مادەنيەت جانە سپورت مينيسترلىگى جانە ماڭعىستاۋ وبلىسى اكىمدىگىنىڭ قولداۋىمەن قازاقستان رەسپۋبليكاسى اۆتوموتوسپورت فەدەراتسياسىنىڭ ۇيىمداستىرۋىمەن حالىقارالىق اۆتوموبيل فەدەراتسياسىنىڭ FIA راللي رەيد الەم كۋبوگىنىڭ كەزەڭى ماڭعىستاۋدا 27 مامىر مەن 2 ماۋسىم ارالىعىندا وتەدى.
– ەلباسىمىز نۇرسۇلتان ءابىش ۇلى نازارباەۆ «سپورت – بەيبىتشىلىك پەن تاتۋلىقتىڭ, ىنتىماقتاستىق پەن تىلەكتەستىكتىڭ سيمۆولى» دەپ اتاپ وتكەندەي, سپورت – قوعامنىڭ تىرەگى! ونى ءاربىر سپورتشى جۇرەگىمەن تۇسىنە ءبىلۋ قاجەت. سوندىقتان دا سالاماتتى ءومىر سالتىن ۇستاناتىن قازاقستاندىقتار جىلدان-جىلعا كوبەيىپ كەلەدى. ونى قۇرلىق, الەم جانە وليمپيادا جارىستارىندا قازاقستاندىق سپورتشىلاردىڭ باعىندىرعان بەلەستەرىنەن ناقتى كورۋىمىزگە بولادى, – دەدى ماڭعىستاۋ وبلىسىنىڭ اكىمى ەرالى توعجانوۆ اۆتوالاماننىڭ اشىلۋ سالتاناتىندا.
«راللي رەيد الەم كۋبوگى» كەزەڭى بويىنشا وتكىزىلىپ جاتقان بايقاۋدا 13 ەلدەن 64 اۆتوشاباندوز چەمپيون اتاعى ءۇشىن باق سىناسسا, قازاقستان اتىنان 7 جۇيرىك قاتىسۋدا.
التى كەزەڭنەن تۇراتىن سايىستا قاتىسۋشىلار 2500 شاقىرىم جولدى ەڭسەرۋى قاجەت. ءبىرىنشى كەزەڭدە ولار اقتاۋ قالاسىنان شىعىپ, وڭتۇستىكتى بەتكە الىپ 210 شاقىرىم وڭتۇستىك-شىعىستا ورنالاسقان كەندىرلى شيپاجايىنا بارادى. ەكىنشى كۇنى سەنەك ەلدى مەكەننىڭ اينالاسىنداعى اينالما ۋچاسكەسى ارقىلى ءشول دالامەن شىعىسقا, ءۇشىنشى كەزەڭىنىڭ باعىتى كەندىرلىدەن شىعىسقا قاراي جول جۇرەدى. ءتورتىنشى كەزەڭى جاڭاوزەن قالاسى اينالاسىندا وتەدى, سودان كەيىن قاتىسۋشىلار اقتاۋ قالاسىنا ورالادى. ەكىنشى قورىتىندى كەزەڭى اقتاۋ قالاسىنان سولتۇستىككە قاراي باعىتتا وتەدى. اياقتاۋ كەزەڭىندە سپورتشىلار كاسپي تەڭىزى جاعالاۋ سىزىعىمەن ءوتىپ, 2 ماۋسىمدا اقتاۋ قالاسىندا جاعالاۋ الاڭىندا اياقتادى.
«راللي قازاقستان-2018» ۇلتتىق سىنىپقا جانە T1, T2, T3 اۆتوكولىكتەردىڭ كاتەگورياسىنا ارنالعان. ناقتىراق ايتساق, ت1 – جاقسارتىلعان سەريالىق اۆتوموبيلدەر, ت2 – سەريالىق مودەلدەردەن ەرەكشەلىگى بار جەڭىل اۆتوموبيلدەر بولسا, ت3 – جەڭىل اۆتوموبيلدەر.
«راللي قازاقستان-2018» جارىسىنا FIA الەم كۋبوگىنىڭ كوشباسشىسى ياكۋب پشيگونسكي, داكار چەمپيونى فرانتسيالىق ليۋك الفاند, Africa Eco Race-2018 راللي رەيد جەڭىمپازى رەسەيلىك شاباندوز ۆلاديمير ۆاسيلەۆ, بيىل وتكەن ابۋ دابي الەم كۋبوگى كەزەڭىنىڭ جەڭىمپازى چەحيالىق مارتين پروكوپ, سونداي-اق راللي قازاقستان كەزەڭىنىڭ جانە الەم كۋبوگىنىڭ 2017 جىلعى يەگەرى اۆتوشاباندوز كاتار ناسەر سالەح ءال-اتتيا سىندى تاجىريبەلى دە تانىمال سپورتشىلار قاتىسادى.
– بيىلعى ءرالليدىڭ باعىتىنا وزگەرىستەر ەنگىزۋ ءۇشىن كوپ ەڭبەكتەندىك. اۆتوسپورت الەمىندەگى تانىمال سپورت ءتۇرىنىڭ ءبىرى جانە جۇرتشىلىقتىڭ, اسىرەسە جاستاردىڭ قىزىعۋشىلىعىنا يە – ءرالليدىڭ «ويلى-قىرلى» ماڭعىستاۋ جەرىندە ءوتىپ جاتقانىنا وتە قۋانىشتىمىز. ماڭعىستاۋدىڭ كەرەمەت پەيزاجدارى جانە بىرەگەي تابيعي كەشەندەرى بارلىق دەڭگەيدەگى قاتىسۋشىلارعا كۇردەلى سىناق جاساي الاتىن بولادى, – دەدى امسف پرەزيدەنتى مارات ابىقاەۆ.
دالا ءتوسىن قۇيىنداتا جۇيتكىر تەمىر تۇلپارلار مەن ولاردى تىزگىندەگەن ەرلەرگە ماڭعىستاۋلىقتار اق جول تىلەپ جولعا سالدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
