بۇگىنگى تاڭدا اتىراۋ وبلىسىندا مانەرلەپ سىرعاناۋمەن 3 جاستان 14 جاسقا دەيىنگى بالالار اينالىسۋدا – بارلىعى 60-قا جۋىق ادام, كوپ بولىگى قىز بالالار. اتىراۋلىق مانەرلەپ سىرعاناۋشىلار رەسپۋبليكالىق تۋرنيرلەرمەن قاتار, حالىقارالىق تۋرنيرلەردىڭ جەڭىمپازدارى. دەنيس تەننىڭ اتىراۋعا كەلۋى جاس سپورتشىلاردىڭ جاڭا جەڭىستەرگە ۇمتىلۋىنا سەرپىن بولادى جانە اتىراۋ وبلىسىندا وسى قىسقى سپورت ءتۇرىنىڭ دامۋىنا سەپتىگىن تيگىزەدى.
- بالالار دەنيستىڭ كەلۋىن اسىعا كۇتتى, شەبەرلىك ساعاتىندا ونىڭ بارلىق قويىلىمدارىن كوردى. ەندى ولار جاڭا جەتىستىكتەر مەن جەڭىستەرگە ۇمتىلۋعا ىنتالانادى,- دەيدى جاس سىرعاناۋشىلاردىڭ ءبىرىنىڭ اناسى ۆيكتوريا لي.
سپورت جانە دەنە شىنىقتىرۋ باسقارماسىنىڭ باسشىسى ازامات بەكەتتىڭ ايتۋىنشا, اتىراۋعا سوچيداعى وليمپيادا ويىندارىنىڭ قولا جۇلدەگەرىنىڭ كەلۋى ۇلكەن مارتەبە.
-سوڭعى ۋاقىتتا ءبىزدىڭ وڭىردە سپورتپەن شۇعىلدانۋعا, جاۋىنگەرلىك ونەرگە كوپ كوڭىل بولىنۋدە. قىسقى سپورت تۇرلەرىنە دە نازار اۋداراتىن كەز كەلدى, اتاپ ايتقاندا اتىراۋ وبلىسىندا قارقىندى دامىپ جاتقان مانەرلەپ سىرعاناۋ سپورتىنا,- دەيدى ازامات بەكەت.
دەنيس تەننىڭ ءوزى اتىراۋلىق مانەرلەپ سىرعاناۋشىلاردىڭ دايىندىقتارىن جوعارى باعالاپ, شەبەرلىك ساعاتىنىڭ اتىراۋ وبلىسىنداعى وسى سپورتتىڭ دامۋىنا ۇلكەن ۇلەس قوساتىنىنا سەندىردى.
- ءبىرىنشى كەزەكتە وبلىس باسشىلىعىنىڭ سپورتتى, سونىڭ ىشىندە مانەرلەپ سىرعاناۋدى دامىتۋعا قوسقان ۇلەسىن ەرەكشە اتاپ ءوتۋ كەرەك. بالالارعا ساپالى جاتتىعۋ جۇمىستارى ءۇشىن بارلىق جاعداي جاسالعان – جاقسى مۇز جابىندىسى بار زاماناۋي مۇز سارايى, سونىمەن قاتار تاجىريبەلى جاتتىقتىرۋشىلار بار. اتىراۋداعى مانەرلەپ سىرعاناۋدىڭ بولاشاعى زور دەپ ويلايمىن,- دەيدى دەنيس تەن.
