وبلىس ورتالىعىنداعى جوعارى وقۋ ورىندارىنىڭ ستۋدەنتتەرى, وقىتۋشىلارى, «جاڭعىرۋ جول» جاستار شتابىنىڭ مۇشەلەرى مەن ەتنومادەني بىرلەستىك بەلسەندىلەرى قاتىسقان شارا بارىسىندا كەزدەسۋگە جيىلعاندار جوبانىڭ ماڭىزدىلىعىنا جان-جاقتى توقتالدى. «ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ اياسىندا ءبىر جىل كولەمىندە از جۇمىس اتقارىلعان جوق. وسى رەتتە «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن ەرەكشە ايتۋعا بولادى.
بۇل – جاستارعا ارنالعان اۋقىمدى جوبا. الەمنىڭ ەڭ ۇزدىك اۆتورلارىنىڭ ەڭبەكتەرىن ەندى سىزدەر قازاق تىلىندە وقۋعا مۇمكىندىك الدىڭىزدار», - دەدى وسكەمەندەگى دوستىق ءۇيى – قوعامدىق كەلىسىم ورتالىعىنىڭ ديرەكتورى ەلدار تولەۋبەك ۇلى جيىننىڭ اشىلۋىندا سويلەگەن سوزىندە. تاريح عىلىمدارىنىڭ كانديداتى, قوعام بەلسەندىسى ءادىل سايلاۋبەك بۇل جوبا مەملەكەتتىك ءتىلدىڭ مەرەيىن اسىراتىن ماڭىزدى قادامداردىڭ ءبىرى ەكەندىگىن ايتتى. «جوبانىڭ ەرەكشەلىگى, قۇندىلىعى – ءبىز بۇعان دەيىن كوپتەگەن ەڭبەكتەردى ورىس تىلىندە وقىپ كەلسەك, ەندى تۇپنۇسقادان اۋدارىلعان تۋىندالاردى وقۋعا مۇمكىندىك تۋىپ وتىر.
بۇل ءوز كەزەگىندە انا ءتىلىمىزدىڭ قوعامداعى ءرولىن نىعايتا تۇسۋگە ىقپال ەتەدى», - دەيدى ول. سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ «قازاقستان تاريحى جانە الەۋمەتتىك – گۋمانيتارلىق پاندەر» كافەدراسىنىڭ اعا وقىتۋشىسى مايرا شۇرشىتبايقىزى جوبانىڭ وقىتۋشىلار ءۇشىن دە, ستۋدەنتتەر ءۇشىن ماڭىزى زور ەكەندىگىن تىلگە تيەك ەتتى. ء«بىز الداعى ۋاقىتتا الەمدەگى ايتۋلى وقۋ ورىندارىنىڭ ءبىلىم بەرۋ باعدارلاماسىنداعى وقۋلىقتارمەن ءوز ستۋدەنتتەرىمىزگە ءدارىس وقيتىن بولامىز. مەن فيلوسوفيا جانە ءدىنتانۋ پاندەرىنەن ءدارىس وقيمىن. بۇعان دەيىن وسى پاندەرگە قاتىستى وقۋلىقتاردىڭ جەتىسپەۋشىلىگى بايقالاتىن. «رۋحاني جاڭعىرۋ» باعدارلاماسى اياسىندا جۇزەگە اسىرىلىپ وتىرعان جوبا بۇل تۇيتكىلدىڭ ءتۇيىنىن تارقاتارى انىق», - دەيدى وقىتۋشى.
ازامات قاسىم,
«ەگەمەن قازاقستان»
وسكەمەن
