بۇگىندە ەۋروپا مەن ازيادا, وڭتۇستىك جانە سولتۇستىك امەريكادا, افريكا مەن انتاركتيدادا داناتتىڭ تابانىنىڭ ىزدەرى قالعان. دۇنيەنىڭ ءتورت تۇپكىرىن ارالاۋ ءۇشىن ەڭ الدىمەن قاراجات كەرەك. اقتوبەلىك ساياحاتشى ونى قايدان الىپ ءجۇر؟
بۇعان اشىق جاۋاپ بەرمەسە دە دانات جول شىعىنىن جابۋعا جەتەتىندەي بيزنەسى بار ەكەنىن مالىمدەدى. كەڭ ءۇي مەن كوتتەدجدە تۇرۋ نەمەسە وعان جيھازدار ساتىپ الۋ, باعاسى جوعارى شەتەلدىك اۆتوكولىك ايداۋ ويىنا كىرىپ تە شىقپايدى. بار وي-ماقساتى ساياحاتتاۋ عانا. ءار ەلدى ءبىر بىرىمەن سالىستىرا قاراۋ وعان كادىمگىدەي ءلاززات سىيلايدى. جۇزگە تارتا ەلگە جولى تۇسكەن كەزدە جيھانگەز: «جامان ەل جوق, جامان ادامدار كەزدەسىپ قالادى» دەگەن تۇجىرىمعا كەلىپتى. «كەدەي نەمەسە باي ەل دەپ بولمەيمىن, ءار ەلدىڭ وزىنە ءتان قىرى مەن سىرى, قۇپياسى مەن وزگەگە ۇقسامايتىن ەرەكشەلىگى بولادى. وسىعان كوزىم جەتتى. جالپى, ساياحاتشىلىق ادامنىڭ دۇنيەتانىمى مەن كوكجيەگىن كەڭەيتەدى. زەردەسى مەن وي-ءورىسىن تولىقتىرا تۇسەدى», دەيدى ول.
سونداي-اق دانات اليەۆ شەتەلگە شىعاردا ەڭ قاجەتتى ءىس اۆيابيلەتتەردى سايتتار ارقىلى ءتيىمدى باعاعا ساتىپ الۋ جانە مەديتسينالىق ساقتاندىرۋ انىقتاماسىن راسىمدەۋ دەپ ەسەپتەيدى. بۇل رەتتە ول شارتتارى ءوزىنىڭ كوڭىلىنەن شىعاتىن ۆيزا-كارتوچكا اشىپ, مەديتسينالىق ساقتاندىرۋ راسىمدەۋدى داعدىعا اينالدىرىپتى. ءبىر جولى وسى قاپىسىز قامدانۋىنىڭ پايداسى دا ءتيىپتى. ياعني تايلاندتا بولعان كەزىندە وتانداسىمىز تاماقتان ۇشىنىپ, اسقازانىن تەكسەرتكەنى ءۇشىن 200 دوللار تولەگەن ەكەن. ەلگە كەلگەن سوڭ ساقتاندىرۋشى بانك ونىڭ ەمگە جۇمساعان اقشاسىن تولىق وتەپ بەرىپتى.
الدىن الا ءبىر جىلعا قۇرىلعان جوسپار بويىنشا الەم ەلدەرىنە اتتاناتىن اقتوبەلىك جيھانگەز تاياۋدا جاپونيا مەن تۇركياعا ءجۇرىپ كەتۋدى ويلاستىرىپ وتىر. مۇمكىندىك تۋىپ جاتسا, ول ساياحاتىنىڭ سوڭعى نۇكتەسىن مارس پلانەتاسىندا قويعاندى ءجون كورەدى.
تەمىر قۇسايىن,
«ەگەمەن قازاقستان»
اقتوبە
