تاريحي وتاندى تاڭداعاندار
ماروككو قۇراماسىنىڭ 61 پايىزى ەۋروپادا تۋىپ-وسكەندەر ەكەن. بۇل جونىنەن الەم چەمپيوناتىنا قاتىساتىن قۇرامالار ىشىندە تەك سەنەگال عانا باسەكەلەس بولا الادى. كوماندانىڭ نەگىزگى جۇلدىزى ءارى كاپيتانى – مەحدي بەناتيا. ول «يۋۆەنتۋستىڭ» نەگىزگى ورتالىق قورعاۋشىلارىنىڭ ءبىرى. يتاليا كۋبوگىنىڭ فينالىندا «ميلان» قاقپاسىنا 2 گول سوعىپ, كومانداسىنا جەڭىس سىيلادى. بەناتيا ستاندارتتى جاعدايلاردا ايىپ الاڭىندا وتە قاۋىپتى ويىنشى. ول باسپەن گول سوعۋدى جاقسى مەڭگەرگەن تاسقامال قورعاۋشى. سونىمەن قاتار وڭ قاپتالدا وينايتىن قورعاۋشى اشراف حاكيمي دە توپ كلۋبتا ونەر كورسەتەدى. ول بيىل «رەال» مادريد ساپىندا بىرنەشە ويىندا الاڭعا شىقتى. سونىمەن قاتار كەزىندە دۇركىرەگەن مۋباراك بۋسسۋفا دا ۇلتتىق قۇرامانىڭ تاجىريبەلى ويىنشىلارىنىڭ ءبىرى.
ماروككونىڭ باس باپكەرى ەۆرە رەنار 2016 جىلى قازاقستانعا كەلگەن. كەلگەندەگى باستى شارۋاسى قازاقستان فۋتبول فەدەراتسياسىمەن كەلىسىمگە كەلۋ بولاتىن. فرانتسۋز مامانى ءبىزدىڭ ۇلتتىق قۇرامانىڭ تىزگىنىن ۇستاي جازداعان. الايدا ەكى تاراپ ورتاق كەلىسىمگە كەلە المادى.
اڭىزعا اينالعان مۇستافا حادجي
ماروككو الەم چەمپيوناتىنا 4 رەت قاتىسقان. بۇل جاعىنان ولار افريكادا كامەرۋننان كەيىنگى ورىندا. سونىمەن قاتار «اتلاس ارىستاندارى» مۋنديالدا پلەي-وفف ساتىسىنا شىققان العاشقى افريكالىق كوماندا. 1986 جىلى ولار مەكسيكا جەرىندە ۇلكەن سەنساتسيا جاسادى. انگليا, پولشا, پورتۋگاليا قۇرامالارىمەن ءبىر توپتا بولىپ, جەڭىمپاز اتانىپ شىقتى. سوڭعى ويىندا «ارىستاندار» پورتۋگاليالىقتاردى 3:1 ەسەبىمەن جەڭدى. ءدال سولارمەن بۇل جولى دا ءبىر توپقا ءتۇسىپ وتىر. ودان كەيىن 1994 جىلى اقش-تاعى دودادا توپتىق كەزەڭنەن ءارى اسا المادى. 1998 جىلى ماروككو فرانتسياعا مىقتى اياقدوپشىلارمەن باردى. بىراق ساتتىلىك جەتىسپەي, پلەي-وفف كەزەڭىنە شىقپاي قالدى. قۇرامادا سول شاقتا اتى اڭىزعا اينالعان مۇستافا حادجي بولدى. 1998 جىلى افريكا قۇرلىعىنىڭ ۇزدىك ويىنشىسى اتاعىن العان مۇستافانى بۇكىل ماروككو الاقانىندا ۇستايتىن. بۇل ەلدەن بۇرىن-سوڭدى مۇنداي اتاقتى ءارى شەبەر ويىنشى شىقپاعان ەدى. پورتۋگاليا, انگليا, يسپانيا چەمپيوناتتارىندا ويناعان حادجي قازىر باس باپكەر رەناردىڭ كومەكشىسى.
الداعى ماقسات – الپاۋىتتارعا ازۋ كورسەتۋ
ماروككو قۇراماسىنىڭ توپتاعى جاعدايى قيىن. قارسىلاستارىنىڭ بارلىعى كىلەڭ «سەن تۇر, مەن اتايىن» ۇجىمدار. يسپانيا مەن پورتۋگاليا «ۆ» توبىنىڭ باستى فاۆوريتتەرى. الايدا الەمدىك مۋنديالدا وسال قۇراما بولمايتىنى انىق. بارلىعى ءوز قۇرلىعىنىڭ ۇزدىكتەرى. سوندىقتان دا يران قۇراماسىن دا ەسەپتەن شىعارۋعا استە بولماس. ماروككولىقتار العاشقى ماتچتا ءدال وسى مۇسىلمان باۋىرلارىمەن كەزدەسەدى. ماتچ 15 ماۋ-
سىم كۇنى سانكت-پەتەربۋرگتە وتەدى. ودان كەيىن ەكتور كۋپەر شاكىرتتەرى كريشتيانۋ رونالدۋ باستاعان پورتۋگاليامەن, سوڭعى تۋردا يسپانيامەن كەزدەسەدى. بىرىنشىلىككە كەلگەننەن كەيىن بار ونەردى ورتاعا سالىپ, ەل نامىسى ءۇشىن جانىمىزدى ايامايمىز دەپ وتىرعان افريكالىقتار پلەي-وفف كەزەڭىنە شىعۋدى ماقسات تۇتادى. يراندى جەڭگەننەن كەيىن 2 الپاۋىتتىڭ ءبىرىن سۇرىندىرسەك دەيدى.
ءبىر قىزىعى, الەم چەمپيوناتىنداعى 32 قۇرامانىڭ ىشىندە وسى توپتاعى كوماندالار ءبىر-بىرىنە وتە جاقىن ورنالاسقان مەملەكەتتەر ەكەنىن دە ايتا كەتەيىك. سوندىقتان دا بۇل توپتىڭ ويىندارى جانكۇيەر كۇتپەگەن ناتيجەلەرمەن ءورىلىپ جاتسا ەش تاڭعالمايمىز. ءبىر انىعى, ايتەۋىر مۋنديال تاريحىندا سەنساتسياسىز توپ بولمايدى. بالكىم, وسى توپتاعى قۇرامالار كورەرمەننىڭ كوزايىمى بولىپ قالار؟!
ەرمۇحامەد ماۋلەن,
«ەگەمەن قازاقستان»
