ەكى جىل ىشىندە BI Marathon كورپوراتيۆتىك باستامادان حالىقارالىق مارافونعا دەيىن ءوستى. ول قايىرىمدىلىق پەن بەلسەندى ءومىر سالتىنىڭ الەمدىك ترەند ەكەنىن كورسەتەدى. مارافون يدەياسىن وزگەلەرگە رياسىز كومەكتەسەتىن ەرىكتى ادامدار باستادى. تىركەلۋدەن تۇسكەن قاراجات تىكەلەي «BI-جۇلدىزاي» قايىرىمدىلىق قورىنا باعىتتالادى. 2017 جىلعى مارافوندا جينالعان قاراجات جۇيكە جۇيەسىن بەلسەندىرەتىن توماتيس تەراپياسىنا ارنايى وڭدەلگەن SOLISTEN قۇرىلعىلارىن ساتىپ الۋعا جۇمسالدى. ونىڭ باستى قىزمەتى - ەستۋ ورگانىن ىنتالاندىرۋ جانە باس مي جارتى شارلارىنىڭ جۇمىسىن ۇيلەستىرۋ. شيەلەنىس جاعدايىنداعى بالالار ەموتسيالارى مەن زەيىندەرىن, فيزيولوگيالىق قىزمەتتەرىن جاقسىراق باقىلاي باستايدى.
2004 جىلدان باستاپ, قور ەرەكشە قاجەتتىلىكتەرى بار بالالارعا قارجىلاي جانە الەۋمەتتىك كومەك كورسەتىپ كەلەدى. قور شەتەلدەن جوعارى بىلىكتى مامانداردى شاقىرا وتىرىپ, وڭالتۋ جۇمىستارى مەن حيرۋرگيالىق وتالار وتكىزەدى. 3,5 جىلدا تسەرەبرالدى سال اۋرۋىنا شالدىققان قازاقستاندىق بالالارعا 468 وتا جاسالدى. قوردىڭ وڭالتۋ ورتالىعىندا 4 جاستان 13 جاسقا دەيىنگى 50 بالا العاش رەت وزدىگىنەن جۇرە باستادى. سونداي-اق «مەنتورستۆو» باعدارلاماسى بويىنشا وتاندىق دارىگەرلەرگە ارنالعان 70 شەبەرلىك ساباعى ءوتتى.
استانا, الماتى جانە جاڭاوزەندەگى «BI-جۇلدىزاي» مەديتسينالىق وڭالتۋ ورتالىقتارىندا لوگوپەد-دەفەكتولوگ, ۋقالاۋشى مامان, «توماتيس تەراپياسىنىڭ» دارىگەرى, ورتوپەد, نەۆروپوتولوگ, ينە سالۋ مامانى كابينەتتەرى جانە تسەرەبرالدى سال اۋرۋى, داۋن سيندرومى, گيدروتسەفالدى سيندروم جانە تب دياگنوزدارى بار بالالارعا ارنالعان ەمدىك دەنە شىنىقتىرۋ زالى جۇمىس جاسايدى.
قوردىڭ ماڭىزدى جوبالارى –رەسپۋبليكالىق جىل سايىنعى سپارتاكيادا مەن ەرەكشە بالالار شىعارماشىلىعىنا ارنالعان «جۇلدىزاي» فەستيۆالى. سوڭعى 13 جىل قاتارىنان 1 ماۋسىم قارساڭىندا قازاقستاننىڭ ءار اۋماعىنان جىگەرلەنگەن بالالار استانادا جينالادى. بارلىعى فەستيۆالگە ەلىمىزدىڭ 16 وبلىسىنان 42 000-نان استام بالا قاتىسقان. قر ءبىلىم جانە عىلىم مينيسترلىگى جوبانىڭ سەرىكتەسى بولىپ تابىلادى.
BI Marathon ەلوردا تۇرعىندارى مەن قوناقتارى ءۇشىن جارقىن سپورتتىق مەرەكەگە اينالدى. العاشقى مارافونعا 1700 ادام قاتىستى. ال 2017 جىلى قاتىسۋشىلار سانى 4500-گە جەتتى. بىلتىرعىداي مارافون قاشىقتىعى 5, 10, 21 جانە 42,2 كم-ءدى قۇرايدى. ءداستۇر بويىنشا ەڭ كىشكەنتاي سپورتشىلار ءۇشىن بالالار جۇگىرۋى بولادى.
«جۇگىرۋشىلەردىڭ قاۋىپسىزدىگى مەن جايلىلىعى ءۇشىن قاجەتتى شارالار ىسكە اسىرىلادى: تەيپتەۋ, دەنەنى شيراتۋ; تراسسانىڭ ءار ونىنشى شاقىرىمى سۋمەن, جەمىستەرمەن جانە تولىق مارافوندى جۇگىرۋشىلەر ءۇشىن يزوتونيكتارمەن جابدىقتالعان پۋنكتەرمەن بولىنگەن. سونىمەن قاتار ءار 10 كم سايىن دارىگەرلەر مەن جەدەل جاردەم كەزەكشىلىكتە بولادى. كورەرمەندەر مەن جانكۇيەرلەر ءۇشىن كەيتەرينگ پەن وتاندىق ارتىستەردىڭ قاتىسۋىمەن مادەني باعدارلاما جوسپارلانعان. مارافونعا دەيىن بىرنەشە كۇن بۇرىن استانا ترياتلون ساياباعىندا سپورتتىق جارمەڭكە وتەدى. وندا قاتىسۋشىلار وزدەرىنىڭ سورەلىك ءنومىرىن الىپ, سپورتتىق تاۋارلار ساتىپ الا الادى. مارافون ۇيىمداستىرۋشىلار كوميتەتى شارانىڭ قازاقستان سپورت الەمىندە جارقىن وقيعاعا اينالىپ, كەڭ اۋقىمعا قايىرىمدىلىق بورىشى مەن سالاۋاتتى ءومىر سالتى قۇندىلىعىنا دەگەن قىزىعۋشىلىعىن ارتتىرۋ ماقساتىندا بار ىنتاسىن سالۋدا,» - دەدى BI Road Construction جانە BI Construction كومپانيالارىنىڭ قاداعالاۋ كەڭەسىنىڭ توراعاسى باۋىرجان يساباەۆ.
