شاراعا دەنساۋلىق ساقتاۋ مينيسترلىگى فارماتسيا كوميتەتىنىڭ توراعاسى ليۋدميلا بيۋرابەكوۆا, «سق-فارماتسيا» جشس باسقارما توراعاسىنىڭ مىندەتىن اتقارۋشى بەرىك ءشارىپ, ۇلتتىق دارىلىك زاتتاردى ساراپتاۋ ورتالىعى باس ديرەكتورىنىڭ ءبىرىنشى ورىنباسارى ارنۇر نۇرتاەۆ, سونداي-اق دارىلىك زاتتاردى جانە مەديتسينالىق تەحنولوگيالاردى ۇتىمدى پايدالانۋ ورتالىعىنىڭ باسشىسى ادىلەت تاباروۆ قاتىستى.
ءوز سوزىندە دەنساۋلىق ساقتاۋ مينيسترلىگى فارماتسيا كوميتەتىنىڭ توراعاسى ل.بيۋرابەكوۆا قازاقستاندىقتاردى دارىمەن قامتاماسىز ەتۋ ءۇشىن مەملەكەت تاراپىنان بولىنگەن قاراجات تۋرالى ايتتى.
«مەملەكەتتەن دارىمەن تەگىن قامتاماسىز ەتۋگە بولىنەتىن قارجى جىل سايىن ارتىپ كەلەدى. قازاقستاندىقتاردى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە دارىمەن قامتاماسىز ەتۋ ءۇشىن 2018 جىلعا 200,2 ملرد تەڭگە ءبولىندى. ونىڭ ىشىندە امبۋلاتورلىق دارىمەن قامتاماسىز ەتۋگە 124,7 ملرد تەڭگە ءبولىندى», دەپ اتاپ ءوتتى ل.بيۋرابەكوۆا.
سونداي-اق فارماتسيا كوميتەتىنىڭ توراعاسى پاتسيەنتتەردىڭ قانداي اۋرۋلار كەزىندە تەگىن امبۋلاتورلىق دارىمەن قامتاماسىز ەتۋگە يە بولاتىنىن ايتتى. ونىڭ ايتۋىنشا, تىزىمدە مۇنداي اۋرۋلار 40-تان ارتىق, ال ولاردىڭ ارقايسىسى ءۇشىن بەلگىلى ءبىر دارىلەر بار, ديسپانسەرلىك ەسەپتە تۇرعان ناۋقاستار تەگىن الا الادى.
ل.بيۋرابەكوۆا پاتسيەنتتەردى دارىلىك زاتتارمەن قامتاماسىز ەتىلمەۋىنىڭ دە سەبەپتەرىنە توقتالدى.
«امبۋلاتورلىق دارىمەن قامتاماسىز ەتۋدى ورتالىقتاندىرۋ, بارلىق مەديتسينالىق ۇيىمدار ءوزىنىڭ ديسپانسەرلىك پاتسيەنتتەرىن قاتاڭ تۇردە ەسەپكە المايتىنىن انىق كورسەتتى. وسىعان بايلانىستى دۇرىس ەمەس وتىنىمدەر قالىپتاسادى, سونىڭ سالدارىنان ءدارى-دارمەكتەردى جونەلتۋ كەستەگە ساي جۇرگىزىلسە دە, بارلىق پاتسيەنتتەر دەر كەزىندە دارىلەرمەن قامتاماسىز ەتىلمەيدى», دەدى ول.
«سق-فارماتسيا» جشس باسقارما توراعاسىنىڭ مىندەتىن اتقارۋشى ب.ءشارىپ اعىمداعى جاعداي بويىنشا مامىر ايىنا مەديتسينالىق ۇيىمدارعا جوسپارلى تۇردە دارىلىك زاتتاردى جونەلتۋ تولىعىمەن اياقتالعانىن, ال كەيبىر وڭىرلەردە ماۋسىم ايىنىڭ پەرەپاراتتارعا قاجەتتىلىگىن جونەلتۋ باستالعانىن باياندادى.
«ەل بويىنشا 30 مامىرداعى جاعدايعا سايكەس بارلىعى 74 ملرد تەڭگەگە ءدارى-دارمەكتەر جونەلتىلدى. سونىڭ ىشىندە ستاتسيونارلىق مەديتسينالىق كومەككە ارنالعان ءدارى-دارمەكتەر اعىمداعى جىلدىڭ بەس ايىندا – 99 پايىز (34,2 تەڭگە سوماعا), امبۋلاتوريالىق دارىلىك قامتاماسىز ەتۋ ءۇشىن 97 پايىز (39,8 ملرد تەڭگە) جونەلتىلدى», دەدى ب.ءشارىپ.
ۇلتتىق دارىلىك زاتتاردى ساراپتاۋ ورتالىعى باس ديرەكتورىنىڭ ءبىرىنشى ورىنباسارى ا.نۇرتاەۆ تەگىن امبۋلاتورلىق دارىمەن قامتاماسىز ەتۋ ءۇشىن ساتىپ الىناتىن بارلىق پرەپاراتتار ەلىمىزدە تىركەلگەنىن, ياعني ولاردىڭ ساپاسى, تيىمدىلىگى جانە قاۋىپسىزدىگى تۋرالى قورىتىندىلار الىنعانىن حابارلادى. سونداي-اق ول پرەپاراتتاردىڭ جاناما اسەرلەرى انىقتالعان جاعدايدا, ناۋقاستار مەن ەمدەۋشى دارىگەرلەرگە ۇلتتىق دارىلىك زاتتاردى ساراپتاۋ ورتالىعىنىڭ سايتىنداعى ءتيىستى نىساندى تولتىرۋدى ۇسىندى.
راۋان قايدار,
«ەگەمەن قازاقستان»
