەتتى اقپارات الىپ قانا قويماي, ءوزارا وي-پىكىر, تاجىريبە الماسۋعا, شىعارماشىلىق ەڭبەكپەن اينالىسۋعا دا مۇمكىندىك زور. بيىل قاراعاندى وبلىسىنىڭ كىتاپحانالارىندا وسىنداي تاعى 18 ورتالىق اشۋ جوسپارلانعان.
– تەحنولوگيالاردىڭ كەلەشەگى زور. سوندىقتان يننوۆاتسيالىق ءبىلىم الۋعا مۇمكىندىك جاساۋ – مەملەكەت ساياساتىنىڭ ماڭىزدى باعىتتارىنىڭ ءبىرى. «قازاقستان كىتاپحانالارى – زاماناۋي ءبىلىم ورتالىقتارى» جوباسىنىڭ شەڭبەرىندە قازىر ەلىمىزدە كىتاپحانالار وسىنداي ۋاقىت تالابىنا ساي ءبىلىم ورتالىقتارىنا اينالدىرىلىپ, تيىسىنشە جابدىقتالىپ, ەلەكتروندى ۇلگىگە كوشىرىلۋدە, – دەيدى قاديشا وسپانوۆا.
بۇل ورتالىق كىتاپتىڭ, ءتۇرلى ادەبيەتتەردىڭ قادىرىن ارتتىرىپ, كوپشىلىكتىڭ ءوز ۋاقىتىن ءتيىمدى پايدالانۋىنا مول سەپتىگىن تيگىزەرى ءسوزسىز. تەحنولوگيالىق جەتىستىكتەردى ادام يگىلىگىنە ءتيىمدى پايدالانۋدىڭ ءبىر ۇلگىسى دە وسى بولماق.
قايرات ءابىلدا,
«ەگەمەن قازاقستان»
قاراعاندى
