كەشە ENRC (ەۋرازيالىق تابيعي رەسۋرستار كورپوراتسياسى) مەن «ەگەمەن قازاقستان» گازەتىنىڭ باستاماسىمەن ۇيىمداستىرىلعان ەلىمىزدەگى ونەركاسىپ تاقىرىبىنا جازاتىن قازاق جۋرناليستەرى اراسىنداعى ءىى رەسپۋبليكالىق «التىن قالام» شىعارماشىلىق بايقاۋىنىڭ جەڭىمپازدارىن ماراپاتتاۋ ءراسىمى بولىپ ءوتتى.
بايقاۋ اعىمداعى جىلدىڭ قاڭتار ايىندا باستاۋ العان بولاتىن. ونىڭ نەگىزگى ماقساتى – قازاق جۋرناليستيكاسىندا كەنجەلەپ قالعان ەكونوميكا جانە ونەركاسىپ تاقىرىبىنا قالام تارتاتىن جۋرناليستەردى ىنتالاندىرۋ. ارنايى قۇرىلعان ءادىل قازىلار القاسىنىڭ قۇرامىنا ENRC قازاقستان پرەزيدەنتىنىڭ باس كەڭەسشىسى يبراگيم ەدىلباەۆ, «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ, بەلگىلى قالامگەرلەر الدان سمايىل جانە جاراسباي سۇلەيمەنوۆ ەنگەن ەدى.
جەڭىمپازداردى ماراپاتتاۋ ءراسىمىن يبراگيم ەدىلباەۆ اشىپ, العاشقى ءسوزدى ساۋىتبەك ابدراحمانوۆقا بەردى. قازاق ءتىلدى مەرزىمدى باسىلىمدارداعى كەنجەلەۋ قالىپ كەلە جاتقان سالا – ونەركاسىپ تاقىرىبى. ءوندىرىس سالاسىنىڭ يننوۆاتسيالىق قىر-سىرىنا تەرەڭ بويلاپ, بۇگىنگى وركەنيەتتى ونەركاسىپ جەتىستىكتەرىنە قالام تارتاتىن قازاق جۋرناليستەرىنىڭ شوعىرى از. سوندىقتان ەل ەكونوميكاسىنىڭ ماڭىزدى تاقىرىپتارىن جازۋدا مەملەكەتتىك ءتىلدىڭ بەدەلىن ارتتىرىپ, اياسىن كەڭەيتۋ ماقساتىندا ەكى جىلدان بەرى ENRC كومپانياسى مەن «ەگەمەن قازاقستان» رەسپۋبليكالىق گازەتى وسىنداي رەسپۋبليكالىق بايقاۋ وتكىزۋدى قولعا الدى, دەدى «ەگەمەن قازاقستان» گازەتىنىڭ باسشىسى ساۋىتبەك ابدراحمانوۆ. العاشقى جىلعا قاراعاندا بيىلعى وتكىزىلىپ وتىرعان بايقاۋعا قاتىسقان قازاق جۋرناليستەرىنىڭ قاراسى مول, بايقاۋعا كەلىپ تۇسكەن ماقالالار ءۇش ەسە كوپ بولدى. الداعى ۋاقىتتا وسىنداي بايقاۋ وتكىزۋ داستۇرگە اينالادى.
