بۇگىنگى كۇنى جەڭىستى جاقىنداتقان جاۋىنگەرلەر قاتارى سەلدىرەپ بارادى. ميلليونعا جۋىق تۇرعىنى بار اقتوبە وبلىسىندا قازىرگى كەزدە ەكىنشى دۇنيەجۇزىلىك سوعىستىڭ 63 ارداگەرى مەن مۇگەدەگى تۇرادى. جەڭىستىڭ 73 جىلدىعى قارساڭىندا اقتوبە وبلىسىنىڭ اكىمدىگى مەن ءماسليحاتىنىڭ ورتاق شەشىمىنە سايكەس ولاردىڭ ارقايسىسىنا 300 مىڭ تەڭگە كولەمىندە ماتەريالدىق كومەك بەرىلدى. سونداي-اق سوعىسقا قاتىسۋشىلارمەن تەڭەستىرىلگەن تۇلعالارعا جانە تىل ارداگەرلەرىنە دە قارجىلىق تۇرعىدان ءتيىستى قولداۋ شارالارى كورسەتىلدى. وڭىردە مۇنداي ارنايى توپقا ەنگىزىلگەن اعا بۋىن وكىلدەرىنىڭ جالپى سانى 8000-عا جۋىق ەكەنىن ەسكەرسەك, قولعا الىنعان شارالاردىڭ قوماقتىلىعى مەن اۋقىمدىلىعى ايقىندالا تۇسەدى. سونىمەن بىرگە وسىدان 73 جىل بۇرىن سوعىس ءورتى شارپىعان ەۋروپا ەلدەرىنەن, سونىڭ ىشىنەن گەرمانيادان جەڭىسپەن ورالعان مايدانگەرلەردىڭ بۇگىنگى كوزى ءتىرى جەسىرلەرى دە جەرگىلىكتى اتقارۋشى بيلىك وكىلدەرى نازارىنان تىس قالعان جوق. ولارعا دا بەلگىلى ءبىر مولشەردە سىياقى تاعايىندالدى.
تۇتاستاي العاندا جەڭىسكە ءوز ۇلەستەرىن قوسقان اقتوبەلىك اعا ۇرپاق وكىلدەرىنە وبلىس بيۋدجەتىنەن 180 ميلليون 600 مىڭ تەڭگە قاراجات ءبولىندى.
تەمىر قۇسايىن,
«ەگەمەن قازاقستان»
اقتوبە
