ءومىردىڭ ءوزى جولىقتىرعان, تاعدىر تابىستىرعان, قاناتتاسا قىزمەت اتقارعان سونداي اسىل اعالاردىڭ ءبىرى – ابۋباكىر ءالي ۇلى تىنىباەۆ ەدى. اڭقىلداعان اقكوڭىل, كىرشىكسىز تازا, سەزىمتال دا سەرگەك كىسى ەدى. ابەكەڭمەن ول كىسى تالدىقورعان وبلىستىق پارتيا كوميتەتىنىڭ ءبىرىنشى حاتشىسى بوپ كەلگەن كەزدەن باستاپ اعالى-ىنىلىدەي جاقىن ارالاستىق.
قاي زاماندا بولماسىن ەر-ازاماتتىڭ حالىق الدىندا اتاق-ابىرويىنىڭ ارتىپ, بەدەل قۇرمەتكە بولەنۋىنە ەل ءۇشىن اتقارعان ەڭبەكتەرى ىقپال ەتەتىنى انىق. ادال ەڭبەك, توككەن تەردىڭ ارقاسىندا ابۋباكىر ءالي ۇلى ەلىمىزدە سۋ شارۋاشىلىعى سالاسىنىڭ بەلگىلى مامانى بولدى. كەزىندە ابەكەڭنىڭ مەليوراتسيا جانە سۋ شارۋاشىلىعى مينيسترلىگىن, ودان كەيىن تالدىقورعان وبلىسىن باسقارىپ, كەڭ-بايتاق قازاق جەرىنىڭ ەرنى كەزەرگەن القاپتارىن ەرنەۋىنەن سۋعا تولتىرىپ, ماۋەلى باققا اينالدىرعانى ءبىزدىڭ بۇل ايتقانىمىزدىڭ ايقىن دالەلى بولا الادى.
ابۋباكىر ءالي ۇلى تارشىلىق زاماندا تۋىپ, قيىنشىلىقتا عۇمىر كەشكەن, بەينەتتىڭ اۋىر تاۋقىمەتىن تارتا ءجۇرىپ, ءوزىنىڭ كۇش جىگەر-قايراتىمەن, اق ادال ەڭبەگىمەن ەرتە ەسەيىپ ەل قاتارىنا قوسىلعان ازامات. ەشنارسە وزدىگىنەن بولا قالمايتىنىن, بارلىعى دا ەرەن ەڭبەكپەن, جانكەشتى تىرلىكپەن كەلەتىنىن ۇعىنعان قايراتكەر. ابەكەڭنىڭ تالدىقورعان وبلىسىن باسقارعان, ەل ءۇشىن بەل جازباي ەڭبەك ەتكەن كەزدەرىن ارقاشان ساعىنىشپەن ەسكە الامىن. جۇمىستى جانىن بەرىپ ىستەيتىنىنە, تازالىعىنا, ادالدىعىنا, وزىنە تاپسىرىلعان جاۋاپكەرشىلىك جۇگىن سەزىنەتىن ازاماتتىق بولمىسىنا اركەز ءتانتى بولۋشى ەدىك.
ابەكەڭ اسىرەسە كىندىك قانى تامعان سىر ءوڭىرىنىڭ ءوسىپ-وركەندەۋىنە ولشەۋسىز ۇلەس قوستى, مۇنى قالىڭ جۇرتشىلىق ءالى كۇنگە ۇمىتا قويعان جوق. ول قازالى اۋداندىق پارتيا كوميتەتىنىڭ ءبىرىنشى حاتشىسى بولعان جىلدارى تۋعان جەرىنىڭ ەلىمىزدەگى اۋىل شارۋاشىلىعىنا قولايلى ايماققا اينالۋى ءۇشىن بارىن سالدى. جازى مي قايناتار ىستىق ايماقتا اۋىل شارۋاشىلىعىن وركەندەتۋ ءۇشىن ءبىرىنشى كەزەكتە سۋلاندىرۋ جۇيەسىن شەشۋ اسا ماڭىزدى ماسەلە ەدى. باستاۋىن كورشى ەلدەردەن الاتىن سىرداريانىڭ سۋىن جاز ايلارىندا ۇنەمدى پايدالانىپ, ەل يگىلىگىنە جاراتۋ ماسەلەسى سول كەزدە شەشىلگەن بولاتىن.
