سۋرەتتى تۇسىرگەن سارسەنبەك قىزايبەك ۇلى
ءباسپاسوز ءماسليحاتىندا قازاقستان جاس پەداگوگ-عالىمدارىنىڭ قاۋىمداستىعى قۇرىلاتىنى ءمالىم بولدى.
– قاۋىمداستىقتى قۇرۋداعى باستى ماقسات – مەملەكەت پەن قوعام دامۋىنا بەلسەندى قىزمەت ەتەتىن, جاڭاشا تۇرعىدا ويلاي الاتىن جاس پەداگوگ-عالىمداردى بىرىكتىرۋ, ولاردىڭ ديالوگ الاڭىن قۇرۋ. سونىمەن قاتار ءبىلىم مەن عىلىم سالاسىنداعى وزەكتى ماسەلەلەر بويىنشا جاس پەداگوگتاردىڭ جۇيەلەنگەن پىكىرلەرىن مۇددەلى تاراپتارعا جەتكىزۋ, وقىتۋ مەن تاربيەلەۋدىڭ ءتيىمدى تەحنولوگيالارىمەن الماسۋ, عىلىمي-زەرتتەۋلەر جۇرگىزۋ جانە شەتەلدىك جوعارى وقۋ ورىندارى, كوللەدج, مەكتەپتەردىڭ جاس پەداگوگ-عالىمداردىڭ حالىقارالىق قاۋىمداستىقتارى, وداقتارى, كەڭەستەرىمەن بايلانىس ورناتۋ دا قاراستىرىلعان, – دەيدى قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا.
بۇگىندە ءبىلىم بەرۋ جۇيەسىندە ۇلكەن وزگەرىستەر ءجۇرىپ جاتىر. وسى ورايدا ەلىمىزدىڭ جاس پەداگوگ-عالىمدارى كوپتەگەن عىلىمي حالىقارالىق, جوعارى باسىلىمداردا عىلىمي ماقالالارى جاريالانۋىن, سونداي-اق, يننوۆاتسيالىق پاتەنت يەگەرلەرىن, كوپتەگەن وقۋلىقتار مەن مونوگرافيالارى جارىق كورگەنىن ماقتانىشپەن ايتا الامىز.
وكىنىشكە قاراي بۇگىندە كەيبىر جاس عالىم-پەداگوگتاردىڭ ەڭبەكتەرى مەن كرەاتيۆتى يدەيالارى كوپ جەردە ەلەنبەي, نازاردان تىس قالىپ جاتىر. وسىعان بايلانىستى قازاقستان جاس عالىم-پەداگوگتارى قاۋىمداستىعى اشىلۋدا. ءبىز ءۇشىن بۇل ەستە قالاتىن ماڭىزدى كۇن, – دەدى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ جاس عالىمدار كەڭەسىنىڭ ءتورايىمى ءمولدىر ابدرايموۆا.
قاۋىمداستىققا مۇشە رەتىندە 35 جاسقا دەيىنگى جوعارى ءبىلىم بەرۋ جۇيەسىندە قىزمەت ەتەتىن, پەداگوگيكا سالاسىندا عىلىمي-زەرتتەۋ تاجىريبەسى بار وقىتۋشىلار تىركەلە الادى.
جاس مۇعالىمدەردىڭ جاڭا قاۋىمداستىعىنىڭ جوسپارى كوپ. جاڭا ۇيىم استاناداعى رەسپۋبليكا ۇستازدارىنىڭ تامىز كونفەرەنتسياسىنا قاتىسىپ, جاس پەداگوگ-عالىمداردىڭ سەكتسياسىن قۇرۋدى كوزدەيدى. جاس عالىم-پەداگوگتاردىڭ حالىقارالىق (اتى الەمگە بەلگىلى كلاسسيكالىق ۋنيۆەرسيتەتتەردىڭ ءبىرى كەمبريدج ۋنيۆەرسيتەتى, وكسفورد ۋنيۆەرسيتەتى) دەڭگەيدە عىلىمي-تاجىريبەلىك كونفەرەنتسيا, فورۋمدار ۇيىمداستىرۋ مەن تاجىريبە الماسۋعا سەپتەسەدى. جازعى مەكتەپتەر ۇيىمداستىرۋ, ونىڭ ىشىندە اعىلشىن تىلىنە كوڭىل ءبولۋ سىندى باسقا ءىس-شارالارعا اتسالىسادى.
ايناش ەسالي,
«ەگەمەن قازاقستان»
الماتى
