«سق-فارماتسيا» جشس اقپاراتتاندىرۋ باسقارماسىنىڭ باسشىسى نۇربول ءجۇمادىلدانىڭ ايتۋىنشا, بۇل جوبا تەگىن مەديتسينالىق كومەكتىڭ مەملەكەت كەپىلدىك بەرگەن كولەمى شەڭبەرىندە دارىلىك قامتاماسىز ەتۋ ۇدەرىسىنىڭ اشىقتىعىن قامتاماسىز ەتۋگە ارنالعان.
بىرىڭعاي ديستريبيۋتوردىڭ اقپاراتتاندىرۋ باسقارماسىنىڭ باسشىسى «پاتسيەنتتەر سىرقاتى ءۇشىن ەمحانا قانداي پرەپاراتتارعا تاپسىرىس بەرگەنىن كورە الادى. بۇدان باسقا, ولار دەرەۋ سول جەردە ءوز دارىلەرىن الۋ ماقساتىندا مەديتسينالىق ۇيىمعا قاشان بارۋ كەرەك ەكەنىن رەتتەۋ ءۇشىن, دارىلەردىڭ كەلەسى جەتكىزىلىمىنىڭ ۋاقىتىن دا كورە الادى.
بۇدان باسقا, اقپاراتتاندىرۋ شەڭبەرىندە بىرىڭعاي ديستريبيۋتور رەسپۋبليكالىق ەلەكتروندى دەنساۋلىق ساقتاۋ ورتالىعىمەن بىرلەسىپ, مەديتسينالىق ۇيىمدار جۇمىس ىستەۋى ءتيىس اقپاراتتىق جۇيەلەردى – دارىلىك قامتاماسىز ەتۋدىڭ اقپاراتتىق جۇيەسىن جانە بىرىڭعاي ديستريبيۋتوردىڭ بىرىڭعاي فارماتسەۆتيكالىق اقپاراتتىق جۇيەسىن ينتەگراتسيالاۋ بويىنشا جۇمىس جۇرگىزۋدە. بۇعان دەيىن جۇيەلەردىڭ شاشىراڭقىلىعى ستاتيستيكالىق ەسەپكە الۋعا دا كەدەرگى كەلتىرىپ, جۇمىستى دا قيىنداتىپ كەلگەن ەدى, ال ولاردىڭ ارقايسىسىندا جەكە جۇمىس ىستەۋ ەداۋىر ۋاقىت الاتىن.
«سونداي-اق ۇيىمنىڭ جوسپارىندا بىرىڭعاي ديستريبيۋتوردىڭ ساتىپ الۋ راسىمدەرىن بارىنشا اشىق ەتۋگە مۇمكىندىك بەرەتىن ساتىپ الۋدىڭ ەلەكتروندى فورماتىنا كوشۋ, بىرىڭعاي ديستريبيۋتور مەن مەديتسينالىق ۇيىمدار اراسىندا ەلەكتروندى ءوزارا ءىس-قيمىل جاساۋعا كوشۋ بار. الدىن-الا ەسەپتەۋلەر بويىنشا, قاعاز تاسىمالداعىشتاردان باس تارتۋ رەسپۋبليكا بويىنشا جىلىنا 70 ملن تەڭگەگە دەيىن ۇنەمدەۋگە مۇمكىندىك بەرەدى. جوبا 1 مامىردان باستاپ ەكى ايماقتا – قاراعاندى جانە اقمولا وبلىستارىندا قاناتقاقتى تۇرىندە ىسكە قوسىلعان, ال جىل سوڭىنا دەيىن بۇكىل ەل بويىنشا ەلەكتروندى ءوزارا ءىس-قيمىلعا كوشۋ جوسپارلانىپ وتىر», دەدى ن.ءجۇمادىلدا.