سۋ شارۋاشىلىعى بويىنشا ماماندانعان ابۋباكىر تىنىباەۆ اعامىز بۇل ماسەلەنى وڭتايلى شەشۋگە ءوزىنىڭ العان ءبىلىمىن بارىنشا پايدالانىپ, شاڭى شىعىپ جاتاتىن اۋداندى اق كۇرىشى جايقالعان جاسىل جەلەككە اينالدىردى. بۇل شىندىعىندا سول كەزدە تالاي باسشىلاردى ويلاندىرىپ-تولعاندىرعان ماسەلە ەدى. سول ءۇشىن دە ابەكەڭدى قازالى جۇرتى ءالى كۇنگە دەيىن اۋزىنان تاستاماي اڭگىمە قىلادى. سۋ تاپشىلىعىنان زارداپ شەگىپ, تۇيىققا تىرەلگەن جىلدارى قيىندىقتان قيسىندى جول تاۋىپ شىققان تاپقىرلىعىن ونىڭ زور ەڭبەگىن, ءبىلىمى مەن بولمىسىن, ۇتقىر ويىن, ۇتىمدى ۇيىمداستىرۋشىلىق قابىلەتىن, ازاماتتىق ار-وجدانىن جەرلەستەرى جوعارى باعالايدى.
ەرتەرەكتە اعامىزدىڭ سۋ شارۋاشىلىعىنا قاتىستى ايتقان مىنا ءبىر اڭگىمەسى ەسىمدە قالىپتى. «سىرداريانىڭ وڭ جانە سول جاعالاۋىندا ورنالاسقان شارۋاشىلىقتارعا سۋدى بۇرىنعىداي ءبىر مەزگىلدە ەمەس, كۇن ارالاتىپ بەرۋ جۇيەسىن ەنگىزدىك. ويتكەنى سۋ كولەمى وسكەن سايىن ونىڭ اعىنى دا كۇشەيەدى. دەمەك, سۋ ءبىر جاق جاعالاۋداعى شارۋاشىلىقتارعا تولىق مولشەردە, قاجەتتى مەرزىمدە جەتەتىنىن بايقادىق. سۋدىڭ اعىنى كۇشەيىپ, جۇردەك بولعان سايىن ونىڭ ىسىرابى ازايادى. سۋ توپىراققا ءسىڭىپ, بۋعا اينالىپ ۇلگەرمەيدى. ەگەر سۋدى بولگەن جاعدايدا ونىڭ دىتتەگەن جەرىنە جەتۋى وتە قيىن. قىزىلوردانىڭ سۋ شارۋاشىلىعىن باسقارعان جىلدارى وسىنداي امال-تاسىلدەردى قولدانىپ, شارۋاشىلىقتاردى سۋدان تارىقتىرماۋعا بار كۇش-جىگەرىمدى جۇمسادىم», دەيتىن ەدى.
ابۋباكىر ءالي ۇلى قازالى اۋدانىن باسقارىپ تۇرعاندا ىرگەلەس جاتقان ارال اۋدانىنىڭ حاتشىسى بولعان تاكەي ەسەتوۆ اعامىزدىڭ ابەكەڭ جايىندا مىنا ءبىر ەستەلىك ايتقانى بار ەدى.