ودان كەيىن ءسوز العان جازۋشى الدان سمايىل ونەركاسىپ تاقىرىبىنا قالام تارتۋدىڭ كۇردەلى ەكەندىگىنە توقتالا كەلىپ, ءتىپتى ەلىمىزدىڭ تەرمينولوگيا ورتالىقتارى دا جاھاندانۋ ۇردىسىنە تەرەڭ كىرىككەن ءوندىرىس, ەكونوميكا تاقىرىپتارىنىڭ جاڭالىقتارىنا ۇنەمى ىلەسە بەرمەيتىندىگىن اتاپ كورسەتتى. ال جاراسباي سۇلەيمەنوۆ پەن ENRC قازاقستاننىڭ كورپوراتيۆتىك كوممۋنيكاتسيالار باسقارماسىنىڭ باسشىسى مايرا قۋاندىقوۆا بۇگىنگى وتكىزىلىپ وتىرعان شارانىڭ قازاق جۋرناليستيكاسىندا كەنجەلەپ قالعان ەكونوميكا, ءوندىرىس تاقىرىپتارىندا مەملەكەتتىك ءتىلىمىزدىڭ بەدەلىن ارتتىرۋعا ەرەكشە ىقپال ەتەتىندىگىن تىلگە تيەك ەتتى.
جىل بويى وتكىزىلگەن ءىى رەسپۋبليكالىق «التىن قالام» شىعارماشىلىق بايقاۋىنىڭ قورىتىندىسى بويىنشا ءبىرىنشى ورىن جانە 500 مىڭ تەڭگە باس بايگە «جاس قازاق» رەسپۋبليكالىق گازەتىنىڭ ەكونوميكا جانە تالداۋ ءبولىمىنىڭ رەداكتورى گۇلزات سماعۇلوۆاعا بەرىلدى. ەكى ەكىنشى ورىندى «ەگەمەن قازاقستان» رەسپۋبليكالىق گازەتىنىڭ شولۋشىسى جىلقىباي جاعىپار ۇلى مەن پاۆلودار وبلىستىق «سارىارقا» سامالى گازەتىنىڭ ءجۋرناليسى نۇربول جايىقباەۆ يەلەنىپ, ءارقايسىسى 400 مىڭ تەڭگە سىيلىققا يە بولدى. ءۇش ءۇشىنشى ورىن «دالا مەن قالا» رەسپۋبليكالىق الەۋمەتتىك ساياسي باسىلىمىنىڭ جۋرناليسى نۇرلان جۇماحانوۆ, «ءوڭتۇستىك قازاقستان» گازەتىنىڭ ەكونوميكا ءبولىمىنىڭ مەڭگەرۋشىسى سۋحانبەردى ورازاليەۆ جانە اتىراۋ وبلىستىق «مۇنايلى استانا» گازەتىنىڭ باس رەداكتورى قۇتتىگەرەي سماديارعا بەرىلدى. ولاردىڭ ارقايسىسى 300 مىڭ تەڭگە كولەمىندە اقشالاي جۇلدە الدى. «ۇزدىك جاس جۋرناليست» نوميناتسياسىندا «الاش ايناسى» رەسپۋبليكالىق قوعامدىق ساياسي اقپاراتتىق گازەتىنىڭ ءتىلشىسى كامشات ساتيەۆا ماراپاتتالىپ, 150 مىڭ تەڭگە اقشالاي سىيلىققا يە بولدى.
قازاق جۋرناليستەرى اراسىنداعى رەسپۋبليكالىق «التىن قالام» شىعارماشىلىق كونكۋرسىنىڭ باستى ماقساتى مەملەكەتتىك تىلگە ناقتىلى قولداۋ كورسەتۋ, ونەركاسىپ سالاسىنا قالام تارتاتىن قازاق ءتىلدى جۋرناليستەردىڭ كاسىبي شەبەرلىگىن شىڭداۋ, مەرزىمدى باسپاسوزدە جاڭا ەكونوميكالىق ويلاۋ ءۇردىسىن قالىپتاستىرۋ بولىپ تابىلادى. بۇل بايقاۋ ENRC كومپانياسىنىڭ باق-تاردا مەملەكەتتىك تىلگە قولداۋ كورسەتۋ جونىندەگى ستراتەگيالىق باعدارلاماسىنىڭ ءبىر جوباسى رەتىندە جۇزەگە اسىپ وتىر.
بەرىك سادىر.
___________
سۋرەتتى تۇسىرگەن ورىنباي بالمۇرات.
