ءىس-شاراعا قحا, ورتالىق سايلاۋ كوميسسياسىنىڭ مۇشەلەرى, ءدىن ىستەرى كوميتەتىنىڭ ماماندارى, «دىندەردى زەرتتەۋ ورتالىعى» قاۋىمداستىعىنىڭ ساراپشىلارى, وتاندىق عالىمدار, اقمولا, قوستاناي, سولتۇستىك قازاقستان وبلىستارىنىڭ ەتنومادەني بىرلەستىكتەر جەتەكشىلەرى, ىشكى, جاستار ساياساتى, تىلدەردى دامىتۋ, ءدىن ىستەرى بولىمدەرىنىڭ وكىلدەرى شاقىرىلىپ, كوپشىلىكتى تولعانتقان وزەكتى ماسەلەلەر تالقىلاندى.
باسقوسۋدا جوبانىڭ ۇيلەستىرۋشىسى, ورتالىق ازيا ايماعى بويىنشا ۇلتارالىق جانە دىنارالىق قارىم-قاتىناستاردى زەرتتەۋ ورتالىعىنىڭ جەتەكشىسى, قحا جانىنداعى عىلىمي- ساراپتامالىق كەڭەستىڭ ءتورايىمى, سوتسيولوگيا عىلىمدارىنىڭ دوكتورى ايگۇل سادۋاقاسوۆا جينالعانداردىڭ نازارىن بىرقاتار وزەكتى جايتتارعا اۋداردى. جالپىۇلتتىق بىرلىك پەن بىرەگەيلىكتى قالىپتاستىرۋدىڭ ادىستەرى مەن تاسىلدەرىن كەڭىنەن ءسوز ەتتى. بىرلىگىمىزدى, تۇتاستىعىمىزدى نىعايتۋ, قازاقستاندىق بىرەگەيلىكتى بەرىك ەتۋ جولىندا قوعامدىق سانانى جاڭعىرتۋدىڭ باستى شارتتارىنا, قوعامدىق قاتىناستارداعى ءدىننىڭ الاتىن رولىنە, جات ءدىني اعىمدارعا قارسى كەشەندى ءىس-قيمىلداردى دۇرىس باعىتتاي ءبىلۋدىڭ, جاس بۋىندى جاڭا تەحنولوگيالارعا دايىنداۋدىڭ, وزىق جەتىستىكتەردى يگەرۋدىڭ ماڭىزدىلىعىنا توقتالدى.
وبلىس اكىمىنىڭ ورىنباسارى ماديار قوجاحمەت ءوز سوزىندە ەلباسىنىڭ سان قىرلى ساياساتىنىڭ ارقاسىندا قازاقستان حالقى ءبىر شاڭىراق استىنا اۋىزبىرشىلىكپەن توپتاسا وتىرىپ ەل ەكونوميكاسىنىڭ دامۋىنا زور ۇلەس قوسىپ كەلە جاتقانىن, پرەزيدەنتتىڭ بەس الەۋمەتتىك باستاماسى بارلىق ساناتتاعى ادامداردىڭ بولاشاعىنا جارقىن جول اشاتىنىن, ەل بىرلىگى قازاقستاندىقتاردىڭ باستى ۇستانىمى بولىپ قالا بەرەتىنىن جەتكىزدى.
قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى لەونيد پروكوپەنكو ءوز ويىن مەملەكەت باسشىسى العا قويعان تالاپ-مىندەتتەردەن باستاپ, ودان ءارى ەلباسىنىڭ قاتىسۋىمەن وتكەن قحا-نىڭ ححVI سەسسياسى تاقىرىبىنا ويىستى. ول سەسسيادا سەگىز مىندەت جۇكتەلگەنىن, قاي-قايسىسى بولسىن ۇلكەن جاۋاپكەرشىلىك پەن بەلسەندى ءىس-قيمىلدى تالاپ ەتەتىن, وسىعان وراي مەملەكەتتىك دەڭگەيدە ناقتى ءىس-شارالار قابىلدانعانىن, ونىڭ ىشىندە قوعامدى ورتاق ماقساتقا توپتاستىراتىن قۇندىلىقتارعا ەرەكشە باسىمدىق بەرىلگەنىن ايتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