– ارال مەن قازالىنىڭ شەكاراسىندا «اقباي» دەگەن القاپ بار. سول جەرگە ابۋباكىر زامانداسىم كوپتەن بەرى كوز تىگىپ ءجۇرىپتى. ءبىر كۇنى كەزدەسكەنىمىزدە «قوس اۋداننىڭ حالقى ەڭبەكقور, ەگىن ەگىپ, ونىڭ پايداسىن كورەيىن دەسە سۋ تاپشى. ەگەر «اقباي» القابىنان سۋ قويماسىن سالاتىن بولساق, جەر ەمگەن شارۋالار الا جازداي ەگىنىن سۋارىپ, قامباسىن دانگە تولتىرىپ الار ەدى. ەكى اۋداننىڭ كۇشىن بىرىكتىرىپ, سۋ قويماسىن سالايىق, كەيىن بولاشاق ۇرپاق بىزگە العىسىن ايتىپ جۇرەدى» دەپ ۇسىنىس جاسادى. سۋ سالاسىنىڭ بىلىكتى مامانى رەتىندە وبلىسىمىزعا اتى شىققان ابەكەڭنىڭ بۇل ويى مەنىڭ كوكەيىمە قونا كەتتى. سۋ يەسى سۇلەيمەننىڭ ءوزى بەرەكەلى ىسكە بەل بۋىپ, بىلەك سىبانا كىرىسكەندە مەن قالاي باس تارتايىن. قولداي كەتتىم. مىنە, سول ابەكەڭنىڭ باستاماسىمەن پايدا بولعان سول سۋ قويماسىنىڭ قىزىعىن قازالى مەن ارال حالقى ءالى كۇنگە دەيىن كورىپ كەلەدى. مۇنى ەندى كەمەڭگەرلىك دەمەي, نە دەيسىز؟ – دەپ تاكەي ەسەتوۆ اعامىز اعىنان جارىلعان بولاتىن.
مەيىرىم بار جەردە ادامگەرشىلىك قالىپتاسادى. اعامىزدىڭ بالالىق شاعى جىلىلىق پەن مەيىرىمگە تولى قاراپايىم قازاق اۋىلىندا ءوتتى. قاراپايىم وتباسىندا تاربيەلەنىپ, ەڭبەكسۇيگىشتىك بالا جاستان قالىپتاستى. ونەگەلى وتباسىندا ءتالىم العان ابۋباكىردىڭ ومىردە قاراقان باسىن عانا ەمەس, حالىق مۇددەسىن ويلايتىن ەلجاندى ازامات بولىپ وسۋىنە سول اتا-انا تاربيەسى كوپ سەپتىگىن تيگىزدى.
قىزىلوردا وبلىسىندا تابان اۋدارماي ەڭبەك ەتكەن 18 جىل ىشىندە ابۋباكىر ءالي ۇلى كۇرىش داقىلىن سۋارۋدىڭ جاڭا ينجەنەرلىك القاپتارىن جوبالاۋعا, تىڭ جەرلەردى يگەرۋگە, وبلىستىڭ بارلىق اۋداندارىندا ۇلكەن كانالدار سالۋعا بەلسەنە قاتىستى, كولدەتىپ سۋارۋ جۇيەسىن دامىتتى. سونىمەن قاتار سىر وڭىرىندە ابۋباكىر ءالي ۇلىنىڭ تىكەلەي قاتىسۋىمەن جايىلىمداردى سۋلاندىرۋ, ەلدى مەكەندەردى سۋمەن قامتاماسىز ەتۋ جونىندە ۇلكەن جۇمىستار اتقارىلدى. وبلىستا اۋىلشارۋاشىلىق داقىلدارىن ەگەتىن القاپتاردىڭ كولەمى كۇرت ارتىپ, سىردىڭ اقمارجانى اتانعان – كۇرىش داقىلىنىڭ ونىمدىلىگى وبلىس بويىنشا ءار گەكتارىنا شاققاندا 50 تسەنتنەرگە دەيىن جەتتى. سۋارمالى جەرلەردىڭ جالپى كولەمى 235 مىڭ گەكتارعا دەيىن ۇلعايىپ, كۇرىشتىڭ اۋىسپالى ەگىسى 150 مىڭ گەكتارعا دەيىن ارتتى. ناتيجەسىندە قىزىلوردا وبلىسى ەلىمىزدەگى نەگىزگى كۇرىش ءوسىرۋشى ايماققا اينالىپ, وداق بويىنشا كۇرىشتىڭ بەستەن ءبىرىن, ال قازاقستان بويىنشا 75 پايىزىن وندىرەتىن مۇمكىندىككە يە بولدى.
