بۇگىن ماسكەۋدە اسۆ 86 (Absolute Championship Berkut) ءتۋرنيرى وتەتىنى جايىندا ءبىز بۇعان دەيىن دە حابارلاعانبىز. ەستەرىڭىزگە سالا كەتەيىك, ايتۋلى جارىستا قوس بىردەي قانداسىمىز كۇش سىناسادى. ولار – ارمان («سۇڭقار») وسپانوۆ پەن اسىلجان («ساق») باقىتجان ۇلى. ءبىراز جىلدان بەرى ورەلى ونەرىمەن قازاق جانكۇيەرلەرىن قۋانتىپ جۇرگەن جارتىلاي جەڭىل سالماقتاعى «سۇڭقار» سوڭعى ەكى باسەكەدە جەڭىلىس تاپقان ەدى. بىرىندە جاراقاتىنا بايلانىستى جەڭىلسە, ەكىنشىسىندە تورەشىلەر بۇرا تارتتى. ەندى ارماننىڭ اتوي سالاتىن كەزى كەلدى. الداعى جارىستا «الاش پرايد» كلۋبىنىڭ ساربازى ارمەنيالىق اكوپ ستەپانيانمەن ايقاسادى.
جارتىلاي اۋىر سالماقتاعى اسىلجان باقىتجان ۇلىنىڭ قازىرگى قارقىنى وتە كۇشتى. كۇنى بۇگىنگە دەيىن 7 رەت ايقاس الاڭىنا شىققان ول بىردە-ءبىر قارسىلاسىنا بەت قاراتقان جوق. ماسكەۋ تورىندە قانداسىمىز رەسەيلىك ءمۇسىلىم ماگومەدوۆپەن كۇش سىناسادى.
– جىگىتتەردىڭ كوڭىل كۇيى جاقسى. ارمان دا, اسىلجان دا الداعى ايقاسقا جاقسى دايارلاندى. ەندى ولار وسى جارىستا جەڭىسكە جەتىپ, بارشا قازاق جانكۇيەرلەرىن قۋانتۋدى كوزدەپ وتىر, – دەيدى «الاش پرايد» كلۋبىنىڭ پرەزيدەنتى دانيار قاسقاراۋوۆ.
9-12 مامىر ارالىعىندا استانانىڭ 20 جىلدىق مەرەيتويىنا وراي «كوشپەندىلەر شايقاسى» دەپ اتالاتىن حالىقارالىق ءتۋرنيردىڭ جالاۋى جەلبىرەيدى. كەشتىڭ باس جەكپە-جەگىندە ەلىمىزدىڭ مىقتى سپورتشىسى, ازيا مەن الەم چەمپيونى, ايقاس الاڭىندا ءالى دە جەڭىلىستىڭ كەرمەك ءدامىن تاتىپ كورمەگەن شاۆقات («نوماد») راحمونوۆ پەن تاجىكستان تارلانى, ايگىلى «احمات» كلۋبىنىڭ وكىلى فاريدۋن («تەرميناتور») وديلوۆپەن كەزدەسەدى.
12 مامىردا «الاش پرايد» كلۋبىنىڭ مۇرىندىق بولۋىمەن قاپشاعايدا بىرقاتار رەيتينگتىك جەكپە-جەكتەر ۇيىمداستىرىلادى. الىس-جاقىن شەتەلدەن كەلگەن سپورتشىلار قازاقتىڭ قايسار ۇلدارىمەن ايقاسادى. ال باستى باسەكە قىرعىزستاندىق اقتىلەك («العىر») جۇمابەك ۇلى مەن قازاقستاندىق ماحير («قۇرىش اياق») مامەدوۆ اراسىندا وتەدى.
24 مامىردا سانكت-پەتەربۋرگتە ەرەجەسىز جەكپە-جەك الەمىنىڭ كوپتەگەن جۇلدىزدارى باس قوسادى. حالىقارالىق ەكونوميكالىق فورۋم اياسىندا ۇيىمداستىرىلعالى وتىرعان م-1 Challenge 92 تۋرنيرىندە قازاقتىڭ سايىن دالاسىنىڭ تاعى ءبىر سايىپقىرانى سايىسقا تۇسەدى. ول – ارمان ءاشىموۆ. مۇستافا وزتۇرىك دەگەن بۇركەنشىك ەسىممەن تانىمال سپورتشىنىڭ سوڭعى كەزدەگى قارقىنى قۋانتارلىق. ول ءوزى قاتىسقان جارىستاردىڭ بارلىعىندا جەڭىسكە جەتىپ ءجۇر. نەۆا جاعالاۋىندا ارمان پانكراتيوننان ەۋروپا چەمپيونى, الەم بىرىنشىلىگىنىڭ كۇمىس جۇلدەگەرى الەكساندر دوسكالچۋكپەن جەكپە-جەككە شىعادى. ۋكراينا سپورتشىسىنىڭ كورسەتكىشى – 8 كەزدەسۋ, 7 جەڭىس جانە 1 جەڭىلىس. وسى ايقاس بارىسىندا م-1 نۇسقاسى بويىنشا الەم چەمپيونى انىقتالادى.
عالىم سۇلەيمەن,
«ەگەمەن قازاقستان»
الماتى
