«تاۋەلسىزدىك جىلدارى قازاقستان بۇكىل الەمگە ۇلتارالىق تاتۋلىققا جەتۋ ستراتەگياسىنىڭ بار ەكەنىن جاريا ەتتى» دەپ اتاپ وتكەن بولاتىن ەلباسى نۇرسۇلتان نازارباەۆ. شىنىمەن دە, ءبىزدىڭ مەملەكەتىمىزدە ۇلت وكىلدەرى اراسىنداعى رۋحاني ىنتىماقتاستىق وزەكتى ءماسەلەلەردىڭ ءبىرى بولىپ ەسەپتەلەدى. بارىمىزگە ءمالىم, قانداي قوعامدا دا رۋحاني ىنتىماقتاستىققا جەتۋ كەپىلى قاي ۇلتتىڭ وكىلى بولماسىن ولاردىڭ تەڭ قۇقىقتىعىندا جانە ەركىندىگىندە. بۇل تۇجىرىمدامالار ەلىمىزدىڭ اتا زاڭىندا بەكىتىلگەن, ياعني قازاقستان ءوز تاۋەلسىزدىگىن العاننان باستاپ جۇرگىزىلگەن دەموكراتيالىق رەفورمالار وسى باعىتتى ۇستاندى.
90-جىلدارى ءبىلىم بەرۋدىڭ جاڭا تۇجىرىمدامالارى جاسالدى, ونىڭ ىشىندە قازاقستان رەسپۋبليكاسىنداعى ەتنومادەني ءبىلىم بەرۋ تۇجىرىمداماسى دا بار. اتالعان قۇجاتتا ەتنومادەني ءبىلىم بەرۋدىڭ ماڭىزدىلىعى وتپەلى كەزەڭدەگى ءبىلىم بەرۋدەگى داعدارىسپەن بايلانىستى بولدى. كەڭەس وداعى داۋىرىندەگى ءبىلىم بەرۋ جانە تاربيە بەرۋ مازمۇنىن ۋنيفيكاتسيالاۋ باعىتى ۇلتتىڭ جانە ۇلتتىق توپتاردىڭ ەتنومادەني سۇرانىستارىن قاناعاتتاندىرا المادى. بىراق تاۋەلسىزدىككە قول جەتكىزۋمەن بىرگە بۇل پروبلەمالار شەشىلدى. ەلباسىمىزدىڭ كورەگەندىگى ارقاسىندا بۇگىنگى تاڭدا وتانىمىزدىڭ 62 مەكتەبىندە 16 000 ۇيعىر ۇل-قىزدارى ۇلتتىق قادىر-قاسيەتىن ساقتاي وتىرىپ, تولىققاندى ءبىلىم الۋدا. ۇلتتىق قادىر-قاسيەت مەنىڭ تۇسىنىگىمدە اناڭنىڭ ءتىلىن ءبىلۋ, ءوز حالقىڭنىڭ ەڭ جاقسى قاسيەتتەرىن, داستۇرلەرىن بويىڭا ءسىڭىرۋ جانە ءوز ۇلتىڭنىڭ الدىندا بورىش, جاۋاپكەرشىلىك رەتىندە قالىپتاسقان تالاپتاردان تومەن ءىس-ارەكەت جاساماۋ. جوعارىدا ايتىلعان 62 مەكتەپتىڭ ىشىندە 12 مەكتەپ ۇيعىر تىلىندە وقىتاتىن, ال قالعانى ارالاس مەكتەپتەر. بۇل مەكتەپتەر قاتارىندا مەن باسشىلىق جاساپ وتىرعان ا. روزىباكيەۆ اتىنداعى №153 مەكتەپ- گيمنازيا دا بار. مەكتەپ 1964 جىلى اشىلعان, ال 2001 جىلى گيمنازيا ءمارتەبەسىن الىپ, ەلىمىزدە العاشقى ۇيعىر تىلىندە وقىتاتىن گيمنازيا بولدى.
ەلىمىزدە از ۇلت وكىلدەرىنىڭ ءبىلىم الۋىنا جاسالعان ءمۇمكىندىكتەر تۋرالى 2010 جىلى 22-23 شىلدەدە اۆستريانىڭ استاناسى ۆەنا قالاسىندا ءوتكەن ەقىۇ-نىڭ «وبرازوۆانيە ليتس پرينادلەجاششيح ك ناتسيونالنىم مەنشينستۆام: ينتەگراتسيا ي راۆەنستۆو» اتتى ۇلكەن فورۋمعا قاتىسىپ, قازاقستانداعى ۇيعىر تىلىندەگى مەكتەپتەردە ءبىلىم الۋعا جاسالعان مۇمكىندىكتەر تۋرالى ايتتىم. ايتسا ايتقانداي, قازاقستان رەسپۋبليكاسى ءبىلىم جانە عىلىم مينيسترلىگىنىڭ, قازاقستان حالقى اسسامبلەياسىنىڭ, ۇيعىرلاردىڭ رەسپۋبليكالىق ەتنومادەني ورتالىعىنىڭ قولداۋىمەن ۇيعىر تىلىندەگى مەكتەپتەردىڭ پروبلەمالارى جانە ونى شەشۋ جولدارىنا ارنالعان سەمينار-كونفەرەنتسيالار ۇدايى ۇيىمداستىرىلىپ كەلەدى.
