دوڭگەلەك ۇستەلدە ۇكىمەت باسشىسى باقىتجان ساعىنتاەۆپەن قاتار قازاقستانداعى فرانتسيا ەلشىسى فيليپپ مارتينە, فرانتسيا-قازاقستان ساۋدا-ونەركاسىپ پالاتاسىنىڭ پرەزيدەنتى جەرار فريەس جانە پالاتانىڭ باسقا دا مۇشەلەرى بولدى.
ىنتىماقتاستىق كەزدەسۋ بارىسىندا ەكى تاراپقا دا وزەكتى سانالاتىن – اۋىل شارۋاشىلىعى, اگروونەركاسىپ كەشەنى, ءبىلىم بەرۋ مەن بىلىكتى كادرلاردى دايىنداۋ جانە دە «تسيفرلى قازاقستاننىڭ» دامۋى ماسەلەلەرى اياسىنداعى تاقىرىپتار تالقىلاندى. سونداي-اق فرانتسيا-قازاقستان ساۋدا-ونەركاسىپ پالاتاسىنىڭ 2 جىلدىق قىزمەتىنىڭ ناتيجەلەرى ايتىلدى.
«وتكەن جىلى قازاقستان مەن فرانتسيا اراسىنداعى ديپلوماتيالىق قارىم-قاتىناستىڭ 25 جىلدىعىن اتاپ وتسەك, بيىل ەلدەرىمىز اراسىنداعى ستراتەگيالىق ارىپتەستىكتىڭ 10 جىلدىعى. وسى جىلدار بويى فرانتسيا ءبىزدىڭ دوسىمىز ءارى سەنىمدى ارىپتەسىمىز بولعانى بارىنشا ماڭىزدى. ءبىز ەكونوميكا, ءبىلىم, عىلىم, بيزنەس, تۋريزم سىندى بىرقاتار باعىتتا ىنتىماقتاستىقتامىز. بۇگىن وسى زالدا قازاقستاندا جۇمىس ىستەيتىن فرانتسۋز بيزنەسىنىڭ وكىلدەرى وتىر. وسى مۇمكىندىكتى پايدالانا وتىرىپ, قازاقستان ۇكىمەتى سىزدەردى باعالايتىندىعىن ءارى بارلىق دەڭگەيدە قولداۋ كورسەتەتىندىگىن اتاپ وتكىم كەلەدى», دەدى قازاقستان پرەمەر-ءمينيسترى دوڭگەلەك ۇستەل بارىسىندا. سونىمەن قاتار ول فرانتسيا قازاقستاننىڭ ەۋروپاداعى نەگىزگى ساۋدا ارىپتەستەرىنىڭ ءبىرى ەكەندىگىن باسا ايتتى. «بۇگىندە قازاقستاندا فرانتسۋز كاپيتالىنىڭ قاتىسۋىمەن 140-قا جۋىق بىرلەسكەن كومپانيا جۇمىس ىستەيدى. ولاردىڭ قاتارىندا Alstom, Airbus سىندى ءىرى كومپانيالاردىڭ وكىلدەرى بار. ءبىز فرانتسۋز بيزنەسى قازاقستاندا ءوزىن بارىنشا جاقسى سەزىنگەنىن قالايمىز جانە بۇل باعىتتا بەلسەندى جۇمىس جۇرگىزىپ جاتىرمىز», دەدى ب.ساعىنتاەۆ. ۇكىمەت باسشىسى قازىرگى ۋاقىتتا فرانتسيا ازاماتتارى قازاقستانعا ۆيزاسىز كەلە الاتىندىعىن, ەكى ەلدىڭ اراسىندا تىكەلەي اۋە رەيسى اشىلعاندىعىن اتاپ ءوتتى. «قازىرگى ۋاقىتتا قازاقستان ءوز دامۋىنىڭ وتە قىزىقتى ءارى قارقىندى كەزەڭىندە تۇر. وتكەن جىلى ەكونوميكا ءوسىمى 4 پايىزدى قۇراپ, ونەركاسىپتىڭ تۇراقتى ءوسىمى تىركەلدى. ءبىز وسى وڭ ديناميكانى ساقتاپ, ارتتىرۋعا نيەتتىمىز», دەدى ۇكىمەت باسشىسى.
بيىل ەكى ەل اراسىندا ستراتەگيالىق ارىپتەستىك ورناعانىنا 10 جىل. بۇل ارىپتەستىك 2008 جىلى قازاقستان پرەزيدەنتى نۇرسۇلتان نازارباەۆتىڭ فرانتسياعا رەسمي ساپارىنىڭ ناتيجەسىندە قول قويىلعان شارتتان باستاۋ العان ەدى. نەگىزىنەن ەكى ەل اراسىنداعى جاڭا فورماتتاعى كەزەكتى دامۋ ءورىسى 2000-شى جىلداردىڭ باسىندا باستالدى. سونىڭ ناتيجەسىندە بۇگىنگى تاڭدا فرانتسيا ەلىمىزدە كولەمى بويىنشا ءۇشىنشى ءىرى ينۆەستور-مەملەكەت بولىپ سانالادى.
دينارا بىتىك,
«ەگەمەن قازاقستان»