ءوز باسىم سول جىلدارى ەل باسقارىپ, حالىق مۇددەسى جولىندا ايانباي ەڭبەك ەتكەن ازاماتتاردىڭ ءومىر جولىنان قازىرگى بيلىكتەگى باسشىلار ۇلگى-ونەگە الۋى كەرەك دەپ ەسەپتەيمىن. ول كەزدەگى باسشىلاردىڭ كوپشىلىگى شەتىنەن يدەياشىل, ماقساتكەر ەدى. العا قويعان ماقساتىنا قول جەتكىزۋ جولىندا بار كۇش-جىگەرىن سارپ ەتىپ جۇمسايتىن-دى. بۇگىندە ابەكەڭدەي ەڭبەكقور, مەملەكەت مۇددەسىنە جان-تانىمەن بەرىلگەن ادامدار كوپ ەمەس. ءوز باسىم سوناۋ كەڭەس زامانىندا ۇندەمەي ءجۇرىپ ۇيدەي ءىس تىندىرعان اسىل ازاماتتاردىڭ ءتىزىمىن جاساي باستاسام ابۋباكىر ءالي ۇلى ەسىمى بىردەن اۋىزعا ورالا كەتەدى. سول ساتتە-اق تۇعىرلى تۇلعانىڭ ەڭبەك جولى, كىسىلىك كەلبەتى اسەرلى فيلم كورگەندەي كوز الدىڭنان ءوتىپ, جان دۇنيەڭدى شۋاققا بولەپ, كوڭىلىڭدى جادىراتادى. سول سياقتى ابۋباكىر الي ۇلىمەن بولعان ءاربىر كەزدەسۋدەگى اڭگىمەسى جادىمدا جاڭعىرىپ تۇرادى. ادەتتە كوپ جۋرناليستەر: «ادام بويىنداعى قانداي قاسيەتتەردى باعالايسىز؟» دەگەن ساۋالدى قويىپ جاتادى. ولارعا ۇلى اباي ايتقانداي, ادام بويىندا بولۋعا ءتيىس تالاپ, ەڭبەك, تەرەڭ وي, قاناعات, راحىم سىندى اسىل قاسيەتتەردى بالا كەزدەن بويعا ءسىڭىرىپ, ۇنەمى ۇشتاپ وتىرۋ كەرەك ەكەنىن ايتامىن. ءوز باسىم ابەكەڭنىڭ بويىنان وسى دانىشپان اباي كورسەتىپ بەرگەن بەس اسىل قاسيەتتى انىق بايقاعانداي بولامىن. بەس اسىل قاسيەتتى بويىنا جيعان ادامدى ءومىرى تەككە وتپەگەن «ناعىز ادام» دەپ اتايتىنىمىز دا سودان.
ءيا, ادام بالاسى اناسىنان اقىلدى بولىپ تۋمايدى. بىراق قۇداي بەرگەن سانانى ۇشتاپ, ءومىردىڭ اششى-تۇششىسىن تاتقان ادام اقىلى تولىسىپ, سالماقتى ادامعا اينالاتىنى ءسوزسىز.
سول سەبەپتى دە پاراسات-پايىمى جوعارى, اقىل-ويى اسقاق, سەزىمى سەرگەك, ءبىلىمى تەرەڭ, تابيعاتى تازا, ء ورىسى كەڭ, ورەسى بيىك, ءبىتىمى بولەك ابەكەڭدەي ۇلتجاندى ازاماتتى وزىمە پاراساتتى اعا ساناپ, ونىڭ بويىنداعى اسىل قاسيەتتەرىن ۇنەمى وزىمە ۇلگى ەتتىم.
