ەلباسىنىڭ «رۋحاني جاڭعىرۋ» باعدارلاماسى اياسىندا ەلوردانىڭ 20 جىلدىق مەرەيتويى قارساڭىندا ۇيىمداستىرىلىپ وتىرعان سپورتتىق شارانىڭ جوسپارىمەن تانىستىرۋ جانە جارىستى جوعارى دەڭگەيدە وتكىزۋ ماقساتىندا مادەنيەت جانە سپورت ءمينيسترى ارىستانبەك مۇحامەدي ۇلى اتالمىش سالاعا قاتىستى ادامداردىڭ باسىن قوسىپ جيىن وتكىزدى.
سوڭعى جىلدارى ەلىمىزدە مەملەكەت باسشىسى نۇرسۇلتان نازارباەۆتىڭ تىكەلەي تاپسىرماسىمەن ۇلتتىق سپورت تۇرلەرىنەن حالىقارالىق جارىستار كوپتەپ وتكىزىلۋدە. اتاپ ايتار بولساق, اۋدارىسپاقتان العاشقى ازيا چەمپيوناتى 2014 جىلى استانادا, ەكىنشىسى 2016 جىلى قىتاي ەلىندە وتكەن بولسا, تەڭگە ىلۋدەن ءبىرىنشى اشىق ازيا چەمپيوناتى 2015 جىلى ەلوردا تورىندە ۇيىمداستىرىلعان ەدى.
ءماجىلىستىڭ كۇن تارتىبىندە الدا اتقارىلاتىن جۇمىس جوسپارى مەن رەگلامەنتتەرى, شەتەلدىك سپورتشىلاردى ۆيزامەن قامتاماسىز ەتۋ جانە قاۋىپسىزدىك ماسەلەلەرى قارالدى.
«بۇل رەتكى جارىستىڭ ماڭىزى زور, ويتكەنى ءبىزدىڭ ۇلتتىق سپورتىمىزدى تاماشالاۋعا يۋنەسكو-نىڭ ءداستۇرلى سپورتتار مەن ويىندار كوميتەتىنىڭ وكىلدەرى كەلۋگە نيەت تانىتىپ وتىر», دەدى ۇيىمداستىرۋشىلار.
بەكەن قايرات ۇلى,
«ەگەمەن قازاقستان»
