«ەگەمەن بولماي ەل بولماس, ەتەكتەن كەسىپ جەڭ بولماس», دەگەن ەكەن بابالارىمىز. مىنە, سول ايتىلعانداي, ەگەمەن بولعان, ەل بولعان كەزدەن بەرى ونىڭ جىلناماسى مەن شەجىرەسىن قالت جىبەرمەي جازىپ كەلە جاتقان باسىلىم – «ەگەمەن قازاقستان». تەك وسى قاسيەتى ءۇشىن دە باس باسىلىمنىڭ قادىر-قاسيەتى ءبىزدىڭ ۇجىم مۇشەلەرى ءۇشىن جوعارى دەپ سانايمىز. ەگەمەندىك تاريحىنىڭ ءۇشىنشى ونجىلدىعىنا اياق باسىپ وتىرعان سىندارلى ساتىمىزدە «ەگەمەن قازاقستان» ەل ەرتەڭى – جاستاردىڭ دا كۇن سايىن اسىعا كۇتىپ وقيتىن باسىلىمىنا اينالا الاتىنىنا ەشقانداي كۇمانىمىز جوق.
«ەگەمەندە» جاريالانىپ ءجۇرگەن ماتەريالداردىڭ مازمۇنى جان-جاقتىلىعىمەن, ءارى تەرەڭدىگىمەن وقىرماندى باۋراي بىلەدى. بۇگىنگى زامانعى جۋرناليستيكاعا قويىلاتىن باستى تالاپ – ساراپتاۋلار مەن تالداۋلارعا جانە سالىستىرۋلارعا ارقا سۇيەيتىن سۇيەكتى ماتەريالدار دەسەك, مۇنداي دۇنيەلەر باس باسىلىمنىڭ كەز كەلگەن نومىرىنەن تابىلادى.
مەن ءوزىم ارناۋلى ءبىلىم بەرەتىن وقۋ ورنىنىڭ باسشىسى بولعاندىقتان, گازەتتە ءبىلىم بەرۋ جۇيەسىنە قاتىستى جاريالانىپ جۇرگەن ماتەريالداردى ۇنەمى قاداعالاپ, وقىپ جۇرەمىن. ءسوز جوق, تاۋەلسىزدىكتىڭ 20 جىلى ىشىندە ەلدىڭ ءبىلىم بەرۋ سالاسىندا جاڭاشا كوزقاراستار مەن كريتەريلەر قالىپتاستى.
ەگەمەندىك تالاپتارىنا سايكەس ۇلتتىق تىلىمىزدە جاڭا وقۋلىقتار جازىلا باستادى. راس, العاشقىدا كەيبىر اتتەگەن-ايلار مەن وراشولاقتىقتار بولعانىمەن, كەيىن بۇل ءىس ءبىر ىزگە ءتۇسىپ كەلە جاتقانى بەلگىلى. بۇل ءجايتتەردى دە كەزىندە «ەگەمەننىڭ» بەتىنەن وقىعانبىز. ەندى زاڭعار باسىلىم جونىندەگى وي-پىكىرىمە قوسا تاۋەلسىزدىك جىلدارىندا الاش ارىسى جاھانشا دوسمۇحامەدوۆ اتىنداعى ءبىزدىڭ كوللەدج ۇجىمى دا ۇلان-عايىر ىستەرگە باستاماشى بولا بىلگەنىن ايتا كەتكىم كەلەدى.
اتاپ ايتقاندا, ءبىزدىڭ وقۋ ورنىنىڭ بازاسىندا وقۋ باعدارلامالارى مەن مەملەكەتتىك ستاندارتتار ازىرلەنىپ, ءوزىمىز تەكتەس رەسپۋبليكاداعى پەداگوگيكالىق كوللەدجدەرگە تاراتىلدى. سونداي-اق مۇندا 48 ارنايى وقۋلىق جازىلىپ, رەسپۋبليكانىڭ ءبىلىم مينيسترلىگى تاراپىنان قولداۋ تاپتى. «ءبىلىم نەگىزى – باستاۋىشتا». مىنە, وسىنداي باستاۋىش ءبىلىم بەرۋ ءىسىنىڭ كەيبىر تولعاعى جەتكەن ماسەلەلەرى ەگەمەندىكتىڭ العاشقى جىلدارىندا باس باسىلىم بەتىندە جارىق كورگەنى دە ايان. ونىڭ ىشىندە وسى جولدار اۆتورىنىڭ ماقالاسى دا بار ەدى.
الداعى 2012 جىلى كوللەدجدەگى جاستار مەن ستۋدەنتتەر باس باسىلىمدى جىل بويى رۋحاني تۇرعىدان سەرىك ەتۋگە ۇيعارىم جاساعانى – ءبىزدى سۇيسىندىرەدى. كۇنى بۇگىنگە دەيىن ارناۋلى وقۋ ورنىنداعى 120 ادام «ەگەمەن قازاقستانعا» جازىلدى. بۇل ءىس ودان ءارى جالعاسۋدا.
«ەگەمەن» – قاي كەزدە دە ەلدىكتىڭ ءسوزىن ايتىپ كەلە جاتقان باسىلىم. ول بىزگە سونىسىمەن دە قىمبات, سونىسىمەن دە باعالى.
شالقىما قۇرمانالينا, جاھانشا دوسمۇحامەدوۆ اتىنداعى پەداگوگيكالىق كوللەدج ديرەكتورى, پەداگوگيكا عىلىمدارىنىڭ دوكتورى.
ورال.
