اۋىلدىق مەكتەپ عيماراتىنىڭ ءبىرىنشى قاباتىنان ورىن تەپكەن ورتالىقتى جەرگىلىكتى «سپاسسكوە-اگرو» جشس باسشىسى ماگومەد ابۋەۆ ءوز قاراجاتى ەسەبىنەن كۇردەلى جوندەۋدەن وتكىزىپتى. جەرگىلىكتى تۇرعىندار ءۇشىن بۇل ۇلكەن سىي بولدى. مەكتەپتىڭ ءبىرىنشى قاباتىندا جۇرگىزىلگەن كۇردەلى جوندەۋدەن كەيىن ويىن الاڭى, اسحانا, كىرۋ جۋ ورنى جانە بالالاردىڭ دەمالاتىن بولمەسى پايدا بولدى. بۇرىنعى ەسىك, تەرەزەلەرى تۇگەلىمەن جاڭاسىنا اۋىستىرىلدى. ەدەنگە لينولەۋم توسەلىپ, توبەسى ادەمى جابىندىمەن تولىق جابىلدى. ءسويتىپ بالالار ءۇشىن بارىنشا ىڭعايلى ورتا جاسالدى. ەندى بۇل ورتالىقتا جيىرماعا تارتا بالا تاربيەلەنەتىن بولسا, الدىڭعى لەكتەگىلەر مەكتەپكە دايىندىقتى باستاپ تا كەتتى. ستاتيستيكا دەرەكتەرىنە قاراعاندا, مەكتەپكە دەيىنگى مەكەمەلەرگە بارىپ جۇرگەن بالالار ءوز قاتارلاستارىنا قاراعاندا الدەقايدا ينتەللەكتۋالدىق جاعىنان دامىعاندىعىن تانىتادى.
بالالارىنا وسىنداي ىڭعايلى جاعدايدىڭ جاسالعاندىعىنا اسىرەسە اتا-انالار ءدان ريزا. ايتا كەتۋ كەرەك, اتالعان شاعىن ورتالىقتا بالالاردى وقىتۋعا كەتەتىن شىعىننىڭ ءبىر بولىگىن جشس ءوز موينىنا الىپ وتىر. ال جەتىسپەگەن قارجىسىن اتا-انالار ءوز قالتالارىنان شىعارادى. سونىمەن قاتار بارلىق كەرەك-جاراق: جيھاز, جامىلعىلار, ويىنشىقتار اۋدان بيۋدجەتى قاراجاتىنا ساتىپ الىندى.
اسقار تۇراپباي ۇلى,
«ەگەمەن قازاقستان»
اقمولا وبلىسى
