قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى مەن وبلىستىق دەنساۋلىق ساقتاۋ باسقارماسىنىڭ ءوزارا كەلىسىمى نەگىزىندە مەملەكەتتىك قىزمەتشىلەردى الەۋمەتتىك قورعاۋ ماسەلەسى جولعا قويىلدى. ولارعا ورتالىقتاندىرىلعان مەديتسينالىق قىزمەت كورسەتىلەتىن بولدى.
وبلىسىمىزعا ىسساپارمەن كەلگەن اگەنتتىك قىزمەتكەرلەرى ر.تيۋلەباەۆ, ا.قوزباعاروۆتار مەن «ارنايى مونيتورينگ توبىنىڭ» مۇشەلەرى ز.باتتالوۆا, ن.بايمۋرزاەۆ, ى.تۇرسىنزادا اقتاۋ قالاسىنداعى «نەيرون» ەمحاناسىندا بولىپ, بۇدان بىلاي مەملەكەتتىك قىزمەتشىلەرگە ساپالى قىزمەت كورسەتۋگە ءازىر تۇرعان زاماناۋي مەديتسينالىق قۇرال-جابدىقتارمەن قامتاماسىز ەتىلگەن ەمحانا جۇمىسىمەن تانىستى.
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەملەكەتتىك قىزمەتشىلەردىڭ الەۋمەتتىك جاعىنان قورعالۋىنا ەرەكشە كوڭىل ءبولىپ كەلەدى. ولاردىڭ باسپانامەن قامتاماسىز ەتىلۋى, كوپ بالالى وتباسىلارعا جازعى دەمالىس لاگەرلەرىنە جولداما بەرۋ جايى بولاشاقتا كەزەڭ-كەزەڭىمەن شەشىمىن تاپپاق. مەملەكەتتىك قىزمەتشىلەردىڭ ءونىمدى قىزمەت ەتۋى ءۇشىن ولاردىڭ دەنساۋلىعىنىڭ ماڭىزى زور. بۇگىنگى تاڭدا مەملەكەتتىك قىزمەتشىلەردىڭ سپورت كەشەندەرىنە اقىسىز بارۋ ماسەلەسى قارالۋدا.
بۇل باستامالاردىڭ بارلىعى ەلباسى ن.نازارباەۆتىڭ دامىعان 30 ەلدىڭ قاتارىنا ەنۋ تاپسىرماسىنا جانە «100 ناقتى قادام» ۇلت جوسپارىنا سايكەس «كاسىبي مەملەكەتتىك اپپارات قالىپتاستىرۋ» شارالارى اياسىندا جۇزەگە اسىرىلىپ جاتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
