«باۋىرجان» قورىنىڭ سپورتتىق جوبالار جەتەكشىسى اينۇر سالىمباەۆانىڭ ايتۋىنشا, الەمنىڭ مىقتى دەگەن فۋتبول كلۋبتارىن كورۋ مۇمكىندىگى تەك قانا ەلىمىزدىڭ ءىرى قالالارىندا عانا ەمەس, سونىمەن قاتار باسقا ايماقتارىندا دا بالالار مەن جاسوسپىرىمدەر اراسىنداعى فۋتبولدىڭ دامۋىنا ىقپال ەتپەك.
– الەمنىڭ مىقتى دەگەن فۋتبول كلۋبىنا جولداما الۋ – قازاقستان بالالار ءۇيىنىڭ تاربيەلەنۋشىلەرىنە وسىمەن التىنشى جىل قاتارىنان بەرىلىپ وتىرعان مۇمكىندىك. التى جىل ىشىندە «ارمانىڭا جاقىندا» جوباسى 11-14 جاس ارالىعىنداعى 2 مىڭعا جۋىق ءجاسوسپىرىمدى فۋتبولعا باۋلىپ, ونىڭ ىشىندە 56 جاس ويىنشىنىڭ ارمانى ورىندالىپ, تەڭبىل دوپتاعى ءوز كۋميرلەرىمەن كوزبە-كوز جۇزدەستى. الەمنىڭ «ميلان», «بارسەلونا», «چەلسي», «باۆاريا», «اتلەتيكو» سىندى مىقتى كلۋبتار ويىنشىلارىمەن كەزدەستى. ەندى ءبىز ءتورت جىلدان بەرى بالالاردىڭ جىگەرىن جاسىتپاي, ارماندارىنىڭ ورىندالۋىنا كومەگىن اياماي كەلە جاتقان «تسەسنابانكپەن» بىرلەسە وتىرىپ, بيىلعى چەمپيوناتتىڭ باستالۋىن حابارلايمىز, – دەيدى اينۇر سالىمباەۆا.
ال قازاقستان فۋتبولىنىڭ ارداگەرى, «قايرات» فك فۋتبولدى جاپپاي دامىتۋ باسشىسى قۇرالبەك ورداباەۆ جاڭا بۋىنعا ۇلكەن ءۇمىت ارتاتىنىن جانە جاسوسپىرىمدەر اراسىنداعى سپورتقا دەگەن ۇلكەن قىزىعۋشىلىق بارىن ايتادى.
ۇيىمداستىرۋشىلار سونىمەن قاتار بالالار ءۇيىنىڭ تاربيەلەنۋشىلەرى اراسىندا سپورتتى دارىپتەۋدىڭ ماڭىزدىلىعىن سول «ارمانىڭا جاقىندا» ءتۋرنيرىنىڭ 60-قا جۋىق قاتىسۋشىسى قازاقستاننىڭ كاسىبي فۋتبول كلۋبتارىندا جاتتىعىپ, وينايتىنىن اتاپ ءوتتى.
– ماسەلەن, بىلتىرعى پاۆلودار وبلىسىنداعى ىرىكتەۋ ويىندارىندا ءبىزدىڭ تۋرنيرگە قاتىسقان ۆلاد كوزارەنكونى ەلىمىزدىڭ ەڭبەك سىڭىرگەن جاتتىقتىرۋشىسى ۆيكتور يارىشەۆ بايقاۋعا شاقىردى. بۇگىندە ۆلاد پاۆلودار قالاسىنىڭ فۋتبول اكادەمياسىندا جاتتىعادى. الدىڭعى جىلداردىڭ قاتىسۋشىلارى – «تاڭشولپان» بالالار ءۇيىنىڭ 4 تاربيەلەنۋشىسى «شاحتەر» كلۋبىنىڭ اكادەمياسىندا وينايدى, – دەدى اينۇر سالىمباەۆا.
ايناش ەسالي,
«ەگەمەن قازاقستان»
الماتى