1977 جىلى تالدىقورعان پەداگوگيكا ينستيتۋتىنىڭ رەكتورى بولىپ تاعايىندالىپ, بىلىكتى مامان دايىنداۋ ىسىنە بەل بۋىپ, بىلەك سىبانا كىرىستىم. سول كەزدە تالدىقورعان وبلىستىق پارتيا كوميتەتىنىڭ ءبىرىنشى حاتشىسى ءارىپباي الىباەۆ اعامىز ەدى. ءارىپباي اعامىز ءوز ورتاسىنا ىسكەرلىگىمەن تانىلعان تالاپشىل باسشىلاردىڭ ءبىرى بولاتىن. مال شارۋاشىلىعى سالاسىن ءبىر كىسىدەي بىلەتىن الىباەۆ مەن رەكتورلىق قىزمەتكە تاعايىندالعاننان كەيىن جەتىسۋدا كوپ ايالداعان جوق. شارۋانىڭ جايىن جەتىك بىلەتىن مامان ورتالىق بيلىككە قاجەت بولعاننان كەيىن ارەكەڭ ەت-ءسۇت ونەركاسىبى ءمينيسترى بولىپ تاعايىندالىپ, الماتىعا اۋىستى. وسى ارالىقتا ساقان قۇسايىنوۆ تالدىقورعان وبلىستىق پارتيا كوميتەتىنىڭ ءبىرىنشى حاتشىسى بولىپ تاعايىندالدى. بىراق سول جىلدارى قۋاڭشىلىق بولىپ, كۇيى قاشىپ, شاتقاياقتاعان شارۋاشىلىقتى تەز ارادا وڭالتۋدىڭ ءساتى تۇسپەگەن سوڭ, دىنمۇحامەد قوناەۆ وبلىس باسشىسىن اۋىستىرىپ جەتىسۋعا سول كەزدە رەسپۋبليكانىڭ سۋلاندىرۋ ىسىنە كوپ ەڭبەك سىڭىرگەن ابۋباكىر تىنىباەۆتى تاعايىندادى.
ابۋباكىر ءالي ۇلى تالدىقورعان وبلىسىنىڭ باسشىلىعىنا كەلگەننەن كەيىن كوپ ۋاقىت وتپەي-اق, جەتىسۋ جەرى تۇلەپ سالا بەردى. ول كىسىنىڭ قاجىرلى ەڭبەگىنىڭ ارقاسىندا 1981 جىلى وبلىس قول جەتكىزگەن تولاعاي تابىستاردىڭ ارقاسىندا كوكپ ورتالىق پارتيا كوميتەتىنىڭ, كسرو مينيسترلەر كەڭەسىنىڭ, بۇكىلوداقتىق كاسىپوداقتار كەڭەسىنىڭ جانە بۇكىلوداقتىق ورتالىق كومسومول كوميتەتىنىڭ اۋىسپالى قىزىل تۋىن جەڭىپ الدى. ال 1983 جىلدىڭ قورىتىندىسى بويىنشا قازاقستان ورتالىق پارتيا كوميتەتىنىڭ, قازكسر مينيسترلەر كەڭەسىنىڭ جانە قازاقستاننىڭ كاسىپوداقتار كەڭەسىنىڭ, قازاقستان ورتالىق كومسومول كوميتەتىنىڭ اۋىسپالى قىزىل تۋى تاعى دا تالدىقورعان وبلىسىنىڭ كوگىندە جەلبىرەگەنى ەسىمدە. 1982-1984-1985 جىلدارى اۋا رايى اۋىل شارۋاشىلىعى سالاسىنا قولايسىز بولسا دا تالدىقورعان وبلىسى كسرو-نىڭ بەس جىلدىق جوسپارىن جوعارى دەڭگەيدە ورىنداپ, بيىك بەلەستى باعىندىردى. سونداي-اق وبلىس ورتالىعى تالدىقورعان قالاسىندا ءبىراز جۇمىستار اتقارىلدى. قالا تازالىق جاعىنان شىرايلى شاھار مارتەبەسىنە يە بولىپ, كەڭەستەر وداعىنىڭ ورتالىق پارتيا كوميتەتىنىڭ, كسرو مينيسترلەر كەڭەسىنىڭ, بۇكىلوداقتىق كاسىپوداقتار كەڭەسىنىڭ جانە بۇكىلوداقتىق كومسومول ورتالىق كوميتەتىنىڭ اۋىسپالى قىزىل تۋىنا يە بولدى. وسىلايشا ابۋباكىر تىنىباەۆ از عانا ۋاقىتتىڭ ىشىندە تالدىقورعان وبلىسىن قازاقستاندى بىلاي قويىپ, بۇكىل وداق بويىنشا ەكونوميكاسى قۋاتتى وڭىرگە اينالدىرىپ, ەلىمىزدىڭ ابىرويىن اسقاقتاتتى.
