وبلىس اكىمىنىڭ ورىنباسارى ەۆگەني كيم جوبالىق باسقارۋ اياسىندا اتقارىلعان جۇمىس جونىندە حابارلاما جاسادى. بۇگىندە بازالىق يندۋستريالاندىرۋ باعىتىندا قۇنى 359 ملرد تەڭگەنى قۇرايتىن 4 جوبالىق باستاما جۇزەگە اسىرىلىپ جاتىر. وسى ورايدا 2,7 مىڭ جۇمىس ورنىن قۇرۋ جوسپارلانعان. اگروونەركاسىپ كەشەنىن دامىتۋ باعىتى 3 جوبانى قامتيدى. ولار - اگروونەركاسىپ سۋبەكتىلەرى ءۇشىن قارجىنىڭ, ساۋدا نارىعىنىڭ قولجەتىمدىلىگى جانە ەكسپورتتى دامىتۋ, وتاندىق اۋىل شارۋاشىلىعى ونىمدەرىن شەتەل نارىعىنا شىعارۋ جانە جاڭا نارىقتى يگەرۋ بولماق.
- جاپپاي كاسىپكەرلىكتى دامىتۋ, حالىقتى جۇمىسپەن قامتۋ, ينۆەستيتسيا تارتۋ باعىتتارى ايماق ءۇشىن اسا ماڭىزدى. شاعىن نەسيەلەندىرۋگە وبلىستىق بيۋدجەتتەن - 1 ملرد تەڭگە, باسقا كوزدەردەن 2 ملرد تەڭگە ءبولىنىپ وتىر. جۇمىسسىز جانە ءوزىن ءوزى جۇمىسپەن قامتىعان ازاماتتاردىڭ جاڭا بيزنەس يدەيالارىن جۇزەگە اسىرۋى ءۇشىن 3 ملن تەڭگەگە دەيىن قايتارىمسىز گرانتتار بەرىلەدى, - دەدى ەۆگەني كيم.
ەلباسى تاپسىرماسىنا سايكەس دەنساۋلىق ساقتاۋ سالاسىن تسيفرلىق باعدارلاماعا كوشىرۋ جايىندا وبلىستىق دەنساۋلىق ساقتاۋ باسقارماسىنىڭ باسشىسى اقمارال ءالنازاروۆا باياندادى.
باقتيار تايجان,
«ەگەمەن قازاقستان».
قىزىلوردا وبلىسى.
