مەملەكەت باسشىسىنىڭ تاپسىرماسى وڭىرلەردە قالاي ورىندالۋدا؟ «نۇر وتان» پارتياسىنىڭ وڭتۇستىك قازاقستان وبلىستىق فيليالىندا ء«بىلىم بەرۋ» باعىتى بويىنشا پارتيالىق كۋراتوردىڭ كوميسسياسى كوشپەلى وتىرىس وتكىزىپ, جوعارىداعى سۇراققا جاۋاپ ىزدەدى. وتىرىستا ءماجىلىس دەپۋتاتى, كوميسسيا توراعاسى ءا.بەكتۇرعانوۆ, ءبىلىم جانە عىلىم مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ن.وسپانوۆا, وبلىس اكىمىنىڭ ورىنباسارى ە.سادىر, ءماجىلىس دەپۋتاتى, كوميسسيا مۇشەسى ب.حامەنوۆا بايانداما جاساپ, وزەكتى ماسەلەلەر بويىنشا ءوز ۇسىنىستارىن ورتاعا سالدى. مىسالى, ءماجىلىس دەپۋتاتى ءا.بەكتۇرعانوۆتىڭ ايتۋىنا قاراعاندا, ەلىمىزدەگى كوللەدجدەردى ماتەريالدىق-تەحنيكالىق قامتاماسىز ەتۋ 50 پايىزدىڭ ماڭىندا. كاسىپتىك ءبىلىم الۋشىلاردى شاكىرتاقىمەن, جاتاقحانامەن, تاماقپەن قامتاماسىز ەتۋدە دە بىرقاتار ماسەلە بار. جوعارى وقۋ ورىندارى, مەكتەپ تۋرالى كوپ ايتىلادى, ال كوللەدجدەردىڭ جاعدايى كولەڭكەدە قالۋدا. ال ءماجىلىس دەپۋتاتى ب.حامەنوۆا ءوز بايانداماسىندا تەحنيكالىق جانە كاسىپتىك ءبىلىم بەرۋدە باعدارلاما ەسكىرگەنىن, جەرگىلىكتى جەرلەردە ەلەكتروندى وقۋلىق قۇرالدارى جەتكىلىكسىز ەكەنىن اتاپ ءوتتى. ەلىمىزدەگى 824 كوللەدجدىڭ 41%-ى عانا تالاپقا ساي. 2011 جىلدان بەرى كوللەدجدەرگە رەسپۋبليكالىق بيۋدجەتتەن قارجى بولىنبەگەن. تەك جەرگىلىكتى بيۋدجەت قارجىسىمەن جانە گرانتتارمەن كۇن كورىپ كەلەدى. مۇمكىندىگى شەكتەۋلى بالالاردىڭ كاسىپتىك ءبىلىم الۋى ەسكەرىلمەگەن, ياعني ارنايى وقۋ ورنى دا, ماماندار دا جوق.
