ءبىر سوزبەن ايتقاندا, ول بىزگە اعا, ءبىز وعان ءىنى بولا بىلدىك-اۋ دەيمىن. ۇنەمى ازىلدەپ كۇلە سويلەپ, ارقامىزدان قاعىپ قاناتتاندىرىپ وتىراتىن جولەكەڭ وزگەنى دە سىيلاپ, ءوزىن دە سىيلاتا بىلەتىن. ءبىز باققوجا مۇقاي, ءشومىشباي ساريەۆ, جاقاۋ داۋرەنبەكوۆپەن بولمەلەس بولساق, ءسۇلتانالى بالعاباەۆ, سماعۇل ەلۋباەۆ, امانجول ارعىنگەلدين قاشاندا جولەكەڭنىڭ جانىنان تابىلاتىن. ال بۇل ازاماتتاردى كوزى اشىق, كوڭىلى وياۋ جاندارعا تانىستىرۋدىڭ قاجەتى شامالى دەپ ويلايمىن.
1971 جىلى وقۋ ءبىتىرىپ جاتقان شاقتا شاڭىراق كوتەرگەن جولەكەڭ ومىرلىك قوساعى گۇلجاۋھارمەن قول ۇستاسىپ سول كەزدە شەۆچەنكو دەپ اتالاتىن بۇگىنگى اقتاۋ قالاسىنا بەت العان. نەگىزى جولەكەڭنىڭ اتا-باباسى ماڭعىستاۋلىقتار. ال ءوزى اتىراۋ وبلىسىنىڭ جىلوي وڭىرىندە تۋىپ-ءوسىپتى. سوناۋ وتىزىنشى جىلدارداعى قىستالاڭ شاقتا اتا-انالارى امالسىزدان اقتوبە جاققا اۋا كوشۋگە ءماجبۇر بولدى. سودان تەك سوعىستىڭ الدىندا عانا ورالىپتى. تەگىندە جولامان كەيىندە ءبىر ۇلتتىڭ ابىزىنا اينالعان كورنەكتى جازۋشى, مەملەكەت جانە قوعام قايراتكەرى ءابىش كەكىلباەۆتىڭ اعايىنى, اۋىلداسى. اكەسى وڭدىبايدىڭ تۋعان جەرى قاراتاۋدىڭ بوكتەرىندەگى وڭدى اۋىلى. جولەكەڭ وقۋ بىتىرگەلى جاتقان شاقتا ابەكەڭنىڭ جاسى وتىزدان ەندى اسقانمەن ەسىمى قالىڭ قازاعىنا ابدەن تانىلىپ قالعان شاعى ەدى. سول جاقسى اعاسى ىنىسىنە تاياۋ جىلدارى ماڭعىستاۋ جاعىندا ءمانى زور جاڭالىقتار بولىپ قالۋى ابدەن مۇمكىن, سوندىقتان ەل جاققا بارعاندارىڭ دۇرىس دەپ اقىلىن ايتادى.
«اعانىڭ اقىلى جانە رەسپۋبليكا ورتالىق پارتيا كوميتەتىنىڭ جولداماسىمەن شەۆچەنكوعا كەلدىك. مۇندا قازاق تىلىندە شىعاتىن نە قالالىق, نە وبلىستىق گازەت جوق ەكەن دەپ ەسكە الادى ارىپتەسىمىز. قالالىق تەلەستۋديانىڭ اشىلعانىنا ءالى ءبىر جىل تولماعان. گۇلجاۋھار ەكەۋمىز دە سوندا جۇمىسقا ورنالاستىق. ەڭ قىزىعى سول, اينالدىرعان ون بەس كۇننىڭ ىشىندە باس-
پانالى بولدىق».
وسى ارادا باستاپقىدا اعا رەداكتور, رەداكتسيا مەڭگەرۋشىسى, باس رەداكتور بولىپ قىزمەت ەتكەن جاس مامان ارادا سەگىز جىلدان سوڭ الماتىداعى جوعارى پارتيا مەكتەبىنە وقۋعا اتتانادى. پارتيا مەكتەبىن ءبىتىرىپ كەلگەن سوڭ مۇنايلىدا ەكى تىلدە شىعاتىن «مۇنايلى جاڭالىعى» اتتى اۋداندىق گازەتتىڭ رەداكتورى بولىپ تاعايىندالادى. ودان وبلىس ورتالىعىنا قايتا ورالىپ, وبلىستىق تەلەۆيزيا جانە راديو حابارلارى كوميتەتى توراعاسىنىڭ ورىنباسارى, تەلەستۋديا ديرەكتورى بولىپ قىزمەت اتقارادى. ال ەگەمەن ەل اتانىپ, تاۋەلسىزدىككە قول جەتكەن شاقتا ەكى جىلداي وبلىستىق اكىمدىكتىڭ ءباسپاسوز قىزمەتىنىڭ باسشىسى بولعانى دا بار.
