العاشقى ويىندا ءوز مۇمكىندىگىن پايدالانا الماعان «ارسەنالدىڭ» ەشكىمگە وكپەسى جوق. ءوز مۇمكىندىگىن ءوزى پايدالانا الماي, جارتىلاي فينالدان كەرى قايتتى. ماۋسىم سوڭىندا «ارسەنالدىڭ» باس باپكەرى ارسەن ۆەنگەر قىزمەتىنەن كەتەتىنى بەلگىلى. سوڭعى ويىنىندا ءبىر تروفەي جەڭىپ كەتكىسى كەلگەن اتاقتى باپكەردىڭ ويى ىسكە اسپايتىن بولدى. ەۋروكۋبوكتە 250 ويىندا «ارسەنالدى» الاڭعا الىپ شىققان اڭىز ادامنىڭ كلۋبپەن قوشتاسۋى دا سۇرەڭسىز بولعالى تۇر-اۋ.
ال «اتلەتيكو» ۇيرەنشىكتى جاعدايدا فينالعا شىقتى. ەۋروپا ليگاسىنا بەي-جاي قارامايتىن ديەگو سيميونە كومانداسى كەزەكتى مارتە فينالعا ءوتتى. ءوز الاڭىنداعى ويىندا ديەگو كوستانىڭ سوققان جالعىز گولى يسپانداردى اقتىق سىنعا شىعاردى. «ۆيسەنتە كالدەرون» ستاديونىندا سوڭعى 5 حالىقارالىق ويىندى جەڭگەن مادريدتىكتەر قاقپاسىنا گول دا جىبەرمەي كەلەدى.
ەكىنشى جارتىلاي فينالدىق ماتچ تا تارتىسقا تولى بولدى. اۋستريانىڭ «زالتسبۋرگىنەن» مۇنداي تەگەۋرىندى ەشكىم كۇتپەگەن بولاتىن. اسىقپاي ءجۇرىپ 2 دوپ سوققان الاڭ يەلەرى «مارسەلدىڭ» اپشىسىن قۋىردى. فرانتسيالىقتار قارسىلاستى قالپاقپەن ۇرىپ الامىز دەپ ءجۇرىپ, ماتچ سوڭىندا قالبالاقتاپ قالدى. تەكەتىرەستەگى ەسەپ تەڭەسكەن سوڭ, تورەشى قوسىمشا ەكسترا-تايم جالعادى. ءسويتىپ 116 مينۋتتا قورعاۋشى رولاندۋ سوققان گول «وليمپيكتى» فينالعا الىپ شىقتى.
16 مامىر كۇنى ليونداعى «ستاد دە ليون» ستاديونىندا فينالدا وسى ءتۋرنيردىڭ ەكى مىقتى ۇجىمى باق سىنايدى. جەڭىمپاز كوماندا ەۋروپاداعى ەڭ اۋىر, 15 كيلو تارتاتىن كۋبوكتى يەمدەنەدى. سونىمەن قاتار جەڭىمپاز كوماندا كەلەسى جىلى چەمپيوندار ليگاسىنىڭ توپتىق كەزەڭىنە توپ ەتە تۇسەدى. بۇل جولداماعا «اتلەتيكودان» گورى «مارسەل» قاتتى قىزىعىپ وتىر. سەبەبى رۋدي گارسيانىڭ كومانداسى قازىر فرانتسيا چەمپيوناتىندا 4-ورىندا كەلەدى. «موناكو», «ليون» سەكىلدى كلۋبتارمەن چەمپيوندار ليگاسىنىڭ جولداماسىنا تالاسۋ قيىنداۋ ەكەنىن جانكۇيەرلەرى دە جاقسى تۇسىنەدى.
تاريحتان كەلتىرەر بولساق, 1999 جانە 2004 جىلدارى «مارسەل» فينالعا شىعىپ, ەكەۋىندە دە جەڭىلىس تاپقان ەدى. ەندى فرانتسۋزدار «ەر كەزەگى ۇشكە دەيىن» دەپ وتىر. ال «اتلەتيكو» 2010 جانە 2012 جىلدارى ەۋروپا ليگاسىن ۇتىپ الدى.
ەرمۇحامەد ماۋلەن,
«ەگەمەن قازاقستان»