ول كەزدە ديمەكەڭ اتالعان وبلىستى باسقارۋدى كەز كەلگەن ادامعا سەنىپ تاپسىرا بەرمەيتىن-ءدى. ونىڭ وزىندىك سىرى دا بار-تۇعىن. تۇتاس رەسپۋبليكا كوز تىگىپ وتىرعان وبلىستاعى جۇيەلى جۇمىس تۇتاس رەسپۋبليكانىڭ تۇپكىلىكتى ەكونوميكاسىنا ىقپال ەتەتىنى بەلگىلى. سوندىقتان ديمەكەڭ وبلىستىڭ ءبىرىنشى حاتشىلىعىنا بەينەلەپ ايتساق وت پەن سۋدان وتكەن, جۇمىستىڭ ءمانىن ءبىلىپ, ۇرشىقتاي ۇيىرەتىن ازاماتتاردى تاعايىنداۋدى داعدىعا اينالدىرعان بولاتىن. مەنىڭ جۇمىسىم شارۋاشىلىق جۇمىستارىمەن تىكەلەي ساباقتاسىپ جاتپاسا دا, ابەكەڭمەن جاقىن ارالاسىپ, جاقىنىراق تانىسۋدىڭ ءساتى سول جىلدارى ءتۇستى.
بىزدەر كوبىندە ابەكەڭدى سۋ شارۋاشىلىعى سالاسىندا قامشى سالدىرماي جۇمىس ىستەپ, بيىك بەلەستى باعىندىرعان باسشى رەتىندە تانيمىز. ءيا, ابۋباكىر ءالي ۇلىنىڭ رەسپۋبليكانىڭ سۋلاندىرۋ جۇيەسىن دامىتىپ, قازاقستاندى يران باعىنا اينالدىرۋ جولىندا سىڭىرگەن ەڭبەگىن ەشكىم جوققا شىعارا المايدى. ابەكەڭ اسىرەسە تالدىقورعان وبلىسىن باسقارعان ساتىندە بويىندا جاڭا ىسكەرلىك قابىلەتىن تانىتا ءتۇستى. سول جىلدارى اعامىزدىڭ ورتالىق بيلىكتە ابدەن ىسىلىپ, مول تاجىريبە جيناعانىن انىق اڭعاردىم.
ابۋباكىر ءالي ۇلى تالدىقورعاندى باسقارعان 1981-1986 جىلدارى وبلىستىڭ شارۋاشىلىق سالاسى وڭالدى, ەلدى مەكەندەردە مادەنيەت ۇيلەرى, جاڭا جوبامەن اۋرۋحانا, ورتا مەكتەپ, بالاباقشالار سالىندى. وسىلايشا جۇمىستى ءتيىمدى باسقارۋدىڭ ارقاسىندا جەتىسۋ از عانا ۋاقىتتىڭ ىشىندە ۇلكەن ەكونوميكالىق تابىستارعا قول جەتكىزدى.
ءبىر تاڭعالارلىعى, ابەكەڭ مىڭ سان شارۋانى اتقارسا دا شارشاۋ دەگەندى بىلمەيتىن-ءدى. ول كىسى قازاقتىڭ ءداستۇرلى ونەرىنەن كۇش الىپ, جانارتاۋداي جالىنداپ جۇرەتىن. اعامىزدىڭ كوڭىلى تۇسكەندە اۋەلەتىپ ءان سالىپ, جان-جۇرەگىڭدى ءبىر عاجايىپ كۇيگە تۇسىرەتىنى دە بار ەدى. ءبىر كۇنى اعامىزعا ءۇيىمنىڭ تورىندە ءىلۋلى تۇراتىن مۇسا ءادىلوۆ دەگەن شەبەردىڭ قولىنان شىققان دومبىرانى سىيعا تارتقىم كەلدى. ونەر دەسە ىشكەن اسىن جەرگە قوياتىن اياۋلى اعامىز مەنىڭ بۇل سىيىما جاس بالاشا قۋاندى. بىراق ۇلكەن قىزمەتتە ءجۇرىپ اينالاسىنداعىلاردان ءبىر ساباق ءجىپ الماۋعا ادەتتەنگەن اعامىز: «مىرزاتاي, ەل ءبىلىپ قويسا, وسىنى دا اجەپتاۋىر ءسوز قىلادى دەپ بىردەن ەلپ ەتە قالمادى. بىراق, كەيىننەن جۇرگىزۋشىسىن جىبەرىپ, سول دومبىرانى الدىرعان ەدى. بۇگىندە بيەنى تۇگىمەن, تۇيەنى جۇگىمەن جۇتىپ جاتقان زاماندا بيلىكتەگى كەيبىر باۋىرلارىما اعامىزدىڭ وسىنداي اسىل قاسيەتى جەتپەي جاتقانداي كورىنەدى.
قامشىنىڭ سابىنداي قىسقا عۇمىرىندا ءومىرى جارقىن, ايتقانى ناقىل, ەل اعاسىنىڭ جاسىنا كەلسە دە جاس كەزدەگى قارقىنىنان تانباي ءومىردىڭ جىرى, وتىرىستىڭ گ ۇلى بولىپ جۇرەتىن ازاماتتار بولادى. ونداي ازاماتتار جاستىق شاعىندا دا ەل اعاسىنا اينالعان ساتىندە دە بولمىسىن بۇزباي ساقتاپ قالادى. ءومىر باقي توڭىرەگىمەن سىيلاستىقتا بولادى. سوندىقتان دا شىعار, ابەكەڭ جايىندا سىر تارقاتقاندا اڭگىمەنىڭ اۋانى سىيلاستىققا قاراي ەرىكسىز تارتا بەرەدى.
ابەكەڭ قۇرمەتتى دەمالىسقا شىققاننان كەيىن دە ارا قاتىناسىمىز ۇزىلگەن جوق. مەن ديپلوماتيالىق اكادەميانى باسقارعان جىلدارى نەمەرەسى ورالدى جەتەكتەپ اكەلىپ, قولىما تاپسىردى. بۇگىندە سول ورال بالامىز ەلىمىزدىڭ ابىروي-بەدەلىن اسقاقتاتىپ, رەسپۋبليكالىق دەڭگەيدە قىزمەت جاساپ, تابىستى ەڭبەك ەتۋدە. بۇل ەندى ورالجاننىڭ اتا ءۇمىتىن اقتاعانى دەپ بىلەمىن.
ابەكەڭ جونىندە تاڭدى تاڭعا ۇرىپ اڭگىمە ايتۋعا بولادى. مەن ءوزىمنىڭ ء بىراز ەستەلىكتەرىمدە ابزال ازاماتتىڭ ەڭبەگى جايىندا جازىپ تا ءجۇرمىن. شۇكىر, ۇرپاقتارى اتا-انا الدىنداعى پارىزدارىن ورىنداپ, ۇلىقتاپ كەلەدى. ۇلى – ءنابي تىنىباەۆ ەلى ءۇشىن ەڭبەك ەتىپ, اكەدەن ميراس بولعان ەڭبەكقورلىق قاسيەتىنىڭ قالپىن بۇزباي وتانعا قىزمەت ەتۋدە. اسىل اعانىڭ التىن اسىقتاي قىزدارى دا جەتىلىپ, ءبىر-ءبىر قاۋىم ەلگە اينالىپ, ابەكەڭنىڭ كورە الماعان قىزىقتارىن كورۋدە.
ابۋباكىر اعامىز تابيعاتىنان سەزىمتال, جاڭالىققا جانى قۇمار, ىزدەنگىش, نە نارسەنى ۇيرەنۋگە بەيىم, كوپ بىلۋگە قۇشتار, دارىندى, ادامگەرشىلىك قاسيەتى جوعارى, مەيىرىمدى, كەز كەلگەن نارسەگە بالاشا قۋاناتىن كىسى ەدى. قالىڭ ويدىڭ قۇشاعىندا جۇرەتىن اعامىز تەرەڭ ويلاپ, تەرەڭنەن ءسوز قوزعايتىن, بايىپپەن, بايسالدىلىقپەن ەلدىڭ, جەردىڭ جاعدايىن, ارعى-بەرگى تاريحىن, تاعدىرى جايىندا قىزىقتى اڭگىمەلەردىڭ مايىن تامىزىپ تۇرىپ ايتاتىن اڭگىمەشىل قاسيەتى دە بار-تىن. ول اقكوڭىل, ادامعا سەنگىش, وسەك-اياڭمەن ءىسى جوق, ەشكىمنىڭ كوڭىلىن قالدىرمايتىن, بىرەۋدىڭ الدىن كەسىپ وتپەيتىن, اسىپ-تاسىمايتىن, جانى تىنباي ەڭبەك ەتۋگە دايار تۇراتىن ابزال ادام بولاتىن.
ابۋباكىر تىنىباەۆتىڭ ۇكىمەت پەن حالىقتىڭ الدىنداعى سىڭىرگەن ەڭبەگى جوعارى باعالانىپ, لەنين, ءۇش مارتە ەڭبەك قىزىل تۋ جانە «حالىقتار دوستىعى» وردەندەرىمەن, قازاق كسر جوعارعى كەڭەسىنىڭ قۇرمەت گراموتالارىمەن ماراپاتتالدى. كسرو 11 شاقىرىلىمنىڭ جانە 9, 10 شاقىرىلىمدارىنىڭ قازاق كسر جوعارعى كەڭەسىنىڭ, بىرنەشە شاقىرىلعان تالدىقورعان جانە قىزىلوردا وبلىستارىنىڭ حالىق دەپۋتاتتارى كەڭەستەرىنىڭ دەپۋتاتى بولدى, كوكپ جانە قازاقستان كومپارتياسىنىڭ بىرنەشە سەزدەرىنە دەلەگات بولىپ سايلاندى.
ەلىمىزدىڭ وركەندەۋىنە ولشەۋسىز ۇلەس قوسقان اسىل ازامات, بەلگىلى مەملەكەت قايراتكەرى ابۋباكىر تىنىباەۆتىڭ اتقارعان جۇمىستارى ەلىمىزدىڭ قاي وبلىسىنا بارساڭىز دا الدىڭىزدان شىعادى. ول كىسىنىڭ باسشىلىعىمەن سالعان سۋ قويمالارى مەن توراپتارى ءالى كۇنگە دەيىن حالىق يگىلىگى ءۇشىن جۇمىس ىستەۋدە. سوندىقتان دا ەلى ءۇشىن جارعاق قۇلاعى جاستىققا تيمەي ەڭبەك ەتكەن ابەكەڭنىڭ تۋعانىنا 90 جىل تولۋىنا بايلانىستى, اسىل اعامىزدىڭ كيەلى رۋحىن ەسكە الىپ, ازاماتتى ارداقتاۋعا ارنالعان ءىس-شارالار جەتىسۋ ءوڭىرى مەن قىزىلوردا وبلىستارىندا ءتيىستى دەڭگەيدە اتالىپ وتەدى دەگەن ويدامىن.
اسىلداردى ارداقتاۋ ارتتا قالعان تىرىلەردىڭ پارىزى. ويتكەنى ەل ءۇشىن ەڭبەك ەتكەن ەرلەردىڭ ءومىرى وسكەلەڭ جاس ۇرپاققا قاي جاعىنان دا ۇلگى بولىپ قالا بەرمەك.
مىرزاتاي جولداسبەكوۆ
