قولى بوس ادامداردىڭ ءارىلى-بەرىلى كولىك ساپىرىلىسقان كوشەلەردەن الىس مامىراجاي الاڭدا ەمىن-ەركىن سەيىلدەپ, ونداعى كورسەتىلىپ جاتقان قىزمەتتەردەن رۋحاني ازىق الىپ, بايىپ قايتاتىن ارباتتار الەمنىڭ بارلىق ءىرى قالالارىندا بار.
ەندى ولاردىڭ قاتارىنا قىزىلوردا قالاسى دا قوسىلدى. مۇندا جەرگىلىكتى قولونەرشىلەر, سۋرەتشىلەر جانە حالىق شىعارماشىلىعى وكىلدەرى ءوز تۋىندىلارىمەن جۇرتتى قۋانتادى.
ونەر ارباتى وبلىستىق مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋىمەن قىزىلوردا قالاسىنىڭ 200 جىلدىق مەرەيتويىنا وراي ۇيىمداستىرىلدى.
– ونەر ارباتى كاسىبي جانە اۋەسقوي سۋرەتشىلەردىڭ, قولونەر شەبەرلەرىنىڭ شىعارماشىلىقپەن اينالىسۋىنا قولايلى جاعداي جاسايدى. تۋىندىلارىن جارنامالاۋعا مۇمكىندىك بەرەدى. ايتا كەتەرلىگى, بۇل ورىن حالىقتىڭ رۋحاني دەمالاتىن قوعامدىق-مادەني مەكەنىنە اينالادى دەگەن سەنىم زور. وعان قوسا ونەر ادامدارى شەبەرلىك ءدارىسىن وتكىزە الادى. سونىمەن قاتار قالا قوناقتارىن سىر ءوڭىرىنىڭ ونەرى مەن مادەنيەتىمەن تانىستىراتىن ارنايى ورىن بولادى. قىسقاسى, بۇل جەر سۋرەتشىلەر, قولونەرشىلەر جانە شەبەرلەردىڭ شابىت الاتىن ورنىنا اينالادى, – دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ميرا ءابۋوۆا.
شيەلى اۋدانىنان كەلگەن قولونەر شەبەرى زىليقا قالەندەر: – مەن شي توقۋ ىسىمەن اينالىسىپ كەلەمىن. العاشقىدا سۋرەت سالاتىنمىن. شي توقۋمەن ون التى جىلدان بەرى شۇعىلدانامىن. قىزىلوردا قالاسىندا ونەر ارباتىنىڭ اشىلىپ جاتقانىنا قۋانىشتىمىن. بۇرىن مۇنداي ورىنداردى رەسەيدىڭ ماسكەۋ جانە سانكت-پەتەربۋرگ, ەلىمىزدىڭ استانا جانە الماتى قالالارىندا بار ەكەنىن بىلەتىن ەدىك. وبلىس باسشىلىعىنىڭ قولداۋىمەن تۇساۋىن كەسىپ جاتقان بۇل ورىننىڭ جەرگىلىكتى جۇرتقا بەرەرى كوپ, – دەيدى.
بۇگىندە ارباتتا وبلىستىڭ قالا, اۋدانداعى قولىنان ونەر تامعان زەرگەرلەردىڭ بۇيىمدارى قويىلعان. ەندى مۇندا سىر سۇلەيلەرىنىڭ, اقىن-جازۋشىلاردىڭ شىعارماشىلىعى ناسيحاتتالىپ, مازمۇندى جۇزدەسۋلەر بولىپ تۇرادى.
حالىقتى بەرەكە-بىرلىككە, تاتۋلىققا ۇندەيتىن ايماقتا بالدىرعاندار ءۇشىن دە قىزىق كوپ. وبلىس ءۇشىن ماڭىزدى شاراعا كەلگەن ولار «بەسىك تەربەتكەن انا» بەينەسىندەگى ارحيتەكتۋرالىق بەلگى ماڭىنا وزدەرىنىڭ العاشقى كوشەتتەرىن وتىرعىزدى.
اشىق اسپان استىنداعى مادەني ورىن قالا جۇرتشىلىعى مەن مەيماندارىنىڭ تاعى ءبىر رۋحاني ورتالىعىنا اينالاتىندىعى ءسوزسىز.
باقتيار تايجان,
«ەگەمەن قازاقستان»
قىزىلوردا وبلىسى
