ءۇ.ىبىراي اتىنداعى اقمولا وبلىستىق فيلارمونياسىنىڭ ساحناسىندا «ەلوردادان ەلگە سالەم» كونتسەرتتىك باعدارلاماسىمەن «استانا» ەسترادالىق-سيمفونيالىق وركەسترى ونەر كورسەتتى. 20 جىل بۇرىن ەلوردا اكىمدىگىنىڭ باستاماسىمەن قۇرىلعان وركەسترگە قر ەڭبەك سىڭىرگەن قايراتكەرى الەكساندر ابىلاەۆ جەتەكشىلىك ەتەدى. ۇجىمنىڭ رەپەرتۋارى تانىمال وتاندىق جانە شەتەلدىك كومپوزيتورلار جازعان ءتۇرلى جانرداعى شىعارمالاردان تۇرادى. جينالعان قاۋىم كلاسسيكادان دجازعا دەيىن ءتۇرلى شىعارمالاردى تىڭداعان بولاتىن. ال «گورود موي» كومپوزيتسياسىندا استانا تۋرالى اۋەندەر دە ورىندالدى.
سونىمەن قاتار, «كوكشەتاۋ» وبلىستىق مادەنيەت سارايىندا استانا قالاسىنىڭ مەملەكەتتىك اكادەميالىق فيلارمونياسى ارتيستەرىنىڭ – كامەرالىق حورىنىڭ, «قورقىت» ءداستۇرلى مۋزىكا توبىنىڭ, حالىق اندەرى ءبولىمىنىڭ سوليستەرىنىڭ قاتىسۋىمەن «ايبوزىم» كونتسەرتى ءوتتى. شىعارماشىلىق كەش بارىسىندا ءبىرجان سالدىڭ ماحاببات, الەۋمەتتىك تەڭسىزدىك پەن فيلوسوفيالىق وي-تولعاۋلارى تاقىرىپتان اشاتىن ولمەس تۋىندىلارى ورىندالدى. ساحنا تورىندە مۋزىكانتتارمەن بىرگە قر ەڭبەك سىڭىرگەن ءارتىسى قاپاش ق ۇلىشەۆا دا ءان شىرقادى.
ءبىرجان سال اتىنداعى مۋزىكالىق كوللەدجدە عازيزا جۇبانوۆا اتىنداعى ىشەكتى اسپاپتار كۆارتەتى « ۇلى دالا اۋەندەرى» اتتى كونتسەرتتىك باعدارلامانى كوپشىلىك نازارىنا ۇسىندى. ەلىمىزدەگى جالعىز كاسىبي كۆارتەت شۋبەرتتىڭ, گايدننىڭ, ءبوروديننىڭ, جۇبانوۆانىڭ, جايىموۆتىڭ, ماحامبەتتىڭ, جەلدىباەۆتىڭ, تاتتىمبەت پەن قۇرمانعازىنىڭ شىعارمالارىن ورىندادى.
فيلارمونيا ارتيستەرىمەن بىرگە كوكشەتاۋعا ەلوردالىق قۋىرشاق تەاترىنىڭ ترۋپپاسى دا اتتاندى. ش.قۇسايىنوۆ اتىنداعى وبلىستىق قازاق مۋزىكالىق دراما تەاترىنىڭ ساحناسىندا اتالمىش ۇجىم ءوزىنىڭ ۇزدىك قويىلىمدارىنىڭ ءبىرى – «ماڭگىلىك بالا بەينە» سپەكتاكلىن قويعان بولاتىن. شىعارمانىڭ اۆتورى – قر ەڭبەك سىڭىرگەن قايراتكەرى, جازۋشى-دراماتۋرگ روزا مۇقانوۆا.
ەكى كۇندىك گاسترول اياسىندا «كوكشەتاۋ» وبلىستىق مادەنيەت سارايىندا تاڭعى «اق تىلەكپەن استانا!» اتتى كورمە جۇمىس ىستەدى. ەكسپوزيتسيادا ەلىمىزدىڭ تانىمال 50 سۋرەتشىسىنىڭ 100 ەڭبەگى قويىلعان. توپتامانى تاۋەلسىزدىك سارايىنىڭ ۇجىمى ۇسىندى.
ەلوردانىڭ اقمولا وبلىسىنداعى مادەني كۇندەرى اياسىندا سپورتتىق شارالار دا ۇيىمداستىرىلدى. «بۋراباي» سپورت سارايىندا كوكشەتاۋ مەن استانانىڭ قۇراما كوماندالارىنىڭ اراسىندا جۇزۋدەن ماتچتىق جارىس ءوتتى. ەكى كۇن بويى سپورتشىلار ەركىن ستيلدە 100 مەترگە ءجۇزىپ, 50 مەتردەن 4 رەت قۇرامداستىرىلعان ميكس ەستافەتادا, 200 مەترگە كەشەندى جۇزۋدە جانە «كوڭىلدى ستارتتار» ەستافەتاسىندا باق تالاستىردى.
ال «باتىر» ستەپنوگور سپورت كەشەنىندە گىر كوتەرۋدەن قالالىق تۋرنير ءوتتى. مۇنىمەن قوسا, سپورت ارداگەرى, قر ەڭبەك سىڭىرگەن جاتتىقتىرۋشىسى, ارداگەرلەر اراسىندا 10 دۇركىن الەم چەمپيونى, گىر كوتەرۋ سپورتىنان حالىقارالىق وداق فەدەراتسياسىنىڭ ۆيتسە-پرەزيدەنتى سەرىك ابداحينمەن كەزدەسۋ ۇيىمداستىرىلدى.