بۇگىنگى تاڭدا مەن باسقارىپ وتىرعان گيمنازيانىڭ العا قويعان مىندەتتەردى ىسكە اسىرۋ بارىسىندا 2010- 2020 جىلدارى «ءبىلىم بەرۋدى دامىتۋ رەسپۋبليكالىق باعدارلاماسىنىڭ» تۇجىرىمدامالارى باسشىلىققا الىندى. بۇعان البەتتە باسەكەگە قابىلەتتى ماماندار كەرەك. ول ءۇشىن مەكتەپتىڭ ماتەريالدىق- تەحنيكالىق بازاسىن بۇگىنگى كۇن تالابىنا ساي جاڭا تەحنيكالىق قۇرالدارمەن جابدىقتاۋ كۇن ءتارتىبىندەگى ءبىرىنشى ءماسەلە بولدى. گيمنازياداعى 38 وقۋ كابينەتتەرى بۇگىنگى كۇن تالابىنا ساي جاڭا تەحنيكالىق قۇرالدارمەن جابدىقتالعان. سەگىز ينتەراكتيۆتى تاقتا, 18 ۆيدەوپروەكتور ورناتىلىپ, فيزيكا, بيولوگيا وقۋ كابينەتتەرى تولىعىمەن زاماناۋي جابدىقتالىپ, گيمنازيا مۇعالىمدەرىنىڭ جاڭا پەداگوگيكالىق تەحنولوگيالاردى پايدالانۋىنا تولىق جاعداي جاسالعان. سونداي-اق 150 ورىندى ءماجىلىس زالى, 260 ورىندى مادەنيەت ءۇيى, 200 ورىندى اسحانا, 3 سپورت زالى, 2 فۋتبول, 2 تەننيس الاڭى زامانعا ساي جابدىقتالعان. تالاي شاكىرتكە ءتالىم بەرىپ, قاناتىن قاتايتىپ, ومىرگە جولداما بەرگەن گيمنازيادا بۇگىنگى تاڭدا 1200 ءشاكىرت ءبىلىم الۋدا. ولارعا 92 مۇعالىم ساباق بەرەدى. ولاردىڭ وتىز ەكىسى جاڭا بۋىن وقۋلىقتارىنىڭ اۆتورلارى ءجانە اۋدارماشىلارى.
وقۋ تاربيە ءۇردىسىن ورگە باستىرۋعا ۇمتىلعان, ۋاقىت تالابىنا ساي جاڭا تالپىنىستارعا جانە شىعارماشىلىق ىزدەنىستەرگە بوي ۇرعان بۇل پەداگوگيكالىق ۇجىمىمىزدىڭ ەڭبەگى ايتۋعا تۇرارلىق. مەكتەپ ۇجىمى جىل سايىن الماتى قالاسى اكىمى تاراپىنان ۇيىمداستىرىلاتىن «قالانىڭ ەڭ ۇزدىك مەكتەبى» اتتى بايقاۋىنا قاتىسىپ, 2001 جىلى جۇلدەلى «ەڭ شىعارماشىل ۇجىم», ال 2009 جىلى «ءبىلىم شامشىراعى – مادەنيەتتىڭ جارىق جۇلدىزى» نوميناتسيالارى بويىنشا جۇلدە الۋ قۇرمەتىنە يە بولدى. مۇعالىمدەردىڭ ءبىلىم دەڭگەيى مەن كاسىبي شەبەرلىگىنىڭ ارقاسىندا مەكتەپتىڭ تالاپتى دا, تالانتتى ءشاكىرتتەرى قالالىق, رەسپۋبليكالىق الامان بايگەلەردەن وزىپ كەلىپ, ۇستاز ەڭبەگىن اقتاۋدا.
2010-2011 وقۋ جىلى شاكىرتتەرىمىز قالالىق عىلىمي جوبالار جارىسىنان 3, قالالىق وليمپيادادا 3, رەسپۋبليكالىق وليمپيادادا 1 جۇلدەلى ورىن العان بولسا, سپورتتان حالىقارالىق, رەسپۋبليكالىق سايىستاردىڭ جەڭىمپازدارى گيمنازيامىزدى جوعارى مەجەدەن كورسەتتى.
بيىلعى جولداۋىندا ەلباسى مەملەكەتتىك ءتىلدى ساپالى, جاڭا دەڭگەيگە كوتەرۋ ماسەلەسىنە ايرىقشا نازار اۋداردى. ءبىزدىڭ پەداگوگيكالىق ۇجىم قازاق ءتىلىن مەڭگەرۋ مەجەسىنە ابىرويلى جەتەتىنىمىزگە كۇمان كەلتىرمەيدى. قازىردىڭ وزىندە وقۋشىلارىمىز قازاق ءتىلىن تەرەڭدەتىلگەن باعدارلامامەن وقىپ, مەملەكەتتىك ءتىل بويىنشا وتكىزىلىپ جاتقان جارىستاردا الدىڭعى ورىنداردى يەلەنىپ كەلەدى.
وسى ءساتتى پايدالانا وتىرىپ, ەلىمىزدەگى باقۋاتتى تۇرمىس, ۇلتارالىق تاتۋلىق پەن ساياسي تۇراقتىلىق ەلباسى ەسىمىمەن بايلانىستى ەكەنىن ايتقىم كەلەدى. سوندىقتان دا ءبىز, قازاقستاندىق ۇيعىرلار, ەلباسىمىزدىڭ ۇلتتار دوستاستىعى جانە ولاردىڭ دامۋىنا ەرەكشە كوڭىل بولگەن ساياساتىنا العىسىمىزدى بىلدىرە وتىرىپ, ەل تاۋەلسىزدىگىنىڭ 20 جىلدىق مەرەيتويىمەن بارشا جۇرتتى شىن جۇرەكتەن قۇتتىقتايمىز.
شاۆكات ۋماروۆ, ۇيعىر تىلىندە ءبىلىم بەرەتىن مەكتەپتەر قاۋىمداستىعىنىڭ توراعاسى, ا.روزىباكيەۆ اتىنداعى № 153 مەكتەپ-گيمنازيا ديرەكتورى.
الماتى.