ءسوز ورايىنا قاراي ايتا كەتەيىن, سول شاقتا مەن سەمەيدەن الماتىعا كوشىپ كەلىپ «قازاقستان كوممۋنيسى» جۋرنالىندا قىزمەت ەتتىم. ەلگە ءجيى شىعىپ تۇراتىنمىن. العاشقى ءىس- ساپارلارىمنىڭ بىرىندە اقتاۋ, اتىراۋ جاعىنا جول تارتتىم. بۇل جولەكەڭنىڭ وبلىستىق تەلەارنادا باسشىلىق قىزمەتتە جۇرگەن كەزى. بىراق مەن اقتاۋعا كەلگەندە كۋرستاسىم كاۆكاز جاقتا دەمالىپ جاتىر ەكەن. گۇلجاۋھار كۋرستاسىمنىڭ جۇمىس ورنىنا بارىپ جۇزدەستىم. وبلىس ورتالىعىنداعى جۇمىسىم ورىندالعان سوڭ ماڭعىستاۋ اۋدانى ارقىلى اتىراۋعا جۇرمەك بولعاندا, گۇلجاۋھار وبلىس ورتالىعىنا جينالىسقا كەلە قالعان سول اۋداننىڭ ءبىرىنشى باسشىسىمەن تانىس-
تىرىپ ىلەستىرىپ جىبەردى.
جولدا كەلە جاتقاندا جاسى مەنەن كىشى الگى باۋىرىم ماعان: «داۋكە, بۇل جاققا ادايلاردى كورۋگە كەلدىڭىز بە؟» دەگەنى. بۇل سۇراقتىڭ ءمانىسىن تۇسىنىڭكىرەمەگەن مەن «نەگە ولاي دەيسىز؟» دەپ قارسى سۇراق قويدىم. اۋدان باسشىسى ءبىر ك ۇلىپ الىپ, ونىڭ سەبەبىن ايتا باستاعاندا ءبارى تۇسىنىكتى بولدى. سويتسەك, مەنىڭ الدىمدا وسى وڭىرگە كەلگەن ابايلىق جازۋشى, عالىم ءىنىم تۇرسىن جۇرتباي بۇلارعا «ماڭعىستاۋعا ادايلاردى كورۋ ءۇشىن كەلىپ وتىرمىن» دەگەن ەكەن.
جولەكەڭ قاي جەردە دە, قانداي جۇمىستا دا ابىرويلى بولدى, ىسكەرلىك قابىلەتىن بايقاتا ءبىلدى. وبلىستىق «ماڭعىستاۋ» گازەتىنە سەگىز جىل باس رەداكتور بولۋى سونىڭ ايعاعى. قازاقستان جۋرناليستەر وداعىنىڭ وبلىستىق باسقارماسىنا توراعا بولىپ سايلاندى. بىرنەشە مارتە جەرگىلىكتى ءماسليحاتتىڭ دەپۋتاتى دا بولدى. وبلىس قالامگەرلەرى اتىنان رەسپۋبليكا جۋرناليستەرى قۇرىلتايىنا ەكى رەت دەلەگات رەتىندە قاتىستى. شەتەلدىك دەلەگاتسيالار قۇرامىندا ەل, جەر كوردى. جوعارى ماراپاتتارعا يە بولدى.
جولامان وڭدىباي ۇلى 11 جىل ەل گازەتى «ەگەمەن قازاقستاننىڭ» ماڭعىستاۋ وبلىسىنداعى مەنشىكتى ءتىلشىسى بولدى. وسى تۇستا جۇمىستاس رەتىندە گازەت ۇجىمى مەن باسشىلىعىنىڭ جولەكەڭدى قايراتكەر جۋرناليست, اقىلشى اعا رەتىندە قالاي سىيلاپ, قالاي سىي-قۇرمەت كورسەتكەنىن كوزىمىز كوردى.
