7 مامىر وتان قورعاۋشىلار كۇنىنە وراي بۇگىن «وتار» 40-شى اسكەري بازاسىندا ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ قاتىسۋىمەن جاۋىنگەرلىك پاراد ءوتتى. جاۋىنگەرلىك پاراد – بۇل اسكەري پارادتىڭ جاۋىنگەرلىك وقۋ-جاتتىعۋلار جانە جاۋىنگەرلىك دايارلىق ەلەمەنتتەرىمەن ۇيلەسۋى. ەلىمىز ءۇشىن ايرىقشا ماڭىزى بار جاۋىنگەرلىك پارادقا قاتىسقان نۇرسۇلتان ءابىش ۇلى بارشا قازاقستاندىقتاردى 7 مامىر وتان قورعاۋشىلار كۇنىمەن قۇتتىقتاپ, بۇل كۇننىڭ ەگەمەن ەلىمىز ءۇشىن ەرەكشە ماڭىزدى ەكەنىن ايتتى.
– قىمباتتى قازاقستاندىقتار, ساردارلار مەن ساربازدار! قادىرلى ارداگەرلەر! بارشاڭىزدى وتان قورعاۋشىلار كۇنىمەن شىن جۇرەكتەن قۇتتىقتايمىن. ءباھادۇر بابالار ۇلى دالامىزدى اق بىلەكتىڭ كۇشىمەن, اق نايزانىڭ ۇشىمەن قورعاپ, بىزگە امانات ەتىپ قالدىردى. «ۇراندى ەلدىڭ ۇرپاعى ايبارلى كەلەدى» دەگەن دانا حالقىمىز. بۇگىنگى ايبىندى ارميامىز ءۇشىن ەلدىڭ تىنىشتىعىن ساقتاپ, تاۋەلسىزدىكتىڭ قورعانى بولۋ مارتەبەلى زور مىندەت. جاۋجۇرەك جاۋىنگەرلەردىڭ كوتەرەتىن جۇگى اۋىر. بىراق ول ابىرويلى بورىش, قاستەرلى پارىز. قارۋلى كۇشتەرىمىز حالقىمىزدىڭ سەنىمدى تىرەگى, مەملەكەتتىڭ بەرىك قالقانى, – دەدى ەلباسى.
سونىمەن قاتار, بۇل جاۋىنگەرلىك پاراد قازاقستاندىق ارميانىڭ كاسىبي ەپتىلىگىن, جيناقىلىعى مەن ەسەپتوپتاردىڭ اسكەري مۇمكىندىكتەرىن تاجىريبەدە كورسەتىپ, ەلىمىزدىڭ اسكەري الەۋەتىن جاھانعا ايگىلەدى. جاۋىنگەرلىك پارادقا 3 مىڭعا جۋىق اسكەري قىزمەتشى, 300 بىرلىك قارۋ-جاراق پەن اسكەري تەحنيكا جانە 40 بىرلىك ۇشۋ اپپاراتى قاتىستى.
جاۋىنگەرلىك پاراد ەكى بولىمنەن تۇردى. ءبىرىنشى بولىمدە ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ اتىنان ايماقتىق قورعانىس بريگادالارى استانا مەن الماتى قالالارىنىڭ جانە وبلىستاردىڭ اكىمدەرىنە جاۋىنگەرلىك تۋدى تابىس ەتتى. تۋدى تابىس ەتۋ راسىمىنەن سوڭ ءداستۇر بويىنشا كورەرمەندەر پارادتىڭ سالتاناتتى شەرۋىن, ونىڭ ىشىندە قازاقستان رەسپۋبليكاسى قارۋلى كۇشتەرى ارنايى وپەراتسيالار كۇشتەرىنىڭ, مەملەكەتتىك كۇزەت قىزمەتىنىڭ, قازاقستان رەسپۋبليكاسى ىشكى ىستەر مينيسترلىگى ۇلتتىق گۆاردياسىنىڭ, سونداي-اق ايماقتىق قورعانىس اسكەري قىزمەتشىلەرىنىڭ جانە پارادتىڭ 19 جاياۋ ەسەپتوبىنىڭ شەرۋىن تاماشالادى.
پارادتىڭ ەكىنشى بولىمىندە زاماناۋي قارۋ جاراق پەن اسكەري تەحنيكانى ۇرىستا قولدانا وتىرىپ, بارلاۋ اسكەري بولىمشەلەرىنىڭ شىنايى تاكتيكالىق ءىس قيمىلى كورسەتىلدى. جاۋىنگەرلىك پارادتىڭ سوڭىندا ۇشقىشتار توبى جوعارى دەڭگەيدە «جەتىسۋ بارىسى» جوعارى پيلوتاجدى ورىندادى.
قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ پارادقا قاتىسۋشىلارعا دالالىق جاعدايدا كورسەتكەن شەبەرلىگى, اتىس پەن اسكەري ەپتىلىكتەگى دالدىگى ءۇشىن العىسىن ءبىلدىردى.
سونىمەن قاتار, ەل ازاماتتارى قازاقستان رەسپۋبليكاسى ارمياسىنىڭ جاۋىنگەرلىك قۋاتىن, اسكەري قىزمەتشىلەردىڭ كاسىبي جۇمىسى مەن بولىمشەلەردىڭ ءتۇرلى ءىس-قيمىلداعى جيناقىلىعىن رەسپۋبليكالىق تەلەارنالار مەن قازاقستان رەسپۋبليكاسى قورعانىس مينيسترلىگىنىڭ رەسمي سايتىنىڭ تىكەلەي ەفيرى ارقىلى تاماشالادى.
حاميت ەسامان
«ەگەمەن قازاقستان»
جامبىل وبلىسى,
قورداي اۋدانى
سۋرەتتەر قورعانىس مينيسترلىگىنىڭ ءباسپاسوز قىزمەتىنەن الىندى
