ونىڭ ايتۋىنشا, بىلتىر قابىلدانعان كودەكستە قازاقستان جەر قويناۋىن پايدالانۋشىلارعا سالىق سالۋ, اقپاراتتىڭ شىنايىلىعى جانە قولجەتىمدىلىگى, راسىمدەردى وزگەرتۋ جانە جەڭىلدەتۋ ارقىلى جەر قويناۋىن پايدالانۋ سالاسىن زاڭنامالىق تۇرعىدا رەتتەۋ جولعا قويىلعان. الايدا, جەر قويناۋىن زەرتتەۋ ماسەلەسى اتالعان زاڭنامادا كەڭ اۋقىمدا قاراستىرىلماعاندىقتان, كوپتەگەن سۇراقتار تۋىنداپ وتىر. دەپۋتات, نورماتيۆتىك قۇقىقتىق اكتىلەردى تالقىلاۋ بارىسىندا قوعامدىق ينستيتۋتتار بىرلەسە جۇمىس جاساپ, كونسترۋكتيۆتىك ديالوگ الاڭىندا ماسەلەنىڭ جان-جاقتى قامتىلۋى كەرەكتىگىن ايتتى. ءوز بايانداماسىندا گ. بايماحانوۆا ەلدەگى گەولوگيالىق قاۋىمداستىق اسىعا كۇتكەن قۇجات– مەملەكەتتىك جەر قويناۋى قورلارىن باسقارۋ باعدارلاماسىندا جەر قويناۋىن مەملەكەتتىك گەولوگيالىق زەرتتەۋ اقپاراتىنىڭ ءۇستىرتىن جازىلعانىن دا سىنعا الدى.
«بارشامىز ءۇشىن قازاقستاننىڭ جەر قويناۋى, ونىڭ پايداسى مەن ۇزاق مەرزىمدى تيىمدىلىگى ماڭىزدى. سول سەبەپتى, ماماندارعا ماڭىزدى مىندەتتەر جۇكتەلمەك. ەڭ الدىمەن, شەتەلدىك تاجىريبەگە سۇيەنىپ, سالىستىرىپ, گەولوگيالىق اقپاراتتى جيناۋ جۇيەسىن بىرىزدىلەندىرۋ كەرەك. ودان كەيىن قولدانىسقا ەنگىزىلەتىن كودەكستىڭ ءار بابىنا ساۋاتتى تۇسىنىكتەمە بەرەتىن زاڭگەرلەر توبىن قۇرۋ قاجەت. وسى رەتتە كاسىبي زاڭگەرلەر ءتۇسىندىرۋ جۇمىستارىمەن كەڭ اۋقىمدا اينالىسۋى ماڭىزدى. بۇعان قوسا, كودەكستى اعىلشىن تىلىنە اۋدارىلىپ, بارلىعى ءۇشىن تۇسىنىكتى بولاتىنداي تەرمينولوگيالىق سوزدىك دايىنداۋ − باستى اتقارىلاتىن جۇمىستاردىڭ ءبىرى», - دەدى كوميتەت حاتشىسى.
سونىمەن قاتار فورۋم اياسىندا «رەسپۋبليكالىق تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارىنىڭ قاۋىمداستىعى» زتب اتقارۋشى ديرەكتورى نيكولاي رادوستوۆەتس كەلەر جىلى ەكولوگيالىق كودەكسكە وزگەرىستەر ەنگىزىپ, بىرقاتار ماسەلەلەردى زاڭ اياسىندا شەشۋ كەرەكتىگىن تىلگە تيەك ەتتى. ونىڭ ايتۋىنشا, زاڭ اياسىندا كاسىپورىندارعا تەك ايىپپۇل سالىپ قانا قويماي, قالدىقتار كولەمىن ازايتۋ, لاستانۋدىڭ الدىن الۋ سىندى ماڭىزدى مىندەتتەر جۇكتەۋ قاجەت.
«ەكونوميكالىق ىنتىماقتاستىق جانە دامۋ ۇيىمىنا مۇشە مەملەكەتتەردىڭ تاجىربيەسىنە سۇيەنسەك, ماماندار زالال كەلتىرگەن ورىنعا يا ايماققا بارىپ, بارلاۋ جۇرگىزۋ ارقىلى ماسەلەنىڭ انىق-قانىعانا كوز جەتكىزەدى. بۇل ءوز كەزەگىندە قاۋىپتى جاعدايدىڭ الدىن الۋعا مۇمكىندىك بەرەدى», دەدى ن. رادوستوۆەتس.
ەركەجان ايتقازى,
«ەگەمەن قازاقستان»
