فورۋمدى ۇيىمداستىرۋشىلاردىڭ قاتارىندا شاكارىم ۋنيۆەرسيتەتى, پولشانىڭ لەشنو قالاسىنداعى يان اموس كومەنسكي اتىنداعى مەملەكەتتىك جوعارى كاسىبي ءبىلىم مەكتەبى, وڭتۇستىك كورەيانىڭ كيۋنگدونگ ۋنيۆەرسيتەتى, قىتايدىڭ شەنجەن ۋنيۆەرسيتەتى, يوردانيادان بۇكىلالەمدىك يسلام عىلىم اكادەمياسى جانە شۆەيتساريانىڭ ەكونوميكا مەن مەنەدجمەنتكە ارنالعان قولدانبالى عىلىمي جوعارى مەكتەبى بار.
– وركەنيەتتى مادەنيەتتەردىڭ باسىن بىرىكتىرۋ, حالىقتار اراسىنداعى ءوزارا تۇسىنىستىكتى دامىتۋ وسىنىڭ بارلىعى فورۋمنىڭ نەگىزگى ماقساتى, – دەدى شاكارىم اتىنداعى مەملەكەتتىك ۋنيۆەرسيتەتتىڭ رەكتورى مەيىر ەسكەندىروۆ, – دۋالدى ءبىلىم بەرۋ جۇيەسىنىڭ وتاندىق جانە حالىقارالىق تاجىريبەسىن دامىتۋ, ءتورتىنشى ونەركاسىپتىك رەۆوليۋتسيا جاعدايىندا قوس ديپلومدى ءبىلىمنىڭ ماڭىزدىلىعىن ارتتىرۋ بۇگىنگى وزەكتى ماسەلەلەر.
فورۋمنىڭ قۇرمەتتى توراعاسى بولىپ مەملەكەت جانە قوعام قايراتكەرى, قازاقستان رەسپۋبليكاسى پرەزيدەنتى كەڭسەسىنىڭ باستىعى, ساياساتتانۋشى, ساياساتتانۋ عىلىمدارىنىڭ دوكتورى, پروفەسسور, تۇڭعىش پرەزيدەنت – ەلباسى كىتاپحاناسىنىڭ باسشىسى ماحمۇد قاسىمبەكوۆ سايلاندى.
رەكتور قۇرمەتتى توراعا ماحمۇد قاسىمبەكوۆتىڭ فورۋمعا قاتىسۋشىلارعا ارناعان ۇندەۋىمەن تانىستىردى. وندا قازاقستاننىڭ الەمدىك ينتەگراتسيادان الاتىن وزىندىك ورنى اسا وزەكتى ماسەلە ەكەندىگى جانە حالىقتار دوستىعى مەن ىنتىماعى, سول سياقتى ءبىلىم سالاسىنداعى جاڭاشىلدىق باستامالارى بولاشاقتا بۇكىل ادامزاتتى بەيبىت ومىرگە جەتەلەيتىندىگى تۋرالى ايتىلعان.
شارا بارىسىندا پلەنارلىق وتىرىس جانە عىلىمي-تاجىريبەلىك الاڭ وتكىزىلدى. شاكارىم ۋنيۆەرسيتەتى اياسىندا «پولشا-قازاقستان مادەني ورتالىعى» اشىلدى. «اكمە» اعارتۋ كلۋبى دا ءوز ءماجىلىسىن وتكىزىپ, «سىبايلاس جەمقورلىقپەن كۇرەس: حالىقارالىق تاجىريبە جانە ارىپتەستىك» تاقىرىبىمەن دوڭگەلەك ۇستەل ۇيىمداستىردى. سونداي-اق قوناقتار «جيدەباي» ەتنوفەستيۆالىن تاماشالادى.
فورۋمدا باستى سپيكەرلەر رەتىندە كيۋنگدونگ ۋنيۆەرسيتەتىنىڭ رەكتورى, پروفەسسور دجون لي, شەنجەن ۋنيۆەرسيتەتىنىڭ رەكتورى, پروفەسسور تاو يتاو, پولشا ەلىنەن يان اموس كومەنسكي جوعارى مەكتەبىنىڭ رەكتورى, پروفەسسور ماچەي پەتشاك, شۆەيتساريا ەلىنىڭ ەكونوميكا جانە مەنەدجمەنت بويىنشا قولدانبالى جوعارى مەكتەبىنەن رەكتور, پروفەسسور دومينيك دجوردان ءسوز سويلەدى.
وسىنداي جوعارى دەڭگەيدە فورۋم وتكىزۋ ەلباسىنىڭ ءبىلىم سالاسىن دامىتۋداعى تىڭ باستامالارىنىڭ ءبىرى, ەكونوميكالىق جانە رۋحاني, ساياسي باعىتتاعى ۇسىنىپ وتىرعان باستى تاپسىرماسى, دەدى شاراعا جينالعاندار. فورۋم باسقارماسىنىڭ مۇشەلەرى ء«بىلىم بەرۋ – الەمگە» اتتى حارتياعا قول قويدى. ولار ەندى الەمدەگى رۋحاني باستامالاردىڭ جاڭعىرۋىنا ۇلەس قوسپاق.
راۋشان نۇعمانبەك,
جۋرناليست
سەمەي