ءبىز – رەسپۋبليكامىزدىڭ باس گازەتى – «ەگەمەن قازاقستاننان» زەينەتكەرلىككە شىققان ارداگەر جۋرناليستەر ءبىر-بىرىمىزبەن, رەداكتسيامەن ءجيى حابارلاسىپ تۇرامىز. ءبىر-بىرىمىزگە, ۇجىمعا يگى تىلەك تىلەيمىز. سول ورايدا جولەكەڭنىڭ اقتاۋ قالاسىنىڭ جانە مۇنايلى اۋدانىنىڭ, سونداي-اق اتىراۋ وبلىسى جىلىوي اۋدانىنىڭ قۇرمەتتى ازاماتى, كسرو تەلەۆيزيا جانە راديو ءىسىنىڭ ۇزدىگى, قازاقستان رەسپۋبليكاسىنىڭ مادەنيەت قايراتكەرى, قازاقستاننىڭ قۇرمەتتى ءجۋرناليسى بولعانىن ەستىپ بىرگە قۋاندىق. تاعى ءبىر اتاپ ايتارلىعى, اقتاۋعا ونى ءار جىلدارى كەشەگى مەملەكەتتىك سىيلىقتىڭ لاۋرەاتى, جازۋشى-دراماتۋرگ باققوجا مۇقاي, بۇگىنگى قازاق ادەبيەتىنىڭ تانىمال تۇلعالارى سماعۇل ەلۋباي, ءسۇلتانالى بالعاباەۆتىڭ ادەيى ىزدەپ بارعاندارى دا ەسىمىزدە. مۇنىڭ ءوزى حالقىمىزدىڭ «دوسىڭنىڭ كىم ەكەنىن ايت, سەنىڭ كىم ەكەنىڭدى ايتايىن» دەگەن اتالى ءسوزىن ەسكە تۇسىرەدى.
ءبىز, كۋرستاستارى جولەكەڭنىڭ وتباسىندا دا سىيلى ەكەندىگىن جاقسى بىلەمىز. سونىڭ ءبىر ايعاعىنداي گۇلجاۋھار ونىڭ ومىردەگى جاقسى تىرەگى بولا بىلسە, ءوزى قۇداي قوسقان قوساعىنىڭ شىعارماشىلىقپەن الاڭسىز اينالىسۋىنا جاعداي جاسادى. ول سىرقاتتانىپ ۇزاق جاتقاندا, بالاشا باعىپ كۇتتى. سونىڭ دالەلىندەي گۇلجاۋھار كۋرستاسىمىزدىڭ ارتىندا وننان استام جىر جيناعى قالدى. مۇنىڭ سىرتىندا ماڭعىستاۋلىقتار بۇگىندە گۇلجاۋھاردىڭ تۋعان ءتىل جاناشىرى بولعانىن جىر عىپ ايتىپ جۇرگەنىن دە ەستيمىز. تەگىندە العاش ۋنيۆەرسيتەتكە وقۋعا تۇسكەندە كۋرستاعى جيىرما بەس ستۋدەنتتىڭ ءبارى اقىن بولاتىن. كەيىندە سولاردان گۇلجاۋھار سەيىتجان مەن ءشومىشباي ساريەۆ قانا پوەزياعا ادالدىعىن ساقتاپ قالدى.
ءبىزدىڭ قادىرلى كۋرستاستارىمىزدىڭ قىزى جانار مەن ۇلى سەرىكتەن ءتورت نەمەرەسى بار. جولەكەڭە ەندى سولاردىڭ قىزىعىن ءوزىڭىز كورىڭىز دەيمىز. گۇلجاۋھاردىڭ جاساي الماعان جاسىن ءوزىڭىز جاساپ, جاسى توقساننان اسىپ ومىردەن وتكەن اقسۇيرىك انامىزدىڭ جاسىن وزىڭىزگە ارتىعىمەن بەرسىن دەيمىز! جوعارىدا ايتىپ وتكەندەي, ءسىز جۋرناليستيكانىڭ جىلىگىن شاعىپ, مايىن ىشكەن, ادال ەڭبەگىمەن ابىروي بيىگىنە شىققان ازاماتسىز. وسىنداي ونەگەلى ءومىرىڭىز كەيىنگى جاس تولقىنعا جۇعىستى بولعاي!
داۋلەت سەيسەن ۇلى,
قازاقستاننىڭ قۇرمەتتى ءجۋرناليسى
الماتى
