«ارميادا 10 جىل بولدىم, ونىڭ 4 جىلى شىعىس پرۋسسياداعى سوعىستا ءوتتى. بۇل سوعىس تۋرالى نە ايتۋعا بولادى؟ وزىمە قىمبات جولداستارىمنىڭ ءبارى ەسىمدە. مەن شىعىس پرۋسسيادان پە-2 ۇشاعىمەن ۇشىپ, سول جەردە اۋىر جاراقات العاندىقتان, جۇرە الماي قالدىم. ماعان بەلورۋس تاتيانا نوۆيكوۆا دەگەن قىز كۇتىم جاسادى. سودان ءبىراز ۋاقىت وتكەن سوڭ مەن ۇيگە اتا-اناما تاتياناعا ۇيلەنۋگە رۇقسات بەرىڭدەر دەپ حات جازدىم. اتا-انامنان رۇقسات بەرگەنى تۋرالى حات الدىم, بىراق ونى بەسقاراعاي اۋدانىنا الىپ كەل دەدى. مەن ونىمەن سويلەسىپ كەلىستىم دە, شىعىس قازاقستان وبلىسىنا الىپ كەلدىم. ول وسىندا قازاق ءتىلى مەن ادەت-عۇرپىن, سالت-ءداستۇرىن ۇيرەنىپ الدى. انام اۋىرىپ, جۇرە الماي قالعان كەزدە كۇتىمدى تاتيانا جاسادى, ول سونداي عاجاپ جان ەدى», – دەيدى مايدانگەر ءوزىنىڭ سوعىس تۋرالى تاريحىن بايانداپ.
اسەت يسەكەشەۆ ارداگەرگە سىيلىق تابىس ەتىپ, ەرلىگى ءۇشىن العىس ايتتى.
«توبەمىزدەگى تۇنىق اسپان ءۇشىن سىزدەرگە كوپ راحمەت. سىزدەر 4 جىل بويى قانشاما قيىندىقتاردان, وزدەرىڭىزگە قىمبات ادامداردى جوعالتۋ ساتتەرىن باستان وتكەردىڭىزدەر. جىل سايىن ارداگەرلەر ازايىپ بارادى, ءبىز ارامىزداعى ءاربىر باتىرعا العىس ايتامىز, باعالايمىز. ءبىزدىڭ مىندەت – سىزدەردى كوزىمىزدىڭ قاراشىعىنداي ساقتاپ, ەرتەڭگى ۇرپاققا ەرلىكتەرىڭىز تۋرالى ايتىپ قالدىرۋ. سىزدەرگە جانە جاقىندارىڭىزعا زور دەنساۋلىق تىلەيمىن», – دەدى اكىم.
94 جاستاعى ميحايل پەتروۆيچ كوچەتكوۆ باتىس قۇرامىندا ءۇشىنشى بەلارۋس جانە ءبىرىنشى پريبالتيكا سوعىسىندا شايقاستى. جەڭىس كۇنىن شىعىس پرۋسسياداعى كەنيگسبەرگ تۇبىندە قارسى الدى.
ارداگەر قالا اكىمىنە سوعىستىڭ قيىندىقتارى تۋرالى ايتىپ بەردى, سوڭىنان مەملەكەتتىڭ ۇنەمى قولداپ كەلە جاتقاندىعىنا ريزاشىلىعىن ءبىلدىردى.
«سوعىستىڭ ءبىتۋىن نەمىس جەرىندە قارسى الدىق. بىزگە وكوپتان شىعىڭدار, نەمىستەر بەرىلدى, سوعىس ءبىتتى دەپ ايتقانى ەسىمدە قالىپتى. ول كەزدە سەنگەن دە جوقپىن, – دەدى ارداگەر. بىراق كەيىن جايلاپ-جايلاپ وكوپتان شىعا باستادىق, راسىندا ەشكىم وق اتپادى. ءبىر-ءبىرىمىزدى قۇشاقتاپ قۇتتىقتاي باستادىق. جالپى, جاستاردى وتاندى قورعاۋعا, بەيبىتشىلىكتىڭ قادىرىن ءبىلىپ, ەلدىڭ يگىلىگىنە جۇمىس ىستەۋگە شاقىرامىن. قازىر بارلىعى تەز دامىپ بارادى, ءبىر ورىندا تۇرىپ قالمايدى, جاڭا استانامىز بار. سوندىقتان تەك قانا العا ۇمتىلۋ قاجەت, ول ءۇشىن بارلىق جاعداي جاسالعان», – دەيدى ميحايل پەتروۆيچ.
ايتا كەتەيىك, قازىر استانادا ۇوس-نىڭ 93 ارداگەرى تۇرادى. جەڭىس كۇنى قارساڭىندا ءاربىر قاتىسۋشىعا ءبىر رەتتىك 511 135 تەڭگە كولەمىندە ماتەريالدىق كومەك بەرىلەدى. بۇدان باسقا, جەڭىلدىكتەر مەن كەپىلدىك بويىنشا ۇلى وتان سوعىسىنىڭ مۇگەدەكتەرى مەن قاتىسۋشىلارىنا تەڭەستىرىلگەندەرگە 21 645 تەڭگە (9 اەك) تولەنەدى. سوعىس جىلدارى ۇوس ارداگەرلەرىنىڭ قايتىس بولعان جەسىرلەرى, جەڭiلدiكتەر مەن كەپiلدiكتەر جاعىنان سوعىسقا قاتىسۋشىلار مەن مۇگەدەكتەرىنە تەڭەستiرiلگەن ادامداردىڭ باسقا ساناتتارىنا, اسكەري جىلدارداعى تىل ەڭبەككەرلەرىنە – 10 823 تەڭگەدەن (4,5 اەك) بەرىلەدى.
