پرەزيدەنت تاپسىرماسى اياسىندا ەلىمىزدە پەداگوگ قىزمەتكەرلەرگە ارنالعان ۇلتتىق بىلىكتىلىك تەستىلەۋ ناۋقانى 26-28 مامىر ارالىعىندا ءوتتى. ۇلتتىق تەستىلەۋ ورتالىعىنان كەلىپ تۇسكەن اقپاراتقا سۇيەنسەك, رەسپۋبليكا بويىنشا 60 476 مۇعالىم ۇلتتىق بىلىكتىلىك تەستىلەۋدەن وتۋگە ءوتىنىش ءبىلدىردى. وسى ورايدا پەداگوگتاردىڭ وي-پىكىرلەرىن ءبىلۋ ماقساتىندا استانا قالاسىنداعى تەستىلەۋ ورتالىعىنا بارعان ەدىك.
رايىمبەك باتىر اتىنداعى №50 «قازعارىش» مەكتەپ-ليتسەيى تاريح ءپانىنىڭ مۇعالىمى سايلاۋ شايكەنوۆ جالپى تەستىلەۋ بارىسىنىڭ قيىن بولماعاندىعىن ايتادى. «دەڭگەيلىك كۋرستاردان وتپەگەن, جاڭا جۇيەمەن تانىس ەمەس مۇعالىمدەر ءۇشىن ۇلتتىق بىلىكتىلىك تەستىلەۋدىڭ «پەداگوگيكا, وقۋ ادىستەمەسى» بلوگىن ءوتۋ قيىندىق تۋعىزاتىنى راس. الايدا, وسى بلوكتىڭ ارقاسىندا پەداگوگتار وزدەرىن جەتىلدىرە تۇسۋگە ۇمتىلادى. جالپى, جەتىك مەڭگەرگەن ءپان بويىنشا تەستىلەۋدى تاپسىرا الماۋ مۇمكىن ەمەس. اكادەميالىق تۇرعىدا دايىندىعى بار مۇعالىمدەرگە قيىندىق تۋعىزبايدى. بىلىكتىلىكتى ارتتىرا وتىرىپ, جالاقىمىزدى دا كوتەرۋگە مۇمكىندىك بار», دەدى ول.
ال №70 مەكتەپ-ليتسەيى بيولوگيا ءپانىنىڭ مۇعالىمى سەرىكقايشا ساعاتبەكوۆا ساباق بەرەتىن ءپانى بويىنشا بىلىمىنە سەنىمدى بولعانىنا بايلانىستى تەستىلەۋ كەزىندە قوبالجىماعانىن ايتادى. «اركىم ءوز قالاۋىمەن تەستىلەۋگە قاتىسىپ جاتىر. تەستىلەۋدىڭ بارلىق پەداگوگتار ءۇشىن كەزەكتى جانە ۋاقىتىنان بۇرىنعى اتتەستاتتاۋ بولىپ قالا بەرەتىنى قۋانتادى. ياعني مۇعالىمدەردىڭ تىلەكتەرىنە بايلانىستى. ەگەر جاڭا وقۋ جىلىنان باستاپ بىلىكتىلىگىڭ ءۇشىن قوسىمشا تولەماقى العىڭ كەلسە, تەستىلەۋگە قاتىس, ال بۇرىنعى بىلىكتىلىگىڭ بويىنشا جۇمىس ىستەي بەرگىڭ كەلسە ءوز قالاۋىڭ. تەست سۇراقتارىنا جاۋاپ بەرۋ بارىسىندا ءبىر نەمەسە بىرنەشە دۇرىس جاۋاپتى تاڭداۋ اسا قيىنعا سوققان جوق. الايدا بەرىلگەن ءماتىن شەڭبەرىندە مۇعالىمنىڭ اكادەميالىق جانە ادىستەمەلىك الەۋەتىن بىلۋگە باعىتتالعان ءمان-ماتىندىك تاپسىرمالار بويىنشا ايتارلىقتاي ۋاقىت جۇمساپ, كوپ ويلانۋعا تۋرا كەلدى», دەدى س.قابىلعازىقىزى.
