ەكولوگيالىق قاۋىپسىزدىك ۇلتتىق قاۋىپسىزدىكتىڭ نەگىزگى ستراتەگيالىق كومپونەنتتەرىنىڭ قاتارىنا ەنىپ, مەملەكەتتىڭ باسىمدى اسپەكتىلەرىنىڭ بىرىنە اينالۋدا. رەسپۋبليكامىزدىڭ كوپتەگەن ايماقتارىندا ەكولوگيالىق جاعداي كۇردەلەنىپ, تۇرعىنداردىڭ دەنساۋلىعىنا زيانىن تيگىزۋدە.
«قازگيدرومەتتىڭ» حابارلاۋىنا قاراعاندا, 2017 جىلدىڭ قورىتىندىسى بويىنشا ساراپتالعان 49 ەلدى مەكەننىڭ ىشىندە قازاقستاننىڭ 8 قالاسى بارىنشا لاستانعان دەپ تانىلدى. ولار: جىتىقارا, اتىراۋ, بالقاش, پەتروپاۆل, اقتوبە, قاراعاندى, تەمىرتاۋ, وسكەمەن. بۇلارداعى اۋانىڭ لاستانۋى شەگىنە جەتكەنى ەسەپكە الىنعان. ال جەتى ەلدى مەكەننىڭ ەكولوگيالىق جاعدايى جوعارى دەڭگەيدە دەپ تانىلعان. قۇرامىنا استانا, الماتى, تاراز, اقتاۋ سياقتى ءىرى 10 قالا ەنەتىن قالالارىمىزدىڭ ەكولوگيالىق لاستانۋى نورمادان جوعارى دەپ انىقتالعان. سونداي-اق استانا, وسكەمەن, بالقاش, جەزقازعان, شىمكەنت جانە كەنتاۋ سياقتى التى قالانىڭ توپىراعىنداعى اۋىر مەتالل قالدىقتارى نورمادان 20-50 ەسە ارتىق ەكەندىگى ايقىندالعان.
زەرتتەلگەن 133 سۋ قويماسىنىڭ ىشىندە 32-ءسى جوعارى, 3-ءۋى اسا جوعارى دەڭگەيدە لاستانعان دەپ تانىلعان. 2017 جىلى تۋريزمگە قولايلىلىق دەڭگەيىن زەرتتەگەن بۇكىلالەمدىك ەكولوگيالىق فورۋم قازاقستاننىڭ 136 مەملەكەتتىڭ ىشىندە 99-شى ورىن الاتىنىن انىقتاعان.
2007 جىلدىڭ وزىندە ءبىزدىڭ ەكولوگيالىق كودەكسكە وكىلەتتى جانە جەرگىلىكتى اتقارۋشى ورگانداردىڭ قورشاعان ورتا ساپاسىنىڭ ماقساتتى كورسەتكىشتەرىن (قوسمك) انىقتاۋ تۋرالى مىندەتتەمە ەنگىزىلگەن ەدى. 2015 جىلى ەكولوگيالىق كوميتەت قارايتىن ەنەرگەتيكا مينيسترلىگى وسى كورسەتكىشتى انىقتاۋدىڭ ءتارتىبى تۋرالى بۇيرىق شىعاردى. الايدا بۇلاردان قورشاعان ورتانىڭ احۋالى جاقسارعان جوق, كەرىسىنشە ءب ۇلىنۋ جالعاسۋدا. تالاپتاردىڭ ءبارى قاعازدا قالدى. تەك جامبىل, پاۆلودار جانە شىعىس قازاقستان وبلىستارى عانا اتالمىش كورسەتكىشتى انىقتاۋعا كىرىسكەن, باسقالارىندا ول قوزعالماعان كۇيىندە.
سونىمەن بىرگە بىزدە قورشاعان ورتا ساپاسىن انىقتايتىن بىرتەكتى راتسيونالدى ءادىس تە جوق. ال تابيعات پايدالانۋشىلاردىڭ قورشاعان ورتانى بۇلدىرگەنى ءۇشىن تولەۋگە ءتيىستى وتەماقىلارى ناقتى زالالدىڭ مولشەرىنە ماڭايلامايدى دا.
ءبىز ۇكىمەت باسشىسى باقىتجان ساعىنتاەۆتىڭ اتىنا جولداعان دەپۋتاتتىق ساۋالىمىزدا وسى ماسەلەلەردى شەشۋ ءۇشىن تومەندەگى شارالاردى ورىنداۋدى ۇسىندىق:
1. جەرگىلىكتى اتقارۋشى ورگاندارعا جىلدىڭ اياعىنا دەيىن قوسمك جاساۋ جانە ونى بەكىتۋدى تاپسىرۋ;
2. وكىلەتتى ورگانعا قازاقستان اۋماعىنىڭ كورسەتكىشتەرىن ەسەپكە الا وتىرىپ, قوسمك ازىرلەۋىن تاپسىرۋ جانە قورشاعان ورتا ساپاسى نورماتيۆتەرىنە كەزەڭ-كەزەڭمەن جەتۋدى جۇكتەۋ;
3. قوسمك-نى ەميسسيالىق نورماتيۆتەرمەن بىرگە ۋدەلدىك نورماتيۆتەر تۇرىندە قولدانۋ مۇمكىندىگىن قاراستىرۋ.
قۇرالاي قاراكەن,
ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى
