«اق جولدىڭ» پارتيالىق ءتىزىمىن تىركەدى

ورتالىق سايلاۋ كوميسسياسىنىڭ كەشە وتكەن وتىرىسىندا كوميسسيا «اق جول» دەموكراتيالىق پارتياسىنىڭ قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا 63 كانديداتتى قامتيتىن پارتيالىق ءتىزىمىن تىركەدى. «اق جول» دەموكراتيالىق پارتيا­سى­نان تىركەلگەن كانديداتتاردىڭ اراسىندا ءتورت ۇلتتىڭ وكىلى بار, ولاردىڭ 15 پايىزعا جۋىعى – ايەلدەر. پارتيالىق تىزىمگە ەنگىزىلگەندەردىڭ جارتىسىنا جۋىعى 55 جاسقا دەيىنگى ازاماتتار. ولاردىڭ ەڭ جاسى 26 جاستا. بارلىق كانديداتتار جوعارى ءبىلىمدى, 35 پايىزعا جۋىعىنىڭ ءبىلىمى زاڭگەر, نە ەكونوميست. 25 پايىزدان استامى ءتۇرلى حالىق شارۋاشىلىعى سالالارىنىڭ ماماندارى. «اق جول» دەموكراتيالىق پارتياسى­نان ۇسىنىلعان ۇمىتكەرلەردىڭ جارتى­سى­نان كوبى كوممەرتسيالىق قۇرىلىمداردىڭ قىزمەتكەرلەرى بولىپ تابىلادى. سونداي-اق تىزىمدە عىلىم, مادەنيەت, ءبىلىم سالاسىنىڭ جانە مەملەكەتتىك ورگاندار مەن مەكەمەلەردىڭ قىزمەتكەرلەرى دە بار. سوڭعى تاۋلىكتە ءماسليحاتتار دەپۋ­تات­تىعىنا كانديداتتار ۇسىنۋ ايتارلىقتاي بەلسەندى جۇرگىزىلدى. ورتالىق سايلاۋ كوميسسياسىنا ءتۇسىپ جاتقان مالىمەتتەرگە سايكەس, 2011 جىلعى 8 جەلتوقسانداعى جاع­داي بويىنشا ءماسليحاتتار دەپۋتات­تى­عىنا 3056 ۇمىتكەر ۇسىنىلعان. ولاردىڭ اراسىندا وبلىستىق ماسليحاتتارعا – 300, ونىڭ ىشىندە استانا قالاسىنىڭ ءماسلي­حا­تىنا – 25 جانە الماتى قالاسىنىڭ ءماس­ليحاتىنا – 37 كانديدات, اۋداندىق ءماسلي­حاتتارعا – 2252, قالالىق ماسليحاتتارعا – 504 كانديدات بار. ۇسىنىلعان كانديداتتاردىڭ 830-ى – «نۇر وتان» پارتياسىنىڭ, 17-ءسى – كوممۋنيستىك حالىق پارتياسىنىڭ, 12-ءسى – قازاقستاننىڭ «اق جول» دەموكراتيالىق پارتياسىنىڭ, 7-ءۋى – قازاقستاننىڭ سو­تسيال-دەموكراتيالىق «اۋىل» پارتياسى­نىڭ, 3-ءۋى قازاقستان پاتريوتتارى پار­تيا­سىنىڭ جانە 1-ءۋى جالپىۇلتتىق سو­تسيال-دەموكراتيالىق پارتيانىڭ مۇشەسى. ال 812 ۇمىتكەر وزدەرىنىڭ پارتياعا قا­تىس­تىلىعىن كورسەتپەگەن, 1374-ءى پارتيادا جوقتار. قازىرگى ساتكە دەيىن ءماسليحاتتار دەپۋ­تاتتىعىنا 39 كانديدات تىركەلگەن. ءاليسۇلتان قۇلانباي.