«رۋحاني جاڭعىرۋ» باعدارلاماسىنىڭ اياسىندا, مۇنداي اۋقىمدا العاش رەت ۇيىمداستىرىلىپ وتىرعان جىر مەرەكەسىنە ءوز ەلىمىزدەن بولەك, رەسەي مەن موڭعوليادان, قىرعىزستان مەن قاراقالپاقستاننان ادەيىلەپ كەلگەن جىرشىلار مەن جىراۋلار قاتىستى. مەرەكە شىمىلدىعى قاراعاندى وبلىستىق س.سەيفۋللين اتىنداعى قازاق دراما تەاترىنىڭ ارتىستەرى ازىرلەگەن ساحنالىق كورىنىسپەن اشىلدى.
ونەرسۇيەر قاۋىم ەلىمىزگە تانىمال الماس الماتوۆ, ەربولات شالدىبەكوۆ, بايانعالي ءالىمجانوۆ, مايرا سارسەنباەۆا, مارات سۇگىرباي, بيداس رۇستەمبەكوۆ, فارحات ورازوۆ, دەمەۋباي جولىمبەتوۆ, شاتتىق ۋاتقان, قازىبەك ادىكەي, ارمات يسلامعاليەۆ, اماندىق كومەكوۆ سىندى جىرشىلاردىڭ ونەرىنە كۋا بولدى.
باسقا ەلدەردەن كەلگەن ايدىن قۇرمانوۆتىڭ (رەسەي), ايپەرى قۇلباەۆانىڭ (قىرعىزستان), رينات تاجىباەۆتىڭ (قاراقالپاقستان), اۆيرمەد بالداندورجدىڭ (موڭعوليا) ورىنداۋىنداعى جىرلار دا كوپشىلىكتى وزىندىك ورنەكتەرىمەن, ەرەكشە اۋەزىمەن باۋراپ الدى.
فەستيۆالدىڭ العاشقى كۇنىندە ونەرپازدار وبلىستىڭ بۇقار جىراۋ اۋدانىندا بولىپ, ۇلى جىراۋدىڭ ەسكەرتكىشىنە تاعزىم ەتتى. اۋدان ورتالىعى بوتاقارا كەنتىنىڭ مادەنيەت ۇيىندە جەرگىلىكتى حالىققا كونتسەرت قويدى.
ال ەكىنشى كۇنى قاراعاندى قالاسىنداعى ستانيسلاۆسكي اتىنداعى دراما تەاترىندا كوپشىلىك جىراۋلار سايىسىن تاماشالادى. اسەم ونەردى ءار قيىردا دارىپتەپ جۇرگەن جىرشىلاردىڭ ونەرىنە ءتانتى بولعان ارقا جۇرتى ءبىر سەرپىلىپ قالدى.
فەستيۆال اياسىندا سونىمەن قاتار تاتتىمبەت اتىنداعى ۇلت اسپاپتارى اكادەميالىق وركەسترى, ق.بايجانوۆ اتىنداعى كونتسەرتتىك بىرلەستىك جانە حالىقارالىق بايقاۋلاردىڭ لاۋرەاتى ن.تەمىربەكوۆ ونەر كورسەتتى.
فەستيۆال قورىتىندىسىنا بارلىق قاتىسۋشىلارعا اقشالاي سەرتيفيكاتتار تابىس ەتىلدى.
قايرات ءابىلدا,
«ەگەمەن قازاقستان»
قاراعاندى وبلىسى