ەلورداداعى №22 مەكتەپ-گيمنازياسىنىڭ باستاۋىش سىنىپ مۇعالىمى, 25 جىلدىق ەڭبەك ءوتىلى بار جوعارى ساناتتى ۇستاز ايگۇل سادىرباەۆانىڭ پايىمداۋىنشا, ءوز بىلىكتىلىگىن ۇنەمى ارتتىرىپ وتىراتىن مۇعالىمدەر ءۇشىن بۇل ورىندى سىناق ءارى كەمشىن تۇستاردى تولتىرۋ ءۇشىن زور مۇمكىندىك. ول ۇلتتىق بىلىكتىلىك تەستىلەۋدىڭ وتكىزىلۋ ۋاقىتى وقۋ جىلىنىڭ قورىتىندىسى شىعارىلعان ۋاقىتقا سايكەس قولايلى بولعاندىعىن, جاڭا فورماتتاعى تەستىلەۋ سۇراقتارىنىڭ ۇلگىسىمەن «ەگەمەن قازاقستان», ء«بىلىمدى ەل – وبرازوۆاننايا سترانا» گازەتتەرى جانە ۇلتتىق تەستىلەۋ ورتالىعىنىڭ ينتەرنەت رەسۋرستارىندا تانىسقانىن ايتادى.
ال №64 مەكتەپ-ليتسەيىنىڭ بيولوگيا ءپانىنىڭ مۇعالىمى اسەل مولدابەكقىزى «پەداگوگ-مودەراتور» ساناتىنا ءوتۋ ءۇشىن ءوز باعىن سىنادى. ول وسى تەستىلەۋدى وقۋ جىلىنىڭ سوڭىندا ءوز-وزىنە بەرگەن ەسەپ دەپ باعالايدى. «اتتەستاتتاۋدان وتكەن مۇعالىمدەرگە «پەداگوگ-مودەراتور», «پەداگوگ-ەكسپەرت», «پەداگوگ-زەرتتەۋشى», «پەداگوگ-شەبەر» دەگەن جاڭا كاتەگوريالار بەرىلەدى دەگەن جاڭالىقتى قۋانىشپەن قارسى الدىم» دەيدى ءا.مولدابەكقىزى.
№79 مەكتەپ-ليتسەيى تاريح ءپانىنىڭ مۇعالىمى, ءبىلىم بەرۋ سالاسىندا 24 جىلعا جۋىق ەڭبەك ەتكەن مارال بەرماعانبەتوۆ بۇگىندە ۇستازدار قاۋىمى جاڭارتىلعان مازمۇنداعى وقۋ باعدارلاماسى شەڭبەرىندە ءبىلىم بەرىپ جاتقانىن, مۇعالىمدەردى اتتەستاتتاۋدان وتكىزۋدىڭ جاڭا فورماتتاعى جۇيەسى شەڭبەرىندەگى تەستىلەۋ سۇراقتارى ورىندى ءارى ساۋاتتى قۇرىلعانىن جەتكىزدى. ال №37 ورتا مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى, 20 جىلدىق ەڭبەك ءوتىلى بار جوعارى ساناتتى ۇستاز ارمان ءازىمحان ۇلى ۇلتتىق بىلىكتىلىك تەستىلەۋىنىڭ ۇتىمدى تۇستارىمەن ءبولىستى. تەستىلەۋگە بولىنگەن 3 ساعات 20 مينۋت سۇراقتارعا تولىق جاۋاپ بەرۋگە جەتكىلىكتى. ارينە, ماتەماتيكا, فيزيكا, حيميا, ينفورماتيكا پاندەرى بويىنشا 30 مينۋتقا ارتىق ۋاقىت بولىنگەن, بۇل اتالعان پاندەردەگى ەسەپ-قيساپقا بايلانىستى بولار, دەيدى ول.
سونىمەن پەداگوگتاردىڭ بىلىكتىلىك ساناتتارىن تاعايىنداۋ ەكى كەزەڭدە جۇرگىزىلەتىنىن ايتا كەتكەن ءلازىم. ياعني مامىر ايىندا تەستىلەۋدەن وتكەن مۇعالىمدەر قىزمەتتىڭ قورتىندىلارىن كەشەندى تالدامالىق قورىتىندىلاۋ كەزەڭىنە قۇجات تاپسىرادى. ال تەستىلەۋدەن وتە الماعان نەمەسە بەلگىلى ءبىر سەبەپتەرگە بايلانىستى تەستىلەۋگە قاتىسا الماعان مۇعالىمدەردىڭ اعىمداعى جىلى قاراشا ايىندا تەستىلەۋدى تاپسىرۋ مۇمكىندىكتەرى بار.
ايگۇل تاشەتوۆا,
جۋرناليست.
