مەرەكەلىك ءىس-شارالار بارلىق اۋداندا وزىندىك ەرەكشەلىكتەرىمەن وتكىزىلدى. مىسالى, بۇگىندە 5 ۇلتتىق ەتنو-مادەني ورتالىقتار جۇمىس ىستەيتىن جانە 30-دان استام ۇلت پەن ۇلىستار ىنتىماق بىرلىكتە عۇمىر كەشىپ جاتقان ماقتارال اۋدانىنا كورشى وزبەكستان ەلىنىڭ سىرداريا وبلىسىنان قوناقتار ارنايى كەلدى. مەرەكەلىك شارادا ءسوز العان دەلەگاتسيا جەتەكشىسى ەلباسى ن.نازارباەۆتىڭ بيىل «قازاقستانداعى وزبەكستان جىلى» دەپ اتاۋى — ەكى تۋىسقان ەلدىڭ اراسىن بۇدان دا جاقىنداستىرىپ, كورشى ەلدەردىڭ الىس-بەرىسىن ارتتىرىپ جاتقانىن اتاپ ءوتتى. قوناقجاي قازاق حالقىنا, جىلى لەبىزبەن قارسى العان ماقتارال اۋدانى اكىمىنە العىستارىن ءبىلدىردى.
ال شاردارا اۋدانىندا «تۇڭعىش پرەزيدەنت» ساياباعىندا ءبىلىم وشاقتارى ءار ۇلتتىڭ تىنىس-تىرشىلىگىنەن سىر شەرتەتىن كورمەلەر ۇيىمداستىردى, بالاباقشا ۇجىمدارى ەلىمىزدى مەكەندەيتىن ەتنوس وكىلدەرىنىڭ ۇلتتىق تاعامدارىن ۇسىندى. «التى الاش» الاڭىندا «حالىقتار دوستىعى» شەرۋى وتكىزىلدى. شاردارا اۋدانىندا نەگىزىنەن قىزىلقۇم ءوڭىرىن يگەرۋگە بۇرىنعى كەڭەس وداعىنىڭ تۇكپىر-تۇكپىرىنەن كەلىپ, بۇگىندە بايىرعى تۇرعىنىنا اينالعان 22 ۇلتتىڭ وكىلدەرى تۇرادى.
وبلىس ورتالىعى شىمكەنتتەگى مەرەكەلىك شارانىڭ شىمىلدىعى «Ashyq El» اتتى تەاترلاندىرىلعان مۋزىكالىق قويىلىمىمەن ءتۇرىلدى. وڭتۇستىك جۇرتىن ايتۋلى مەرەكەمەن قۇتتىقتاعان وبلىس اكىمى ج.تۇيمەباەۆ قازاقستان حالقىنىڭ بىرلىگى كۇنى مەرەكەسى - بۇگىنگى تاڭدا بەيبىت ءومىر مەن ىنتىماقتا تۇرمىس كەشىپ وتىرعان ەل تۇرعىندارى ءۇشىن ىستىق ىقىلاس پەن دوستىق نيەتتىڭ ءداستۇرى, اسىعا كۇتەر مەيرامى ەكەنىن اتاپ ءوتتى. «ەلباسىمىز ن..نازارباەۆتىڭ ساليقالى ساياساتىنىڭ ارقاسىندا ەل اۋماعىندا جۇزدەن استام ەتنوس وكىلدەرى تاتۋ-ءتاتتى ءومىر سۇرۋدە. وسىنىڭ ناتيجەسىندە قازاقستان ىنتىماعى جاراسقان, ىرىسى ارتقان ەلگە اينالدى. مەملەكەتىمىزدىڭ باستى بايلىعى – قوعامداعى كەلىسىم مەن تاتۋلىقتى ساقتاۋ ىسىنە ءاربىرىمىز جاۋاپتىمىز», - دەدى جانسەيىت قانسەيىت ۇلى.
سونداي-اق, وبلىس باسشىسى وڭىردەگى ەتنو-مادەني ورتالىق وكىلدەرىنە «باۋىرمال» سىيلىعىن تاپسىردى. مەرەكەلىك شارا «كوڭىلدى داستارحان» - ۆوكالدى حورەوگرافيالىق كومپوزيتسيامەن جانە «الەم ىرعاعى» اتتى ءتۇرلى ۇلت اسپاپتاردىڭ ورىنداۋىندا مۋزىكالىق قويىلىممەن جالعاستى. كوپشىلىك مادەنيەت ورتالىقتارى دايىنداعان كورمەنى تاماشالادى. قازاق ەسترادا جۇلدىزدارىنىڭ كونتسەرتى ءوتىپ, مەرەكە سوڭى وتشاشۋعا ۇلاستى.
ەركىن دوسىمباي,
وڭتۇستىك قازاقستان وبلىسى
