قاتارى كەمىگەن قارت مايدانگەرلەرمەن كەزدەەسى ءداستۇرلى تۇردە, جىل مايىن ءوتىپ كەلەدى. بيىلعى كەزدەسۋ سوعىستاعى جەڭىسكە ارنالعان دەرەكتى فيلم كورسەتۋدەن باستالدى. ال ارداگەرلەردى قۇتتىقتاعان وبلىس اكىمى اماندىق باتالوۆ مايدانگەرلەر مەن تىل ەڭبەككەرلەرىنىڭ بۇگىنگى بەيبىت ومىرگە جەتۋ جولىنداعى ۇلكەن ۇلەسىن ەرەكشە اتاپ ءوتتى.
- بارشاڭىزدى جەڭىس كۇنىمەن شىن جۇرەكتەن قۇتتىقتايمىن! سىزدەردىڭ دەنساۋلىقتارىڭىز بەن تۇرمىستارىڭىزعا قامقورلىق كورسەتۋ – پرەزيدەنتىمىز نۇرسۇلتان نازارباەۆتىڭ ءوڭىر باسشىلارىنىڭ الدىنا قويعان مىندەتتەرىنىڭ ءبىرى. دەنساۋلىقتارىڭىز كۇتىمدە, عۇمىرلارىڭىز يگىلىكتى بولۋى ءۇشىن, امان-ەسەن ورتامىزدا ءجۇرىپ, ەلدىڭ ءوسىپ-وركەندەگەنىنە كۋا بولۋلارىڭىز ءۇشىن ءبىز بارلىق جاعدايدى جاساۋعا تىرىسامىز. ەلىمىزدىڭ بۇگىنگىدەي جەتىستىكتەرگە جەتۋىنە سىزدەردىڭ قوسقان ۇلەستەرىڭىز زور. وبلىستىڭ الەۋمەتتىك-ەكونوميكالىق دامۋىن سىرتتاي باقىلاپ, قاجەت جەرىندە اقىل قوسىپ, ۇنەمى قولداپ وتىراسىزدار, سول ءۇشىن سىزدەرگە العىسىمدى بىلدىرەمىن. سىزدەرگە مىقتى دەنساۋلىق تىلەيمىن, 100 جاسپەن شەكتەلمەي ودان دا ۇزاق عۇمىر كەشىڭىزدەر, - دەدى ايماق باسشىسى.
ءسوز كەزەگىن العان ارداگەرلەر دە اعىنان جارىلىپ, ازاماتارعا اق باتاسىن بەردى. قازىر جەتىسۋ جەرىندە كوزى ءتىرى 138 سوعىس ارداگەرى تۇرادى ەكەن. 12 مىڭعا جۋىق تىل ەڭبەككەرى تاعى بار. جەڭىس كۇنىنە وراي وبلىستىق بيۋدجەتتەن ءاربىر سوعىس ارداگەرىنە 150 مىڭ تەڭگە كولەمىندە بىرجولعى ماتەريالدىق كومەك كورسەتەلدى.
سوعىس ارداگەرى سارسەنباي قاڭتارباي اقساقال وبلىس تاراپىنان مايدانگەرلەرگە كورسەتىلىپ وتىرعان قولداۋ مەن كومەككە ءدان ريزا. تالدىقورعان قالاسىندا تۇراتىن سارسەنباي قاريا ءى جانە ءىى دارەجەلى « ۇلى وتان سوعىسى» وردەندەرى, «ەرلىگى ءۇشىن» مەدالى جانە باسقا دا ناگرادالارمەن ماداقتالعان. ارداگەر بەيبىت ومىردەگى ەسەلى ەڭبەگى ءۇشىن دە بىرقاتار ماراپاتتارعا يە بولعان.
جەتىسۋدىڭ تاعى ءبىر ەرجۇرەك ارداگەرى, 96 جاستاعى ءابىش وشاقباي ۇلىنىڭ تىلەگى ەل ۇستىندە. وتانىمىزدىڭ الەمگە تانىلىپ, بەيبىت تىرلىك كەشۋى قازاق حالقىنىڭ بىرلىكسۇيگىش مىنەزى مەن ەلباسىنىڭ ساليقالى باسقاراۋىنىڭ جەمىسى دەپ سانايدى. ارداگەر وسى تىرلىكتىڭ ىرگەسى بۇزىلماسىن دەپ تىلەيدى. ءوزى مايدانداعى ەرلىگى ءۇشىن قىزىل جۇلدىز, ءى دارەجەلى وتان سوعىسى, قۇرمەت بەلگىسى وردەندەرىمەن, «گەرمانيانى جەڭگەنى ءۇشىن», «ستالينگرادتى ازات ەتكەنى ءۇشىن», «مايدانداعى ەرلىگى ءۇشىن» مەدالدارىمەن ماراپاتتالعان.
ايتپاقشى, بيىل وبلىس تاراپىنان ارداگەرلەرگە جانە ەڭبەككەرلەردىڭ شيپاجايلاردا تەگىن ەمدەلۋىنە جاعداي جاسالىپ, ول ءۇشىن 187,5 ملن تەڭگە قارجى ءبولىنىپ وتىر. مۇنان بولەك ەكىنشى دۇنيەجۇزىلىك سوعىسقا قاتىسۋشىلار مەن مايدان مۇگەدەكتەرىن قوسالقى جانە كومەكشى قۇرالدارمەن قامتۋ ءۇشىن بيۋدجەتتەن 2 ملرد 830 ملن تەڭگە, ال كوممۋنالدىق قىزمەتتەرگە 16 ملن تەڭگە قارجى تاعى قاراستىرىلعان. قىسقاسى الماتى وبلىسىندا قاتارى سيرەگەن قارتتارعا جاسالاتىن قامقورلىق لەگى تولاستامايتىن بولادى.
قالماحانبەت مۇقامەتقالي,
«ەگەمەن قازاقستان».
الماتى وبلىسى.