تەحنيكالىق جانە كاسىپتىك ءبىلىم بەرۋ بويىنشا وڭتۇستىك قازاقستان وبلىسىندا دا شەشىمىن كۇتكەن ماسەلەلەر از ەمەس. ەلباسى بيىلعى جولداۋىندا جۇمىس بەرۋشىلەردى تارتۋ ارقىلى حالىقارالىق تالاپتار مەن تسيفرلى داعدىلاردى ەسكەرە وتىرىپ, تەحنيكالىق جانە كاسىپتىك ءبىلىم بەرۋ باعدارلامالارىن جاڭارتۋدى تاپسىرعان بولاتىن. وبلىس اكىمىنىڭ ورىنباسارى ە.سادىر وسى باعىتتا بىرقاتار جۇمىس قولعا الىنعانىن اتاپ ءوتتى. وڭىردە 12 جوعارى, 94 ارناۋلى وقۋ ورنى بار. ارناۋلى وقۋ ورىندارىنىڭ 43-ءى مەملەكەتتىك بولسا, 51-ءى جەكەمەنشىك. وبلىستا جۇمىس بەرۋشىلەردى تارتۋ ارقىلى دۋالدى وقىتۋ جۇيەسى 2 جوعارى وقۋ ورنىندا جانە 38 كوللەدجدە 33 ماماندىق بويىنشا 173 كاسىپورىنمەن مەموراندۋم جاسالعان. «كاسىپكەرلەر پالاتاسىمەن بىرلەسىپ قۇرىلىس, تەحنيكالىق, اۋىلشارۋاشىلىق جانە قىزمەت كورسەتۋ سالالارى بويىنشا دۋالدى وقىتۋ جۇيەسى ەنگىزىلدى. دەگەنمەن زاماناۋي جابدىقتالعان ءىرى كاسىپورىندار جاستاردى وقىتۋعا كەلىسە بەرمەيدى. وسى ورايدا ستۋدەنتتەردى تاجىريبەدەن وتكىزۋ, وقىتۋ ءۇشىن ولارعا ءتۇرلى سالىق جەڭىلدىكتەرىن قاراستىرۋ قاجەت سەكىلدى. سونداي-اق بارلىق كوللەدجدەردىڭ ماتەريالدىق-تەحنيكالىق بازاسىن جابدىقتاۋ مۇمكىن ەمەس. ويتكەنى تەحنيكا مەن تەحنولوگيا كۇندە دامىپ جاتقاندىقتان, بيىل جابدىقتالعان كوللەدج كەلەسى جىلى ەسكىرىپ قالۋى مۇمكىن», دەيدى ە.سادىر.
پرەزيدەنتتىڭ بەس الەۋمەتتىك باستاماسىندا جوعارى وقۋ ورىندارى مەن كوللەدجدەردىڭ ستۋدەنتتەرىن جاتاقحانامەن قامتاماسىز ەتۋ ماسەلەسى وتە وزەكتى ەكەنى ايتىلعان بولاتىن. بۇل ورايدا وبلىستا اعىمداعى جىلدىڭ ەكىنشى جارتىسىندا 2 جوعارى وقۋ ورنى – سىرداريا ۋنيۆەرسيتەتى (254) جانە وڭتۇستىك قازاقستان پەداگوگيكالىق ۋنيۆەرسيتەتى (500) تاراپىنان 754 ورىندىق 2 جاتاقحانا پايدالانۋعا بەرىلەتىن بولادى. سونىمەن قاتار كوللەدج ستۋدەنتتەرىنە 11 جاتاقحانا سالۋ جوسپارلانىپ, ونىڭ 9-نا جەر تەلىمى بولىنگەن, ءتيىستى جۇمىستار اتقارىلۋدا. قولدانىستاعى 21 جاتاقحانادا كۇردەلى جانە اعىمداعى جوندەۋ جۇمىستارىن جۇرگىزۋ جوسپارلانۋدا. وبلىس اكىمىنىڭ ورىنباسارى كەلتىرگەن دەرەكتەرگە قاراعاندا, وڭىردەگى 12 جوعارى وقۋ ورنىنىڭ كۇندىزگى بولىمىندە ءبىلىم الاتىن 45 مىڭنان استام ستۋدەنتتىڭ 15 مىڭى جاتاقحاناعا مۇقتاج. بۇگىندە ولاردىڭ 48 پايىزى نەمەسە 7200 ستۋدەنت جاتاقحانامەن قامتىلعان. ال كاسىپتىك-تەحنيكالىق كوللەدجدەردە كۇندىزگى بولىمدە ءبىلىم الاتىن 67 مىڭ ستۋدەنتتىڭ 11500-ءى جاتاقحاناعا مۇقتاج, قازىرگى تاڭدا ولاردىڭ 70,4 پايىزى نەمەسە 8105 ستۋدەنت جاتاقحانادا تۇرادى.
كوميسسيا وتىرىسىندا جاستاردىڭ ماماندىق تاڭداۋى, ۇسىنىس پەن سۇرانىستىڭ سايكەسسىزدىگى سىندى ماسەلەلەر تالقىلانىپ, قورىتىندىسى بويىنشا مەملەكەتتىك ورگاندارعا جولداۋ ءۇشىن ۇسىنىم قابىلداندى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
